གངས་དཀར་གྱི་འཇིག་རྟེན།(2)
ཕག་མོ་དོན་གྲུབ་ཀྱིས། 2011-07-21
གངས་དཀར་གྱི་འཇིག་རྟེན་། ཁྱེད་ནི་ཞི་བདེ་ལྷིང་འཇགས་ཀྱི་ཡུལ་གྲུ་ཞིག་སྟེ། ཁྱེད་ལ་ཕྱི་རོལ་ཏུ་བལྟ་བའི་མིག་ཟུང་མེད་ལ། ཟླ་བའི་གོ་ལར་བསྐྱོད་པའི་རྫུ་འཕྲུལ་ཡང་མེད། ལོ་རྒྱུས་ཀྱི་འཁོར་ལོས་བདེན་དཔང་བྱས་པ་ལྟར། དེ་ནི་ཆེས་གདོད་མའི་འཇིག་རྟེན་ཞིག་རེད།
རྨ་ཆུ་དང་འབྲི་ཆུ། ལོ་རྒྱུས་ཀྱི་བདེན་པ་དབྱངས་སུ་གྱེར་བའི་ལྐོག་གྱུར་གྱི་ལྷ་སྒྲུང་རིང་མོ། ནམ་རྒྱུན་བྱུང་བརྗོད་ཀྱི་སྙན་ཚིག་ཚན་པ་གཅིག་དབྱངས་སུ་གྱེར་ཏེ་བདེ་སྡུག་གི་འཚོ་བའི་སྐྱུར་ཁ་གླེང་། གནས་དེ་རུ། མིག་ཆུའི་བྱུང་བ་ཡོད། ཟུངས་ཁྲག་གི་ཤུལ་རྗེས་ཡོད།
གངས་དཀར་གྱི་འཇིག་རྟེན། ངའི་ཕ་ས་ཡིན་ལ། ཁ་བ་དཀར་པོས་ང་ལ་མིག་འབྲས་བྱིན་པ་ནས་བཟུང་། ངས་འཚོལ་སྙེག་གི་འདུན་པས་ཉིན་བྱེད་ཀྱི་བདེ་དྲོད་བཙལ་ཞིང་ཕུགས་འདུན་གྱི་དབྱངས་རྟས་མ་ཡུམ་གྱི་བརྩེ་བ་བཙལ།
གངས་རིའི་ཚོགས་ཀྱིས་རེ་སྨོན་གྱི་མིག་ཟུང་གྲངས་མེད་འཚེར་ཞིང་། ཁ་བའི་མེ་ཏོག་གིས་རང་བྱུང་གི་འབོད་སྐུལ་བསྒྲགས་བྱུང་། ངས་ལག་ཟུང་གི་སྙིམ་པ་མཐོ་རུ་བཏེགས་ཏེ་མིག་ཆུ་མོད་པའི་ལོ་ཟླ་དེའི་སྐྱུར་ཁ་གླེང་བཞིན། ལོ་རྒྱུས་ཀྱི་དེབ་ཐེར་ངོས་སུ་སྨྲེང་སྐྱོའི་གཏམ་རྒྱུད་གསར་པ་བྲིས།
གངས་དཀར་གྱི་འཇིག་རྟེན། གདོད་མའི་ལྷ་སྒྲུང་དང་གབ་ཚིག་གི་ཀློང་དུ། ངའི་བྱུང་འདས་ཀྱི་རྨི་ལམ་ཡོད་ལ། འཚོ་བ་གསར་པའི་རེ་འདུན་ཡང་ཡོད།
ལོ་རྒྱུས་ཀྱི་འཁོར་ལོ་མུ་མཐུད་དུ་མདུན་ཕྱོགས་སུ་སྐྱོད་བཞིན་མཆིས། དེང་འདིར། གངས་རིའི་ཁུགས་པ་མང་པོ་ན། སྨྲེང་སྐྱོའི་གཏམ་རྒྱུད་གྲངས་མེད་ཅིག དུས་རབས་ཀྱི་གོམ་སྒྲས་རྒྱང་རིང་གི་ཕྱོགས་སུ་ཁྱེར། ལོ་རྒྱུས་ཀྱི་ཆར་རླུང་དྲག་པོའི་ཁྲོད་དུ། ཁ་བའི་མེ་ཏོག་གི་འཕུར་བསྐྱོད་དམ། མེ་ཏོག་གངས་ལྷའི་སྲད་བུར་བརྒྱུས་པའི་སེམས་པ་དམར་པོ་དེ་ནམ་ཡང་འཇགས་མི་སྲིད་དོ།།