དེ་འདྲའི་ལས་བྱེད་པ་ཡོད།ལས་བྱེད་པ་དེ་ཚོས་རང་རང་སྒྱུར་བཀོད་བཟང་བོ་བཏང་ན་བཟང་།སྒྱུར་བཀོད་ཀྱི་ཐོག་ནས་ཀྱང་ད་རུང་བསམ་པ་སྒྱུར་བཀོད་མ་བཏང་ན་འདེམ་བསྐོ་སྒྲུབ་དགོས་ནི་མ་རེད།དེ་རེད།དེ་ལས་བྱེད་པ་ཡི་སྐོར་རེད།ད་འདི་ན་མི་རིགས་མང་བོ་ཡོད་པ་རེད།གཙོ་ཆེ་ཤོས་བོད་རིགས་རེད།དེའི་རྗེས་ཧོས་རིགས།རྒྱ་རིགས་བཅས་ཡོད།ཁྱོད་ཚོ་མི་རིགས་ཚང་མ་ཡི་འབྲེལ་བ་དེ་འདྲ་ཞིག་རེད།ཁྱོད་ཚོ་ཚང་མས།ངའི་རེ་བ་ལ་མི་རིགས་ཚང་མ་འགྲིག་མཐུན་བྱོས།གནད་དོན་ཡོད་ན་རིམ་གྱིས་ཐག་བཅད་ན་ཆོག་པ་རེད།བོད་རིགས་ཡིན་ནའང་རྒྱ་རིགས་དང་ཧོས་རིགས་ལ་ཕར་ལ་མཐུན་པོ་བྱོས།རྒྱ་རིགས་དང་ཧོས་རིགས་ལ་ཕར་ལ་མཐུན་པོ་བྱོས།རྒྱ་རིགས་དང་ཧོས་རིགས་ཀྱིས་ཀྱང་ང་ཚོ་བོད་རིགས་ལ་ཚུར་ལ་མཐུན་པོ་བྱོས།མི་རིགས་སུ་ཡིན་རུང་གཅིག་གཅིག་ལ་ཐུབ་ཚོད་བཏང་ན་མི་ཆོག ཚང་མ་འགྲིག་མཐུན་བྱོས།རང་རང་ཚང་མ་ལོག་ནས་ཐོན་སྐྱེད་བྱོས།ཁྱོད་ཚོས་ཐོན་སྐྱེད་བཟང་བོ་བྱོས།འཚོ་བ་གོང་འཕེལ་ལ་གཏོང་དགོས་པ་རེད།བཅིངས་འགྲོལ་བཏང་བ་ནས་ད་བར་དུ་མི་དམངས་ཀྱི་འཚོ་བ་ས་ཆ་ལ་ལ་ནས་ཅུང་ཙམ་ཇེ་དགའ་རུ་སོང་ཡོད་པ་རེད།ལ་ལ་ད་རུང་ཇེ་དགའ་རུ་སོང་མེད་པ་རེད།གསར་བརྗེ་བྱེད་དགོས་དོན་ནི་ཐོན་སྐྱེད་ཡར་རྒྱས་སུ་གཏོང་རྒྱུའི་དོན་ཡིན།
ཐོན་སྐྱེད་ཡར་རྒྱས་ལ་གཏོང་དགོས་དོན་གྱི་རྒྱུ་མཚན་ཅི་རེད་ཟེར་ན།མི་དམངས་ཀྱི་འཚོ་བ།རིག་གནས་འཚོ་བ་ལ་སོགས་པ་ཡར་རྒྱས་ལ་གཏོང་རྒྱུ་དེ་རེད།དེའི་རྐྱེན་གྱིས་ཚང་མས་ཐོན་སྐྱེད་བཟང་བོ་བྱོས།འཚོ་བ་ཡར་རྒྱས་ལ་གཏོང་བ་དང་།འཚོ་བ་ཡར་རྒྱས་ལ་བཏང་བའི་རྨང་གཞིའི་ཐོག་ནས་སྤྱི་ཚོགས་རིང་ལུགས་ཀྱི་དེང་རབས་ཅན་བཞིའི་འཛུགས་སྐྲུན་ལ་ལེགས་སྐྱེས་འབུལ་དགོས།ཆོས་དད་རང་མོས་ཀྱི་སྐོར་ལ་ངས་བཤད་ན་ཡང་ཏང་གི་ཆོས་དད་རང་མོས་ཀྱི་སྲིད་ཇུས་ནི་ནམ་ཡང་འགྱུར་བ་མེད་པ་ཞིག་རེད།མི་དམངས་ནང་ན་ཆོས་ལ་དད་པ་བཅའ་ནི་ཡོད་ན།དེ་ནམ་ཡིན་ན་འགྱུར་རྒྱུ་མ་རེད།དེའི་རྐྱེན་གྱིས་ཕྱིན་ཆད་ཆོས་དད་བཅའ་རྒྱུ་ལ་སྐྲག་མི་དགོས།རང་རང་ཆོས་ལ་དད་པ་ཡོད་ན་ཆོས་བཅོས་ན་ཆོག ལས་བྱེད་པས་དེ་ལ་བཀག་འགོག་བཅའ་མི་ཆོག བཀག་འགོག་བྱས་ན་ཏང་གི་སྲིད་ཇུས་དང་འགལ་ནི་རེད།རྒྱལ་ཁབ་ཀྱི་ཁྲིམས་ལུགས་དང་འགལ་ནི་རེད།མི་དམངས་ལ་ཆོས་དད་རང་མོས་ཀྱི་སྲིད་ཇུས་དེ་ང་ཚོའི་རྩ་ཁྲིམས་ཀྱི་ནང་ན་གཏན་ལ་ཕབ་ཡོད་པར་མ་ཟད།ཉེས་སྤྱོད་ཁྲིམས་གཅོད་ཀྱི་ནང་ན་ཡང་།ཆོས་དད་རང་མོས་དང་མི་རིགས་ཀྱི་གོམས་གཤིས་གཏོར་སྐྱོན།བཀག་འགོག་བཅའ་མཁན་ཡོད་ན།དེ་ལ་ཁྲིམས་གཅོད་བཅའ་རྒྱུ་ཟེར་བའི་ཡི་གེ་གསལ་བོར་བཀོད་ཡོད་ནི་རེད།ལས་བྱེད་པ་ཚང་མས་ཆེས་སྣོག་གང་སྣོག ང་བརྒྱད་དང་རིག་གནས་གསར་བརྗེ་ཆེན་པོའི་སྐབས་ཀྱི་བཅའ་ཚུལ་ན་གེ་ནོག་གེ་དེ་བཅའ་མི་ཆོག་པ་རེད།ཆོས་ལ་དད་པ་བཅོས་ན་ཡང་རང་དབང་རེད།ཆོས་ལ་དད་པ་མི་བཅའ་ན་ཡང་རང་དབང་རེད།ཆོས་ལ་དད་པ་ཡོད་མཁན་གྱིས་ཆོས་ལ་དད་པ་མེད་པ་ཚོའི་ཁེ་དབང་ལ་བརྩི་འཇོག་བྱེད་དགོས་ནི་རེད།ཆོས་ལ་དད་པ་མེད་མཁན་ཚོས་ཆོས་ལ་དད་པ་ཡོད་མཁན་གྱི་ཁེ་དབང་དེ་ལ་བརྩི་འཇོག་བྱེད་དགོས་པ་རེད།མི་སུ་དང་སུ་ཡིན་ན་ཡང་བཙན་པོ་བྱས་ནས་ཆོས་ལ་དད་པ་བཅའ་རུ་འཇུག་རྒྱུའི་དབང་ཆ་ཡང་མེད་ལ།ཆོས་ལ་དད་པ་མི་བཅའ་བར་འཇུག་རྒྱུའི་དབང་ཆ་ཡང་མེད།དགོན་པ་ཚོ་ཡིན་ན་ཡང་མང་ཚོགས་ལ་དགོས་མཁོ་ཡོད་ན།སྒོ་ཕྱེ་ན་ཆོག་རྒྱུ་རེད།སྔོན་ཆད་འདི་ནས་དགོན་པ་འགའ་ཞིག་གི་སྒོ་ཕྱེ་ནི་རེད།ད་རུང་དགོན་པ་སྒོ་བ་ཕྱེ་བ་ཡོད་ནི་རེད།དགོན་པ་ཚང་མ་ཡང་མང་ཚོགས་ཀྱི་ཆོས་དགེ་ལ་དགོས་མཁོ་ཡོད་ན།རང་རང་ལ་ཆ་རྐྱེན་འཛོམས་ན།དགོན་པ་ཚོའི་སྒོ་ཕྱེ་ན་ཆོག་ནི་རེད།ཡིན་ན་ཡང་།དགོན་པ་སྒོ་ཕྱེ་རྒྱུ་ལ་སྲིད་ཇུས་ཀྱི་ཐོག་ནས་བཤད་ན་དགོན་པའི་ནང་ལ་བཞུགས་པ་ཚང་མས་ཆོས་བཞིན་འདུལ་བ་བཞིན་གནང་ན་བཟང་གི།དགོན་པ་གྲངས་ཀ་མང་རྒྱུ།གྲྭ་པ་མང་རྒྱུ་དེ་གཙོ་བོ་ཞིག་མ་རེད།ང་བརྒྱད་ལོ་ལ་ཁྱོད་ཚོ་ཚང་མས་ཤེས།གྲྭ་པའི་ནང་ནས་བསྟན་བཤིག་འགའ་རེ་བུད་ནས་ཚང་མར་སྡུག་ནག་པོ་བཏང་བ་ཁྱོད་ཚོ་ཚང་མས་ཤེས་པ་རེད།གྲྭ་པ་མང་རྒྱུ་དེ་གཙོ་བོ་ཞིག་མ་རེད།གྲྭ་པའི་ནང་ནས་གྲྭ་པ་ཚང་མ་གཙང་མ།སངས་རྒྱས་ཀྱི་ཆོས་ལ་དད་པ་ཡོད་པ།ཆོས་བཞིན་འདུལ་བ་བཞིན་བཅའ་བ།དེ་འདྲ་བཅའ་དགོས་པ་མ་གཏོགས།དེང་སྐབས་དགོན་པ་འདི་ན་གྲྭ་པ་བརྒྱ་ཡོད།འདི་ན་བཞི་བརྒྱ་ཡོད།འདི་ན་སྟོང་གཉིས་ཡོད།སྟོང་ཚོ་སྟོང་ཚོ་རུ་ཡོད་ཀྱང་།འདིའི་ནང་ནས་ཆོས་བཞིན་འདུལ་བ་བཞིན་ལོངས་པ་ཅི་ཙམ་ཞིག་ཡོད།དག་དོན་དག་རེ་རེ་མགོ་ལ་ཡོད་དུས་དེའི་ནང་ནས་བསྟན་བཤིག་འགའ་རེ་བུད་ནས་ཚང་མ་ལ་སྡུག་ཆེན་པོ་བཏང་།དེ་འདྲ་ཡིན་ན།གྲྭ་པ་རྗེས་སུ་འཚོགས་དུས།དགོན་པ་སྒོ་ཕྱེ་ན་ཏང་གི་སྲིད་ཇུས་ལ་ཆོག་ནི་རེད།ཡིན་ན་ཡང་།རང་རང་གི་གྲྭ་པ་ཡར་ལ་འཇུག་དུས་བསམ་བློ་བཟང་བོ་ཐོངས།ནང་ལ་ན་གེ་ནོག་གེ་མང་བོ་བཅུག་ན།དེས་མགོ་ལ་དོན་དག་ལས།དེ་དོན་དག་གཅིག་རེད།དོན་དག་གཉིས་པ་ལ།ཚང་མས་སངས་རྒྱས་