འཆར་ཡན་འཇའ་སྤྲིན་འཐབ་པའི་ཇག་ལམ་ནས། །

ཚོར་རྟོག་ཁྲག་གི་རླབས་རིས་ཕབ་པའི་རྗེས། །

ལས་ཉོན་དུག་ལྕེ་གཡོ་བའི་ཤོག་སྣེ་རུ། །

སེམས་ཀྱི་བུ་ག་རྡོལ་བའི་དཀྱིལ་ནས་ཐོར། །

རྣམ་ཤེས་འཇག་མ་སྐྱ་བོའི་ངུ་སྐད་ཀྱིས། །

ཚོར་བའི་དར་ལྕོག་ཁྲ་བོ་གཡོས་པ་ན། །

བྲག་ཆ་ལྟ་བུའི་སྙན་ངག་ལྷ་མོ་ཞིག །

ཀུན་གཞིའི་ན་བུན་འཁྲིགས་པའི་མཐིལ་ནས་བཞེངས། །

ཀུན་རྟོག་དྲི་བཞོན་བུ་མོའི་རོལ་དབྱངས་ཀྱིས། །

སྣང་བ་དགའ་སྐྱོའི་སེམས་ཁ་རྩིས་པ་ན། །

ངུ་དགོད་འཐབ་མོ་བྱེད་པའི་རྣམ་ཤེས་ཀྱིས། །

ཚོར་འགྱུའི་སྙན་ངག་ཆང་ཕོར་ཁ་རུ་སྐྱོན། །

བསླུ་བྲིད་འདྲེ་མོའི་སྐྲ་ལོ་རབ་ཟིང་པའི། །

འདོད་ཡོན་སྲིན་འབུའི་ཁ་ཆུའི་གཟེབ་ནང་ནས། །

ཧམ་སེམས་ཁྲག་གིས་མྱོས་པའི་ཚོགས་དྲུག་ལ། །

ཞེ་བློ་ཚིམ་པའི་ཆོག་ཤེས་མི་འདུག་གོ། །

སྔོན་བསགས་ལས་ཀྱི་གཤིན་རྗེ་རབ་ཁྲོས་ཏེ། །

ཁེར་རྐྱང་མི་ཡུལ་ཉུལ་བའི་སྙན་ངག་པས། །

སྙིང་གི་གྲོགས་ལ་བླངས་པའི་སེམས་གཞས་དེ། །

གཅིག་པུའི་རྣ་བར་བྲག་ཆ་བཞིན་དུ་འཁོར། །

འཁོར་བའི་ཉིན་སྲིབ་འདི་ཡི་འགྲམ་ངོས་ནས། །

ལས་ཀྱི་རླུང་ནག་རྒྱུ་བའི་རྗེས་དེད་དེ། །

སྲིད་གསུམ་སྒྱུ་མའི་ཐང་ཆེན་ཀུན་ཉུལ་ཡང་། །

ད་ལྟའི་བརྗོད་བྱ་ཙམ་ལས་ཅི་ཞིག་མཆིས། །

མ་རིག་གདོན་འདྲེ་ནག་པོས་བརླབས་པ་ན། །

ཆགས་སྡང་འཐབ་རྩོད་བྱེད་པའི་གཡུལ་ས་རུ། །

འཇིགས་ཤིང་སྨྲེ་སྔགས་འཐེན་པའི་རྣམ་ཤེས་ཀྱིས། །

དམྱལ་བའི་གྲོང་ཁྱེར་ཆེན་པོ་བཞེངས་ནས་འདུག །

སྤྲོས་འཛིན་ཀུན་རྟོག་སྤྲས་པའི་བུ་ཆུང་གིས། །

འདོད་པའི་མཛའ་གཞས་ལེན་པའི་སྐྱིད་སྙམ་དེ། །

ངུ་འབོད་སྤྲིན་དམར་ལྡང་མའི་བར་དོ་རུ། །

སེམས་རྩ་གཞས་ལ་འཁོར་བཞིན་གནས་འདུག་གམ། །

རྟོག་པའི་འཐོར་རླུང་རྒྱུ་བའི་རྗེས་ཉུལ་ཏེ། །

བག་མེད་འདྲེ་མོའི་གར་སྟབས་མ་མཛད་རོགས། །

ལས་ཀྱི་གཤིན་རྗེ་ཁྲོས་པའི་ངར་སྐད་དེ། །

སྒྱུ་མའི་བྲག་ཆ་ཇི་བཞིན་རང་ལ་འཁོར།།

སྣང་བའི་ཝ་མོ་བརྒྱལ་བའི་རི་ངོས་སུ། །

ངན་རྟོག་རྒད་པོ་དགོད་པའི་འཛུམ་རིས་ལས། །

ཚིག་གི་རྨིག་རྡུལ་འཚུབ་ལ་མཐའ་མེད་ཀྱང་། །

སྙུ་གུའི་རྒྱུད་མངས་དཀྲོལ་ལ་ལྕི་བར་དོགས། །