དོ་ནུབ། 《སློབ་གྲོགས》ཞེས་པའི་གཞས་གདངས་སྙན་མོ་དེར་ཉན་གྱིན་ཉན་གྱིན། ག་ས་གང་དུ་རང་རང་གི་ཕུགས་འདུན་གྱི་ཆེད་ལ་ཤ་འབད་རུས་འབད་བྱེད་བཞིན་པའི་སློབ་གྲོགས་ཚོ་སྙིང་ནས་དྲན་བྱུང་། དྲན་གྱིན་དྲན་གྱིན་དབྱངས་རྟ་སྙན་མོ་དེའི་འདེགས་འཇོག་དང་བསྟུན་གང་ཐུབ་ཀྱིས་རང་གིས་ཀྱང་ངག་ནས་བླངས་པ་ཡིན། བླངས་བླངས་མཐར། སློབ་གྲྭའི་ནང་གི་དགའ་སྐྱོ་འདྲེས་མའི་འཚོ་བ་དག་གློག་བརྙན་བཞིན་མིག་ལམ་ནས་གསལ་ལེར་ཤར་འོང་། དེ་དུས་སུ། ངས་པར་མཛོད་དུ་ཉར་བའི་སློབ་གྲོགས་དག་གི་འདྲ་པར་དག་ཕར་སློག་ཚུར་སློག་བྱེད་ཀྱིན། འདས་ཟིན་པའི་གཏམ་རྒྱུད་དག་ལ་ཕྱིར་མིག་ཅིག་མི་འཕེན་ག་མེད་རེད། སློབ་གྲོགས་ཚོ། སྙིང་ཉེ་བའི་ཁྱེད་ཅག་རེ་རེ་བཞིན་ཧ་ཅང་དྲན། དྲན་སྟངས་དེ་ནི་དངོས་གནས་བཟོད་མི་ཐུབ་པ་ཞིག་ཡིན་རེད། མྱུར་བ་མྱུར་དུ་ཁྱེད་ཅག་གི་གམ་དུ་ལོག་ཡོང་སྙམ་པ་ཞིག་རེད། ཡིན་ནའང་། འདུས་མཐར་བྲལ་བ་དང་བྲལ་མཐར་འཛོམས་དཀའ་བ་ནི་ཆོས་ཉིད་ཅིག་ཡིན་པས་སུས་ཀྱང་སུ་ལ་ལེ་བདའ་བྱེད་ཐབས་བྲལ།

སྐབས་འདིར། མཛེས་སྡུག་གི་སློབ་གྲྭའི་འཚོ་བར་ཕྱིར་དྲན་གྱི་མདའ་མོ་འཕངས་ཏེ། རྒྱང་རིང་གི་སློབ་གྲོགས་ཚོ་ལ་སེམས་ཀྱིས་རྒྱང་ལྟ་ཞིག་མི་བྱེད་ཀ་མེད་རེད།

དྲན་ནམ། ཁྱོད་ཚོས་དྲན་ནམ། ནམ་རྒྱུན་སློབ་ཁང་གྲུ་བཞི་ནང་མཆེད་པའི་དགེ་རྒན་གྱི་བསླབ་བྱ་དང་དཔེ་ཆར་དགའ་བའི་སློབ་གྲོགས་ཚོས་དཔེ་ཀློག་གི་དབྱངས་རྟ། རྩེད་འཇོ་ལ་གོམས་པའི་སློབ་གྲོགས་རེ་འགའི་དགོད་སྒྲ། དེ་མིན། སྦྱངས་ཚན་དང་ལས་བྱ་མ་འགྲུབ་པའི་སློབ་གྲོགས་དག་གི་སྣང་བརྙན་སོགས་ག་ལེ་ག་ལེར་ཁྱོད་ཚོའི་མིག་ལམ་དུ་བཞུར་ཡོང་ངམ། ད་དུང་སློབ་ཁྲིད་སྐབས་སུ། དགེ་རྒན་གྱི་དྲི་བ་ལ་སྐྲག་པའི་ཁྱོད་ཚོ་དང་ང་།ལས་བྱ་རི་རབ་འདྲ་བ་དག་ལ་སུན་པའི་ཁྱོད་ཚོ་དང་ང་། མི་ཤེས་པ་རྐུ་འབྲི་ལ་དགའ་བའི་ཁྱོད་ཚོ་དང་ང་། སློབ་གྲྭའི་བྱ་འགུལ་རེ་རེར་རང་ནུས་ཅི་ཡོད་འདོན་ཐུབ་པའི་ཁྱོད་ཚོ་དང་ང་སོགས། བརྗེད་དཀའ་ཞིང་དྲན་སླ་བའི་གཏམ་རྒྱུད་གང་མང་མང་ཞིག དལ་བ་དལ་བུར་ཁྱོད་ཚོའི་སེམས་ཀྱི་བྲག་ཅ་ནས་མཆེད་ཡོང་ངམ། དེ་དུས། འཛུམ་མདངས་ལྷང་ངེར་འཆར་བའི་སྐྱིད་སྣང་དང་མིག་ཆུ་ཐག་སེ་ལྷུང་བའི་སྡུག་སྣང་ཞིག་ཡོད་དམ།

སློབ་གྲོགས་ཚོ། སློབ་གྲྭའི་ནང་དུ་བལྟས་ཚོད་ཀྱིས་ཡོད་ཚད་རྒྱུན་ལྡན་ལྟར་སྣང་ཡང་། ཟླ་དྲུག་པའི་མཐར་ཕྱིན་གྱི་ཉིན་མོ་དེ་ནི་སུ་དང་གང་ཞིག་ལ་མཚོན་ཡང་བརྗེད་ག་ལ་སྲིད། རིག་པའི་གླིང་ག་དེ་རུ་ང་ཚོས་བརྗེད་དཀའ་བའི་གཏམ་རྒྱུད་མང་པོ་ཞིག་བསྐྱུར་ཡོད་ལ། བསུབ་དཀའ་བའི་རྐང་རྗེས་གྲངས་མེད་ཅིག་ཀྱང་བཞག་ཡོད། དེ་དག་དྲན་ཐེངས་རེ་རེར་འབྲལ་མི་ཕོད་པའི་ཚོར་བ་ཞིག་གིས་སེམས་ལ་སྐྱོ་བ་དྲག་པོ་ཞིག་སློང་བར་བྱས་ཏེ་མིག་ཆུའི་རྡོག་པ་འགའ་ཡང་མིག་མཐར་འཁྱིལ་བར་བྱེད། འདི་ལྟར་སློབ་མའི་འཚོ་བར་བཞི་ཤད་འབྲི་རན་དུས། ང་ཚོས་སློབ་གྲྭ་ལ་སྨྲ་མི་དག་པར་ངུ་སྐད་ཀྱི་ངང་ནས་བཀའ་དྲིན་ཙམ་ཞུ་རྒྱུ་ལས་གཞན་ཅི་ཡང་མེད། མདོར་དེད་ན། སློབ་གྲྭས་ཉིན་མཚན་ཀུན་ཏུ་ངེད་ཅག་གཡས་ནས་བཀྱགས་ཤིང་གཡོན་ནས་བསྐྱོར་ཏེ་ཡོང་བས། སློབ་གྲྭ་ནི་ངེད་ཅག་གི་མི་ཚེ་ལེགས་པོ་གཏོང་བྱེད་ཀྱི་གར་སྟེགས་དེ་ཡིན་ལ། མ་འོངས་མཛེས་བྱེད་ཀྱི་ཤེས་བྱའི་བང་མཛོད་དེའང་ཡིན་པས། འགྲོ་རན་ཁར་ཅིས་ཀྱང་སློབ་གྲྭའི་བཀའ་དྲིན་ཐེངས་གཅིག་སེམས་ལ་དྲན་སྲིད། ཅིས་ཀྱང་མཐར་ཕྱིན་པའི་ཉིན་དེ་ནས་བཟུང་སྟེ།སློབ་གྲོགས་ཚོའི་བློ་ཡིད་ལ་འཆར་བ་ནི། ང་ཚོ་སློབ་གྲོགས་དག་སླར་ཡང་འཕྲད་མི་ཐུབ་ལ་སླར་ཡང་འཕྲད་ཀྱང་འདི་ནས་འཕྲད་མི་སྲིད།འདི་ནས་འཕྲད་ཀྱང་ཉེ་སྔོན་འཕྲད་པ་འདྲ་ཞིག་ཡོང་མི་སྲིད་པ་དེ་རེད།