ཀྱིས་ཇི་ལྟར་གསུངས་པའི་ཆོས་བཟང་བོ་ཞིག་བཏོན་ན།མི་དམངས་ཀྱིས་ཀྱང་དད་པ་བཅའ་རྒྱུ་རེད།རྒྱལ་ཁབ་ཀྱིས་ཀྱང་སྲུང་སྐྱོབ་བྱེད་རྒྱུ་རེད།ཆོས་དད་རང་མོས་ལ་ཡང་ཕན་རྒྱུ་རེད།ད་དེ་མ་བྱས་པར་དགོན་པ་ནང་ནས་ཚོང་བརྒྱབ།མི་དམངས་ལ་མགོ་སྐོར་བཏང་།ནོམ་པ་ལ་ཧེབ་ཆེན་ལངས།རྫུན་བཤད།མོ་བརྒྱབ།ལྷ་བབས།རྫུན་བཤད་ནས།ངས་འདྲེ་མ་རིག་ནའང་འདྲ་རིག་སོང་།ལྷ་རིག་སོང་།ཁྱོད་ཀྱི་གམ་ན་གཅིག་གིས་གནོད་ཀྱི་ཡོད།ཁྱོད་ཀྱི་གམ་ན་ཅིག་ཡོད་ཟེར་བ་དེ་འདྲའི་མོ་བ་ལབ་རྒྱག དེ་འདྲའི་རྫུན་བཤད་མ་བྱེད།དེ་འདྲ་བྱས་ན་མི་འགའ་རེ་ཡིས་ཆོས་ནོམ་པ་བསྒྲིག་རྒྱུའི་དོན་རེད།དེའི་དོན་ལ་ཆོས་ཕན་འཇོག་བཏང་ནས།སྤྱི་ཚོགས་ཀྱི་བདེ་འཇགས་དཀྲུགས།ཐོན་སྐྱེད་ལ་གཏོར་བཤིག་བཏང་།གསར་བརྗེ་ངོ་རྒོལ་གྱི་སྒྲོག་གཏམ་སྤེལ།ད་ཅི་ཅིག་ལ་གནམ་ཡིག་བབས་ཐལ།ད་ཅི་ཅིག་གིས་ལུང་བསྟན་བབས་ཐལ།གུང་ཁྲན་ཏང་ཚར་ལ་ཡོད་ཀི།ད་ཅི་ཞིག་བཅའ་རྒྱུ་རེད།དེ་བྱས་ན།དེ་ཚོ་ཚང་མ་ཆོས་མ་རེད།དེ་ཚོ་ཚང་མ་གསར་བརྗེ་ངོ་ལོག་གི་བྱ་བ་རེད།སྤྱི་ཚོགས་གཏོར་བཤིག་གི་བྱ་བ་རེད།དེ་དང་ཆོས་གཉིས་བསྲེས་ན།ཆོས་ལ་ཡང་གནོད་པར་མ་ཟད།དེ་ལྟར་སྒྲུབ་མཁན་ཁྲིམས་ལ་སྦྱོར་ནི་རེད།དེའི་རྐྱེན་གྱིས།ད་འདི་ན་གྲྭ་པ་དང་སྔགས་པ་མང་བོ་ཡོད་ཀི དེ་ཚོ་ཚང་མས་ཆོས་བཅའ་ཆོས་བཤད།མི་སྣ་ཚང་མས་དོན་དག་འདི་དག་སེམས་ཆུང་བྱོས།སངས་རྒྱས་ཀྱིས་ཇི་ལྟར་གསུངས་པ་ནང་བཞིན་གྱིས་ཕར་སོང་ལ་ཁྱོད་ཚོ་སྐྲག་ས་དོགས་ས་གཅིག་ཀྱང་མེད།མང་ཚོགས་ཀྱིས་ཁྱོད་བཟང་གི་ཟེར་ནས་དད་པ་བཅའ་རྒྱུ་རེད།རྒྱལ་ཁབ་ཀྱིས་ཀྱང་ཁྱོད་ཚོ་ཚང་མས་རྒྱལ་ཁབ་ལ་གཅེས་པས་བཟང་གི་ཟེར་རྒྱུ་རེད།འུ་ཚོ་སྐྲག་ས་ཡོད་ནི་མ་རེད།ན་གེ་ནོག་གེ་རང་གིས་བཅོས་ན།མང་ཚོགས་ཀྱིས་ཀྱང་མི་བཟང་གི་ཟེར་རྒྱུ་རེད།རྒྱལ་ཁབ་ཀྱིས་ཀྱང་ཁྱོད་ཚོ་ལ་ཁྲིམས་ཀྱི་ཐོག་རྡུང་རྡེག་གཏོང་རྒྱུ་རེད།དེ་ཚང་མ་སེམས་ལ་ཞོག ད་ཆོས་ལུགས་ནང་དུ་ཡིན་ན་ཡང་།ང་ཚོ་ཁོམ་བྱུང་ན།ཆོས་ལུགས་པ་ཕན་ཚུན་མི་འགྲིག དེ་ཚང་མ་དེ་ལྟར་མ་བཅའ།ང་ཚོ་འདི་ན་དགེ་ལུགས་པ་ཡོད།ཡང་རྙིང་མ་ཨ་ཁུ་དཔོན་ཡོད་ནི་རེད།ཁོམ་བྱུང་ན་དཔོན་གྱིས་ཟེར་བར་ང་དཔོན་བཟང་ང་ལ་ནུས་པ་ཡོད།གྲྭ་པས་ཟེར་བར་ང་གྲྭ་པ་བཟང་།ཅིག་ཡིན་འདི་ཡིན།ད་དེ་འདྲ་མ་བཤད།ཚང་མ་སངས་རྒྱས་ཤྰཀྱ་ཐུབ་པའི་རྗེས་འཇུག་རེད།ང་ཚོ་ཆོས་ལུགས་ཀྱི་གྲུབ་མཐའ་མི་འདྲ་བ་མ་གཏོགས།གཅིག་གཅིག་ལ་བརྩི་བཀུར་བྱོས།གཅིག་གཅིག་ལ་འགྲིག་མཐུན་བྱོས།ནང་ཁུལ་ནས་རྡུང་རེས་མ་རྒྱག དེའི་འཕྲོ་ན་འདི་ན་ཧོས་ཧོས་ཡོད་ནི་རེད།ཧོས་ཧོས་ཚོས་བཤད་ན་ཧོས་ཧོས་ཀྱི་ཆོས་བཟང་།ཁྱོད་ཚོ་མི་བཟང་།ང་ཚོས་ཟེར་ན་ང་ཚོའི་ཆོས་བཟང་།ད་དེ་མ་ཟེར།ང་ཚོས་ཟེར་ན་ང་ཚོའི་ཆོས་ལ་དད་པ་བྱོས།ང་ཚོ་ཕར་ཚུར་གཅིག་གཅིག་ལ་མི་བཟང་གི་ཟེར་རྒྱུ་དེ་མ་ཟེར།རང་རང་ས་ནས་སྡོད་ལ་འཚོ་བ་རོལ་དང་།དེའི་ནང་ན་འགྲིག་པོ་མི་མཐུན་རྒྱུ་ཅུང་ཙམ་ཡང་ཡོད་ནི་མ་རེད།ད་ཚང་མས་རྡུང་རེས་དང་གཅིག་གཅིག་ལ་རྩོད་པ།དོན་དག་མེད་སར་དོན་དག་ལས།དེ་འདྲ་མ་བཅའ།དེ་དུས་ངས་ཁྱོད་ཚོ་ལ་བཤད་པ་དེ་ཡིན།ཆོས་ཡིན་ན་སངས་རྒྱས་ཀྱིས་གསུངས་པ་རེད།སྡིག་པ་ཅི་ཡང་མི་བྱ་ཞིང་།དགེ་བ་ཕུན་སུམ་ཚོགས་པར་སྤྱད།རང་གི་སེམས་ནི་ཡོངས་སུ་འདུལ།འདི་ནི་སངས་རྒྱས་ཀྱི་བསྟན་པ་ཟེར་བ།