ང་ཚོའི་གྲོང་པའི་ནང་སངས་རྒྱས་བརྩིས་པའི་ཁྱིམ་ཚང་བཅུ་ཡོད།སྔར་ཡིན་ན་གྲོང་པའི་ནང་དུ་འགྲིམ་འགྲུལ་ཉུང་བས་ཁུ་སིམ་པོར་མཆིས།ཆ་མེད་ཀྱི་ལམ་འགྲུལ་བ་ཞིག་མཐོང་ན་རྐུ་མ་ཞིག་དང་ཇག་པ་ཞིག་གི་རྣམ་པར་འཁྲུལ་ནས་གྲོང་མི་ཚང་མ་ཐེ་ཚོམ་གྱི་དྲྭ་རྒྱར་ཚུད་དེ་དོགས་པ་ལངས།དེང་སང་གྲོང་པ་འདིར་རླངས་འཁོར་ཁེར་རྐྱང་བགྲོད་པའི་གཞུང་ལམ་ཀྱག་ཀྱོག་ཕྲ་མོ་ཞིག་ལས་མེད་ཀྱང་།འཇེབ་འཁོར་དང་འཕྲུལ་རྟ་འགའ་རེ་ཚོད་མེད་ཡོང་འདུགཡིན་ནའང་འདི་ལྟ་བུའི་འགྲིམ་འགྲུལ་མང་པོ་ཞིག་སུ་ཚང་ལ་སྐྱོད་པ་ཡིན་དང་།ང་རང་ལོ་བཅོ་ལྔའི་རིང་ཕ་ཡུལ་དུ་མ་ལོག་ཚུན་ཁྱིམ་ཚང་རྣམས་ལ་འགྱུར་ལྡོག་གི་རྣམ་པ་དང་།འཕེལ་རྒྱས་ཀྱི་ཁྱད་ཆོས་ཇི་ལྟར་ཕྱིན་ཡོད་པ་སྙམ་པའི་ཀུན་སློང་གིས་ལུས་ཁྱིམ་ལ་བསྡད་ཀྱང་སེམས་ཕྱི་རོལ་གྱི་རྣམ་པར་གཡོ་ཕྱིར་ཚ་བོ་ཚེ་རིང་ཁྲིད་དེ་ཁང་པའི་ཐོག་ཁར་འཛེགས་ནས་སོ་སྲུང་བཞིན་མིག་གིས་གྲོང་སྡེ་དང་།རྒྱང་རིང་གི་ཡུལ་ལྗོངས་ཀྱི་རྣམ་པར་ཅེར་ཏེ་བསྡད་པ་ཡིན།     སྐབས་དེར་གྲོང་པའི་འདབས་ནས་འཇེབ་འཁོར་ཞིག་ཐལ་འཚུབ་འཕྱུར་ལེར་དང་མཉམ་དུ་སངས་རྒྱས་ཚང་གི་ཁང་པའི་ཕྱོགས་སུ་སྐྱོད་པར་མཐོང་།ངས་ཚ་བོ་ཚེ་རིང་ལ་སངས་རྒྱས་ཚང་གིས་འཇེབ་འཁོར་སོ་མ་ཞིག་ཉོས་མི་འདུག་གམ་ཞེས་དྲིས་པར།ཚ་བོ་ཚེ་རིང་གིས“ཧེ་ཧེ”ཞེས་ཅུང་ཟད་ཁོང་འཛུམ་འཆོར་ནས་བགོད་དེ་འདྲི་བ་དེའི་ལན་མི་འདེབས་པར་སངས་རྒྱས་ཚང་གི་གནས་ཚུལ་ཏེ“ཨ་ཕ་སངས་རྒྱས་ཚང་ནི་གྲོང་ཡོངས་ཀྱི་དབུལ་ཕོངས་གྲས་སུ་ཡིན་པས་རྒྱལ་ཁབ་ཀྱི་གསོལ་རས་ལ་ལྟ་བ་ལས་ཅང་མི་ནུས།ཁོར་བུ་ཕྲུག་གཉིས་ཡོད་ཀྱང་ཆང་དང་དུ་བ་ལ་དགའ་ཞིང་ཟ་མ་ཅུང་ཟད་ཀྱི་དོན་དུ་ཁྱིམ་མཚེས་འགའ་རེའི་ལག་གཡོག་རྒྱུགས་ནས་འཚོ་ཐབས་བརྩོན་པ་ལས།ཨ་ཕ་སངས་རྒྱས་རྒ་རྒན་གཉིས་ལ་ཕན་ཐོགས་མེད་སྟབས།ཨ་ཕ་སངས་རྒྱས་ཀྱིས་མོ་འདེབས་ནས་འཚོ་ཐབས་བྱེད་བཞིན་ཡོད”ཅེས་གྲོང་མི་ཡོངས་ཀྱིས་ཁ་གཤིས་ལྟ་བུའི་ཚེག་དེ་ཚ་བོ་ཚེ་རིང་གིས་མདོར་བསྡུས་ནས་བློ་འཛིན་བཞིན་དུ་ངག་ནས་ཆུ་བཞུར་བ་ལྟར་བཟློས་སྐྱོར་བྱས་བྱུང་།ངས“འོ་ན་འཇེབ་འཁོར་འདི”ཞེས་ཚིག་གི་མཇུག་སྣེ་མ་སྐྱོང་དུས།ཚ་བོ་ཚེ་རིང་གིས“ཨ་ཕ།སངས་རྒྱས་སར་མོ་འདེབས་མཁན་གྱི་ཡིན་ངེས་རེད”ཅེས་རྒྱུན་ལྡན་གྱི་རྣམ་པར་ལྟར་ཚོད་བཤད་བྱས།ད་དུང་ཤ་ཚ་བའི་མཛུབ་མོ་ཕྲ་བོ་དེ་བསྲིངས་ནས་བདེན་རྟགས་ཀྱི་ཆེད་དུ་འཕྲུལ་རྟ་ཞོན་པ་ཞིག་ཀྱང་དེའི་རྒྱབ་ཏུ་ཡོང་བ་སྟོན་མོད།འོན་ཀྱང་ངའི་སེམས་ནི་ཚ་བོ་ཚེ་རིང་གི་མཛུབ་མོའི་ཕྱོགས་སུ་མ་བསྙེགས་པར།གློ་བུར་དུ་སངས་རྒྱས་ན་ཆུང་དུས་སྐབས་ཀྱི་འདས་དོན་རྣམས་ཡིད་ལ་ཝར་གྱིས་དྲན།
     ཨ་ཙེ།སངས་རྒྱས་ནི་ང་དང་ན་མཉམ་ཡིན་ལ་བྱིས་པའི་རྩེ་རར་འགྲིམ་པའི་རྩེ་གྲོགས་ཀྱང་ཡིན།སངས་རྒྱས་ཆ་རྒྱུས་ནི་ང་ལ་ལོས་ཡོད་སྙམ་པའི་དྲེགས་པས་ཁེངས།གཟུགས་བཪྙན་མུ་འབྲེལ་གློག་བཪྙན་བཞིན་མིག་སྔར་རིམ་གྱིས་འཆར་བས་ཡིད་ལ་ཁོང་ཁྲོ་ཞིག་ཀྱང་ལངས།སངས་རྒྱས་ནི་ཁ་བཤད་དོན་ལ་མི་གནས་པའི་རྫུན་རྐྱལ་ཅིག་ཡིན།ཁོས་ནམ་རྒྱུན་རྫུན་བཤད་པས་ང་རང་ཡང་ཐེངས་མང་གཡོ་འོག་ཏུ་ལྷུང་ནས་ཉེས་ཙག་ཙིག་ཁུར་མྱོང་།ཡིན་ན་ཡང“སངས་རྒྱས་ཀྱིས་རྫུན་བཤད་རེད་”ཅེས་ལབ་ན་རོགས་པ་ཐམས་ཅད་ཡིད་ཆེས།སངས་རྒྱས་ཁོ་རང་གི་སྔོན་དུ་དེ་བཞིན་ལབ་ནའང་ངོ་ཚ་བ་ཅི་མེད་ཅིང་ངོ་འཛུམ་ཙམ་བྱས་ཏེ་ཕྱོགས་སུ་བྱོལ་འགྲོ་བ་དང་།བྱ་བ་བྱེད་པའང་མི་ལུགས་གོལྡོག་ཅིག་ཡིན་ཟེར་ཆོག་མོད