ང་ནི་ཨ་མྱེས་ཆང་གིས་བཟི་ན་དགའ།

བཀྲ་ཤིས་དར་རྒྱས། 2016-05-30

ང་ཆུང་དུས་སུ་རང་གི་ཨ་མྱེས་རྒན་པོ་དང་མཉམ་དུ་འབྲོག་ཐོག་ཏུ་ཡུན་རིང་སོང་མྱོང་ཞིང་ཨ་མྱེས་དང་ལུས་དང་གྲིབ་མ་བཞིན་དུ་གཤིབ་ཅིང་བྲལ་མ་མྱོང་། ཁོང་ནི་དངོས་གནས་ང་རང་ལ་བཀའ་དྲིན་ཆེ། ང་རང་ལོ་གསུམ་ལོ་བཞི་ཙམ་ནས་ཨ་མྱེས་ཀྱི་ལག་གི་འཁར་བ་ལྟ་བུར་གྱུར་ཡོད། དབྱར་དུས་སུ་ངེད་གཉིས་དང་མཉམ་དུ་ད་དུང་འབྲོག་ཐོག་ཏུ་ཨ་ཕྱི་ཡང་ཡོད་མོད། དགུན་ཟླ་རིང་མོར་ངེད་གཉིས་ལས་མེད་ཅིང་ཉིན་གུང་ཟོག་རྫིར་འགྲོ་དགོས་པ་དང་དགོང་མོར་སྤྱིལ་བུ་ཆུང་ཆུང་དེའི་ནང་དུ་ཨ་མྱེས་ངེད་གཉིས་མ་གཏོགས་སུ་ཡང་མེད་པས་ངས་ཨ་མྱེས་ལ་གནའ་གཏམ་དང་གླིང་སྒྲུང་འཆད་རོགས་ཞུས་ཀྱང་། བོད་རྟེན་འབྲེལ་གྱི་བདག་པོ་ཟེར་ནའང་འདྲ། རྣམ་རྟོག་གི་རང་བཞིན་ཟེར་ནའང་རུང་། རྒྱུན་དུ་ཨ་མྱེས་ཀྱིས་ང་ལ་གནའ་སྒྲུང་བཤད་རོགས་མི་བྱེད། རྒྱུ་མཚན་དྲིས་པས་གནའ་སྒྲུང་བཤད་ན་མི་རུང་བ་དང་སྡིག་པ་ཆེ་གི་རེད་ཟེར་བས་ང་ཅི་བྱ་གཏོལ་བྲལ་དུ་གྱུར་པས་ཁ་རོག་གེར་མི་འདུག་ཀ་མེད་དུ་གྱུར། ཨ་མྱེས་ཆང་རག་འཐུང་བར་དགའ་བས་རོང་ཁོག་ནས་མགྲོན་པོ་འདྲ་དང་ཡང་ན་ངའི་ཨ་ཇོ་ཁོ་ཚོ་འབྲོག་ཐོག་ཏུ་ལྟ་རུ་འོང་བར་རེ་ཞིང་སྒུག་གི་ཡོད། དེ་ཚོ་ཡོང་ན་ཨ་མྱེས་ཆེས་དགའ་བའི་བདུད་རྩི་ཞིམ་པོ་ཁུར་ཡོང་སྲིད། ཨ་རག་ཡོད་པའི་མཚན་མོར་ངས་མྱུར་དུ་སྐྱོགས་མགོ་ཞིག་གི་ནང་དུ་མར་རྡོག་གཅིག་འཕངས་ནས་ཨ་རག་ཚ་གི་ཡོད། ཨ་རག་ཚ་ཟིན་རྗེས་ཁོའི་ཕོར་བའི་ནང་དུ་བླུགས་ནས་འཐུང་བ་དང་། ཨ་མྱེས་ར་བཟི་བ་ན་ང་རང་གིས་ཆེས་ཉན་ན་འདོད་པའི་འཛམ་གླིང་གེ་སར་རྒྱལ་བོའི་སྒྲུང་སོགས་འཆད་གི་ཡོད། དེ་བས་ང་རང་ཨ་མྱེས་ཆང་གིས་བཟི་བར་ཤིན་ཏུ་དགའ་འོ།།

ང་ནི་ཨ་མྱེས་ཆང་གིས་བཟི་ན་དགའ།

དོ་སྣང་ཆེ་བའི་རྩོམ།

རྩོམ་གསར། 10

དོ་སྣང་ཆེ་བའི་རྩོམ། 10