དེ་ཚོ་ཚང་མ་ལ་རྡོག་རྫིས་བཏང་བ་རེད།དཔེ་བཞག་ན།རྨ་ལྷོ་བོད་རིགས་རང་སྐྱོང་ཁུལ་བཙུགས་ཡོད་པ་རེད།མིང་ལ་བོད་རིགས་རང་སྐྱོང་ཁུལ་ཞེས་བཏགས་ཡོད་ཀྱང་འདི་ལ་བོད་རིགས་ཀྱི་སྐད་ཡིག བོད་རིགས་ཀྱི་ཁྱད་ཆོས་ཚང་བའི་དོན་དག་ཚང་མ་ཡོད་པ་མ་རེད།ཁུལ་གྱི་ལས་བྱེད་པ་ཡིན་ན་ཡང་།བོད་རིགས་ཀྱི་རང་ཁྱིམ་རང་བདག་གི་མཁས་པ་ཅུང་ཉུང་བ་རེད།དེའི་རྐྱེན་གྱིས་རང་སྐྱོང་དེ་མིང་ཙམ་ཞིག་ཡིན་པ་མ་གཏོགས་དོན་དངོས་མིན།ཕྱིན་ཆད་དེ་ལྟ་བུའི་གནས་ཚུལ་ཚང་མ་བསྒྱུར་དགོས་པ་རེད།རང་ཁྱིམ་རང་བདག་བྱེད་དགོས་པ་རེད།རང་གི་ཁེ་དབང་དངོས་སུ་ལོངས་སྤྱོད་དགོས་པ་རེད།དེའི་རྐྱེན་གྱིས་ཕྱིན་ཆད་མི་རིགས་ཀྱི་ལས་བྱེད་པ་རིམ་གྱིས་ཇེ་མང་དུ་གཏོང་དགོས་པ་རེད།རང་མི་རིགས་ཀྱི་སྐད་ཡིག་སྤྱོད་དགོས་ན་མི་རིགས་ཀྱི་ཁྱད་ཆོས་དང་མཐུན་པའི་བྱ་བ་མཐའ་དག་རིམ་གྱིས་ཡར་རྒྱས་སུ་གཏོང་དགོས་པ་དེ་རེད།མི་རིགས་ཀྱི་དཔལ་འབྱོར།མི་རིགས་ཀྱི་རིག་གཞུང་དེ་དག་ཚང་མ་ཡར་རྒྱས་གཏོང་དགོས་པ་དེ་ཕྱོགས་གཅིག་རེད།ཕྱོགས་གཞན་ཞིག་ནི་ང་ཚོས་རྒྱ་རིགས་དང་རྒྱ་རིགས་ལས་བྱེད་པའི་རོགས་རམ་དང་ལེན་བྱེད་དགོས་པ་རེད།ང་ཚོ་གྲངས་ཉུང་མི་རིགས་རང་གཅིག་པུ་ཡིས་ཡར་རྒྱས་ལ་གཏོང་རྒྱུའི་བྱ་བ་དེ་གང་ཅིའི་ཐད་ནས་ཧ་ཅང་འཁྱོངས་ཀྱི་ཡོད་པ་མ་རེད།དེའི་རྐྱེན་གྱིས་རྒྱ་རིགས་ལ་ངོ་རྒོལ་བྱེད་མི་རུང་།རྒྱ་རིགས་ལ་འཐབ་རེས་རྒྱག་མི་ཉན།རྒྱ་རིགས་བློ་མཐུན་གྱིས་ཚུར་ལ་རོགས་བྱས་པ་དེ་དང་ལེན་བྱེད་དགོས།སྤྱིར་ན་སྔོན་ཆད་རྒྱ་རིགས་ལས་བྱེད་པས་ང་ཚོ་ལ་ཕན་ཆེན་པོ་བཏགས་པ་མ་ཟད།ཆེས་མང་བོ་ཞིག་གིས་ཏང་གི་བཀའ་མངགས་ལྟར་ལྷག་བསམ་རྣམ་དག་གིས་ང་ཚོ་ལ་ཕན་བཏགས་པ་རེད།དེ་ཚོ་ལ་ཡང་ཕར་ལ་བཀའ་དྲིན་ཆེ་ཞེས་བཤད་པ་ཡིན།རྩ་བ་དེ་ཕྱིན་ཆད་ཆབ་སྲིད་ཐོག་ཡིན་ན་ཡོངས་སུ་འདྲ་མཉམ་གྱིས་ཁེ་དབང་ལོངས་སུ་སྤྱོད་དགོས་པ་རེད།དཔེ་བཞག་ན།བར་སྐབས་ལས་ཁུངས་ཀྱི་ནང་ནས་ཡིན་ན་གྲངས་ཉུང་མི་རིགས་ཁག་གི་ལས་བྱེད་པ་ཡོན་ཏན་མེད་པ།མི་ཡོད་ན་ཡང་དབང་མེད་པ་དེ་འདྲའི་གནས་ཚུལ་ཡོད་པ་རེད།དེ་དག་རིམ་གྱིས་མེད་པར་གཏོང་དགོས་པ་རེད།དེ་ལ་དོན་དག་གཉིས་ཡོད་དེ།གཅིག་ཆབ་སྲིད་ཀྱི་ཐོག་རེད།གནས་ཚུལ་དེ་མྱུར་མོར་མེད་པར་གཏོང་དགོས།གཉིས་ཡོན་ཏན་གྱི་ཕྱོགས་རེད།དེ་ནི་རང་རང་གི་ཡོན་ཏན་བཟང་བོ་སྦྱོང་དགོས་པ་རེད།རང་རང་ལ་ཡོན་ཏན་མེད་ན་དེ་བཅའ་རྒྱུ་ཡོད་ནི་མ་རེད།དེའི་རྐྱེན་གྱིས་མི་རིགས་ལས་བྱེད་པ་ཚང་མས་རང་གིས་ཡོན་ཏན་སྦྱང་རྒྱུ་དེ་ཧ་ཅང་གལ་ཆེན་པོ་རེད།དེ་ཚང་མས་སེམས་ལ་ཟུངས།ཏང་གི་ལས་བྱེད་པ་ནི་མི་དམངས་ལ་ལྷག་བསམ་རྣམ་དག་གིས་ཞབས་འདེགས་ཞུ་མཁན་རེད།མི་དམངས་ལ་བཙན་པོ་བྱས་ན་མི་འགྲིག་པ་རེད།མི་དམངས་ལ་ཕན་ཐོགས་དགོས།མི་དམངས་ལ་སྡུག་བཏང་ན་ཆོག་ནི་མ་རེད།བློ་གཅིག་སེམས་གཅིག་གི་སྒོ་ནས་མི་དམངས་ལ་ཞབས་འདེགས་ཞུས།མི་དམངས་ཀྱི་ཞབས་ཞུ་པ་རེད།མི་དམངས་ལ་ཕན་བཏགས་ནས་བདེ་སྐྱིད་བྱུང་བ་དང་འཚོ་བ་ཇེ་ཡག་ཏུ་སོང་ན་དེ་རང་གི་དགེ་ཆོས་དང་རང་གི་སེམས་དགའ་བའི་བྱ་བ་ལ་འཛིན་དགོས།མི་དམངས་སྡུག་བསྔལ་བྱུང་ན་རང་གི་སྡུག་བསྔལ་དུ་བརྩི་དགོས་པ་རེད།མང་ཚོགས་ཡིན་ཡང་ལས་བྱེད་པ་ལ་བརྩི་དགོས།ཁ་ལ་ཉན་དགོས།ཅི་རེད་ཟེར་ན་ཏང་གིས་མངགས་ནས་ཁྱོད་ཚོ་སྤྱི་ཚོགས་རིང་ལུགས་ཀྱི་ལམ་ལ་འགྲོ་རྒྱུ་དང་།དེང་རབས་ཅན་བཞིའི་འཛུགས་སྐྲུན་བྱེད་རྒྱུའི་ལམ་ཁྲིད་མཁན་ཡིན།དེ་ཚོའི་ཁ་ལ་ཉན་དགོས།ལས་བྱེད་པའི་ནང་ན་མི་དམངས་ལ་གནོད་སྐྱོན་གཏོང་བའི་མི་ངན་པ་ཡོད་ན།དེ་ཚོའི་ཁ་ལ་ཉན་མི་དགོས།ཁོ་ཚོའི་བྱེད་ཚུལ་དེ་ཏང་གི་སྲིད་ཇུས་དང་མི་མཐུན་པ་རེད།རྗེས་ནས་འདེམ་བསྐོ་བྱེད་དུས།མི་དམངས་ཀྱི་བློར་མི་འབབ་པའི་མི་འདི་དག་འདེམ་བསྐོ་མ་བྱས་ན་ཆོག་པ་རེད།ང་ཚོའི་རྒྱལ་ཁབ་འདི་མི་དམངས་ཀྱི་སྲིད་གཞུང་ཡིན་པ་མ་གཏོགས་དཔོན་པོ་ཡི་སྲིད་གཞུང་མ་རེད།མི་དམངས་ཀྱིས་ཡར་ལ་ཁོ་བསྐོ་དགོས་ནི་རེད།མི་དམངས་ཀྱི་བློ་ལ་ཁེལ་དགོས་པ་རེད།ལས་བྱེད་པ་མི་དམངས་ཀྱི་བློ་ལ་འབབ་པ་དེ་ཚོ་བསྐོ་དགོས་པ་རེད།དེ་འདྲ་ཞིག་བྱས་ན་ཕྱིན་ཆད་ཏང་གིས་ཀྱང་ཡིད་ཆེས་པ་དང་།མི་དམངས་ཀྱིས་ཀྱང་གཟེངས་བསྟོད།དེ་འདྲའི་མི་ལས་བྱེད་པ་ལ་བསྐོ་དགོས་པ་རེད།དེ་མ་གཏོགས་མི་དམངས་ཀྱིས་སྡིགས།དང་མ་སྔོན་ཆད་རིག་གནས་གསར་བརྗེ་ཆེན་པོའི་སྐབས་ལ་མི་དམངས་ལ་སྡུག་བཏང་།དཔེ་བཞག་ན།སྐབས་དེ་ལ་མི་དམངས་ལ་གནོད།རང་གི་མི་རིགས་ཀྱི་བསམ་པ་མེད་པ།ལ་རྒྱ་མེད་པའི་ལས་བྱེད་པ་ལ་ལ་བཙོག