འཇིག་རྟེན་སྣང་བའི་སྡེ་ཆེན་ཀློང་ཡངས་ནས།།

བརྩེ་བའི་ཞེན་ཆགས་དྲན་པའི་མིག་ཆུ་དང་།།

སེམས་ཀྱི་ཤ་སྐྱི་སྙི་མོར་འབབ་ཚུལ་ལ།།

ཁྱེད་ཀྱི་གཤིས་དང་མཛེས་པའི་འཕྱོར་ཉམས་སོགས།།

སྲིད་པ་གསུམ་གྱི་ཕྱི་ནང་སློག་ཀྱང་སྟེ།།

རྙེད་དུ་མེད་པའི་ནོར་བུ་གཏེར་དང་མཚུངས།།

གནག་སྣུམ་སྐྲ་ལོ་རྒྱ་ལྕང་ལོ་མ་དང་།།

སྐྱེ་གཟུགས་ཚིགས་དྲུག་སྙེ་མའི་མདའ་མོ་སྟེ།།

བྱད་དབྱིབས་མཛེས་པའི་མེ་ལོང་སྒོར་མོའི་ནང་།།

འཆི་མེད་ངང་པའི་བུ་མོའི་མཆོར་སྒེག་ཀྱང་།།

ཁྱེད་ཀྱི་མཛེས་སྡུག་པདྨའི་ཀློང་ཡངས་ནས།།

ཡིད་འོང་སྒྱུ་འཕྲུལ་ལྷ་མོའི་གཟུགས་བརྙན་ཙམ།།

བརྡ་དང་སྐད་ཆའི་ཟར་ཟུར་སྙིང་ལ་ཟུག།

འགྲོས་དང་གོམ་པའི་གདེངས་

འཇོག་སེམས་སུ་བབ།།

ཐ་ན་སྐྱོ་བའི་གདོང་གི་མིག་ཆུ་དང་།།

འཁྲོས་པའི་སྤྱན་མིག་འབྱེད་པའི་རྒོལ་བ་ཡང་།།

བདག་ཡིད་དྲན་པའི་ངོགས་ཀྱི་འགྱུ་བ་ལས།།

ཞི་འཇགས་བརྩེ་བའི་ཆར་ཟིལ་རློན་པ་ཡིན།།