།འོན་ཀྱང་ཆོས་གཞུང་དུ“གང་ཟག་ལ་གང་ཟག་གིས་ཚད་མི་ཐུབ”ཅེས་པའི་དཔེ་ཇི་བཞིན་སངས་རྒྱས་ནི་མི་ཚོས་བཀུར་ནས་ལེགས་ཉེས་འབྱེད་པའི་མཁྱེན་པ་དང་།མངོན་ཤེས་ཅན་གྱི་སྐྱེས་བུར་བགྲངས་ཞིང་།འདི་ལྟར་ས་ཐག་རིང་ཐུང་དང་ལམ་བརྒྱུད་ཕྲ་སྦོམ་ལ་མ་བལྟས་པས།སངས་རྒྱས་ཀྱི་འཐོར་ལ་ཉེ་བའི་སོ་ཕྲེང་དང་།སེར་གས་ཁེངས་པའི་མཆུ་སྒྲོས་བར་ནས་བྱུང་བའི་མ་འོངས་ལུང་བསྟན་དེ་རྩ་ཆེན་གྱི་གདམས་ངག་ལ་འཁྲུལ་མེད་བསྒོམས་པ་ནི་བུང་བ་མེ་ཏོག་ཚལ་ལ་འདུས་པ་བཞིན་ཉིན་མཚན་ལྟོས་མེད་དུ་བྱུང་སྔར་ཤཱཀྱ་ཐུབ་པས་ཀྱང་འདི་ལྟར་མང་པོ་གཟིགས་ནས་གསུངས་པ་མ་ཡིན་ནམ་སྙམ་པ་དང་།ཡང་སངས་རྒྱས་ལ་ཁོང་ཁྲོ་ཞི་ནས་ཁོ་ལ་རེ་བ་བཅོལ་བའི་མི་རྣམས་ཀྱི་དོན་དུ་སེམས་ཁྲལ་རེའང་བྱེད་པ་ནི།སངས་རྒྱས་འདི་ལོ་ན་བཞི་ཅུ་ལྷག་ཙམ་ལས་མ་སོན་ཀྱང་ལུས་ལ་ན་ཆུང་དུས་ནས་ནད་ཀྱིས་གདུང་བའི་ཟོ་མི་བདེ་བ་ཞིག་ཡིན་པས།འདི་འཆི་སོང་ན་ས་འདིའི་ཡུལ་མི་རྣམས་ཀྱི་ཀླད་པ་དང་བསམ་བློ་ནི་འདྲ་བ་ཡིན་ཏེ།གལ་ཏེ་སངས་རྒྱས་ལྟ་བུའི་མི་ཞིག་དང་མ་འཕྲད་ན་དེ་དག་གིས་མ་འོངས་པར་བྱ་བ་ལེགས་ཉེས་ཇི་ལྟར་འབྱེད།ཁོ་ཚོར་ཀླད་པ་དང་བསམ་བློ་མཆིས་ནའང་བྱ་བ་ལེགས་ཉེས་འབྱེད་དུས་རྟོག་དཔྱོད་མི་བྱ་བར་བེད་སྤྱོད་བྲལ་བའི་དབང་བོ་ཞིག་ཏུ་བཏང་ནས།མེས་པོ་དང་མེས་མོའི་སྲོལ་རྒྱུན་དམ་འཛིན་གནང་སྟེ་སངས་རྒྱས་ལྟ་བུའི་མི་ཞིག་ནི་ངེས་པར་འཚོལ་བ་རེད་སྙམ་པའི་ཡིད་བློང་བློང་པོའི་སྐབས་དེར།ཚ་བོ་ཚེ་རིང་གིས་སྐད་གསང་ཕྲ་མོས“འུ་གཉིས་འགྲོའམ”ཞེས་ལག་ཆུང་གྲང་བསིལ་བསིལ་གྱིས་ངའི་ལག་མགོར་འཛིན་པས།ད་གཟོད་ང་ཡི་དགོས་མེད་ཀྱི་བསམ་བློ་ཉི་ཚེ་བ་དེ་རེ་ཞིག་ཞི་འཇམ་དུ་གྱུར་ཏོ།།