ངས་སྒུག་སྡོད་ཁང་དུ་སོ་ནད་སྨན་པ་བསྒུགས་ནས་བསྡད་པའི་ཚེ། གྱང་ལོགས་ན་བཀལ་བའི་གོས་དཀར་ལྷ་རྗེའི་ལག་འཁྱེར་ལོགས་ཀྱི་མིང་དེས། ང་ལ་མི་ཞིག་དྲན་དུ་བཅུག་སོང་། མི་དེ་ནི་ཏག་ཏག་མི་ལོ་ཉེར་ལྔའི་སྔོན་གྱི་ངའི་མཐོ་འབྲིང་གི་སློབ་གྲོགས་ཤིག་རེད།

ངའི་དྲན་ངོགས་ན་ཁོའི་མཚན་གྱི་ཡིག་འབྲུ་རེ་རེ་ཆུ་དྭངས་ཉ་མོའི་ཚུལ་དུ་ལྷང་ངེར་འཆར་དོན་ནི། སྔར་ཡིན་ན་ཁོ་ནི་གཟུགས་བཟང་ཞིང་བརྟུལ་ཕོད་ཆེ་བ། མཛེས་པ་ལྷ་ཕྲུག་གཞོན་ནུའི་སྤུན་འདྲ་བའི་ཕོ་སར་རྗིག་པོ་ཞིག་ཡོད་པས།ཀུན་དགའི་དཔལ་དུ་བཞུགས་པའི་མི་ཁོ་ལ། ན་ཆུང་མའི་གྲས་ན་བློ་ལ་མི་འགྲོ་བ་ཞིག་ཕལ་ཆེར་མེད་དེ། ཐམས་ཅད་ཀྱིས་ཁོ་ལ་མཉེས་པོ་གནང་གཤིས།སྐབས་དེར་ང་ལ་འཕྲལ་མར་ཁོ་ལ་འཕྲད་འདོད་ཀྱི་འདུན་པ་འགོག་མེད་ཅིག་སྐྱེས།

ངའི་ཁྲ་ལ་སྒོར་བའི་རེ་སྒུག་གི་འདྲེན་བྱེད་ཟུང་གཅིག་བརྟག་དཔྱད་ཁང་གི་སྒོ་མོ་ལ་ཡུད་ཙམ་ཟུག་སོང་། འོན་ཀྱང་། འཁྱུག་ཙམ་ནས་གདོང་གི་ཆ་ཤས་མི་སྡུག་གཉེར་མས་ཡོངས་སུ་ཁེབས་ཤིང་།མགོ་བོ་ལ་སྤུ་ཉག་སྤར་གང་ཡང་འཛིན་རྒྱུ་མི་རྙེད་པའི་མི་ཀླད་དམར་ཞིག་ཏུ་འདུག་པས། འཕྲད་མ་ཐག་ཏུ་ངའི་དགའ་སྣང་གི་ཤས་ཙམ་འཇའ་ལྟར་ཡལ་ཏེ།མི་འདི་ངའི་སློབ་གྲོགས་དེ་མ་རེད་སྙམ་པ་བྱུང་།

དེ་ནས་ཁོས་ངའི་དུང་གི་སོ་ཕྲེང་ལ་བརྟག་དཔྱད་བྱེད་པའི་ཚེ་ན།ངས་རང་ཉིད་འགྲིམ་མྱོང་བའི་སློབ་གྲྭ་གླེངས་ཤིང་།ཁོ་ལའང་སློབ་གྲྭ་དེར་ཆ་རྒྱུས་ཡོད་མེད་དྲིས་པ་ན།

ཁོ་ན་རེ།ང་ཡང་སློབ་གྲྭ་དེའི་མཐར་ཕྱིན་སློབ་མ་ཡིན་ཟེར།ངས་ཁོ་ལ་ཁྱོད་ནམ་མཐར་ཕྱིན་སོང་ངམ་ཞེས་དྲིས་པར།

ཁོ་ན་རེ། སྤྱི་ཕྱི་ལོ་ཆིག་སྟོང་དགུ་བརྒྱ་གྱ་བཞི་ལ་ཟེར།

ང་རང་ཧ་ལས་ནས་མགྲིན་པ་གཟེངས་བསྟོད་དེ།

ཨ་ལ་ལ། ང་ཚོ་འཛིན་གྲྭ་གཅིག་གི་རེད་ཅེས་བྱས་པ་ན།

ཁོས་གཟབ་ནན་གྱིས་ང་ལ་ལྟ་བཞིན།

ཁྱེད་རང་བསླབ་བྱ་ག་རེ་འཁྲིད་མཁན་ཡིན་ནམ་ཟེར།