མི་ཡུལ་དུ་བསླེབས་ཏེ་མི་ལོ་མང་པོ་འགོར་ཚར་སོང་། ཉིན་ཞག་དུ་མ་ག་ཤེད་དུ་བསྐྱུར་ནས་རྒྱུགས་འོང་སྟེ་ཡང་རྩྭ་རྩི་ཤིང་ནག་ཚལ་སོགས་ཀྱིས་མཐོ་སྒང་གི་རི་ལུང་དག་ལ་ལྗང་མདོག་བསྐོས་ཀྱིན་པའི་དཔྱིད་ཀ་ཞིག་ཏུ་ཐོན་ཡོད། དོན་ངོ་མ་བདག་ནི་ཅིའི་ཕྱིར་འཇིག་རྟེན་འདིར་ཐོན་འོང་བ་མི་ཤེས་ལ། ཡང་ཅི་ཞིག་འཚོལ་ཕྱིར་འདི་ལྟར་རྒྱུགས་ཤིང་བསྡད་པ་རེད། གསེར་དངུལ་གྱི་ཁྱད་དུ་འདི་ལྟར་གོམ་པ་སྤོས་པ་མིན་ལ། ཐོབ་དང་དབང་ཆ་སོགས་ཀྱིས་ཀྱང་ང་འདི་ལྟར་ཁྲིད་སོང་བ་མིན་པ་འདྲ། དེས་ན་ཁྱེད་རང་འདིར་སུའི་སླད་དུ་འོང་བ་ཡིན། བསམ་བློ་ནན་གྱིས་ཐོང་གཏོང་ཨེ། གལ་སྲིད་འཇིག་རྟེན་འདི་ན་སྙིང་པོ་ཟེར་བ་ཞིག་ཡོད་ཀྱང་ཁྱོད་ཀྱིས་དེ་ནི་ཅི་ཞིག་ཡིན་པ་རྟོགས་མི་སྲིད། དེས་ན་ཁྱེད་རང་ལ་ཡུལ་ལུང་འདི་ནས་ཁ་བྲལ་བ་ལ་དངངས་སྐྲག་སྐྱེས་པའི་རྒྱུ་མཚན་ཅི་ཡང་མེད་། མེད་བཞིན་དུ་འདང་དགོང་ལམ་རབ་བེ་རིབ་བེ་ཞིག་ལས་མིག་གིས་མི་རིག་ཅིང་། འཕྲུལ་རྟའང་འཁྱལ་ལེ་འཁྱོལ་ལེ་རེད་ཅིང་གཡང་གཟར་འཆོངས་འགྲོ་བསམ་དུས་འཇིགས་སྔངས་རབ་ཏུ་སྐྱེས་འོང་བ་ཡང་ཅིའི་ཕྱིར་རེད། ཅིའི་ཕྱིར་འདི་ལྟར་སྐྲག་དགོས་པ་རེད།

དོན་ངོ་མ་ངའི་ཚེ་སྲོག་འདི་ལ་རིན་ཐང་ཡོད་པ་རེད་དམ་མགོ་ཐོག་གི་ནམ་མཁའ་ཀྱེ། ཇི་ལྟར་བཙལ་ཡང་ང་ཡི་ལུས་པོ་འདི་ནི་རིན་ཆེན་ཞིག་ཡིན་པའི་རྟགས་རྙེད་རྒྱུ་མི་འདུག་ཅིང་། ངའི་དབུགས་ཀྱི་རྒྱུ་བ་སྟར་བའི་ཚེ་སྲོག་གི་ནོར་བུ་ལ་འོད་འདངས་ཤིག་འཚེར་རྒྱུ་མི་འདུག། རིན་ཐང་སྟོང་བའི་ཚེ་སྲོག་གི་རྟེན་གཞི་ནི་ངོས་སུ་བེམ་པོ་དང་ཁྱད་པར་ཅི་ཞིག་ཡོད་དམ། ཁྱེད་རང་འདི་ལྟར་སང་ཉིན་ཡང་ཉིན་ཞག་བརྩིས་ནས་འགྲོ་དགོས་སམ། ཡང་ན་དེ་རིང་ནས་མི་ཚེའི་འཇུག་བསྡུ་དགོས་པ་རེད། མིན་ན་ཚེ་སྲོག་འདི་ནམ་གུང་གི་ཟླ་བ་ལྟ་བུ་ཞིག་བསྒྱུར་དགོས་པ་ཨེ་རེད། དེ་ལྟར་ནའང་ས་སྒང་ཞིག་ཟླ་བ་འགྱུར་བའི་བརྒྱུད་རིམ་ནི་ཁྱེད་ཀྱིས་བལྟས་ན་ཅི་འདྲ་ཞིག་ཏུ་ངོས་འཛིན་བྱེད་དགོས་སམ།