འདི་ལྟར་བསམ་ཞིང་བསམས་ན། དུས་ཚོད་ནི་མཛུབ་བར་ནས་བཞུར་བའི་བྱེ་མ་ལྟར་ཡལ་ཡང་། རིང་ཡང་རིང་ལ་ཐུང་ཡང་ཐུང་བའི་སློབ་མའི་འཚོ་བ། ཤེས་མེད་ཚོར་མེད་ངང་འུར་ཟིང་དང་བྲེལ་ཟིང་གི་ཀློང་ནས་ཆུ་མོ་བཞིན་ཤག་ཤག་བཞུར་སོང་། དུས་ཚོད་ནི་ཅི་འདྲའི་མགྱོགས་པ་ལ་ཨང་། མིག་རྡེབ་དབང་ཙམ་གྱིས་ཡོད་ཚད་སྐད་ཅིག་ངང་འདས་སོང་། གལ་ཏེ་ཡང་བསྐྱར་ཁྱེད་ཅག་དང་མཉམ་འགྲོགས་ཀྱི་ལོ་ཟླ་རིང་དུ་བསྲིངས་པའི་གདམ་ག་ཞིག་བྱ་ཆོག་ཚེ། ངས་ནི་ཐེ་ཚོམ་མེད་པར་རིང་ནས་རིང་དུ་བསྲིངས་པའི་གདམ་ག་བྱ་སྲིད།

ངས་འདས་སོང་གི་ལོ་ཟླ་དང་བཞུད་ཟིན་པའི་གཏམ་རྒྱུད།བརྗོད་མ་ཚར་བའི་སྙིང་གཏམ་སོགས་མང་པོ་མང་པོ་ཞིག་བཤད་འདོད་ནའང་། ཇི་ལྟར་བཤད་དགོས་པ་ཤེས་ཀྱིན་མི་འདུག། སྐབས་སྐབས་སུ་ཐག་ཉེ་ཞིག་ཡིན་ལ་སྐབས་སྐབས་སུ་ཐག་རིང་ཞིག་ཡིན་པ་ལྟ་བུའི་བདག་གི་སྙིང་ཉེ་བའི་སློབ་གྲོགས་ཚོ། དོ་ནུབ། ངས་ང་ཚོ་འདི་ལྟར་ཆ་མེད་ནས་ཆ་ཡོད་དུ་གྱུར་བའི་གོ་རིམ་ཞིག་དྲན་གྱིན་ཡོད། ཤིན་ཏུ་ཉན་སྤྲོ་བའི་ངེད་ཅག་གི་སེམས་གཏམ་དང་དུངས་བརྗོད་ཀྱི་ཚིག་དུམ་རེ་འགའ་བྲིས་ནས་སློབ་གྲོགས་བུད་མེད་དག་ལ་བསྐུར་བའི་རྣམ་པ་དྲན།ཡང་ན་ངེད་ཅག་གི་དགའ་སྡུག་འདྲེས་མའི་གཏམ་རྒྱུད་དག་དྲན་གྱིན་ཡོད། དྲན་བཞིན་པ་ནི་ངེད་ཅག་གི་འདས་ཟིན་པ་ཡིན་ལ། ལྷོག་ལྷོག་ཏུ་ཁོལ་བའི་འདང་དང་བརྩེ་བ་ཡིན་པས།སྙིང་ཉེ་བའི་སློབ་གྲོགས་ཚོ། ངས་ཁྱེད་ཅག་རེ་རེ་བཞིན་ཧ་ཅང་དྲན་གྱིན་ཡོད། དྲན་གྱིན་ཡོད།