༼ དང་པོ།༽

སློབ་བུ་བཀྲ་ཤིས་ལགས་ནི་སློབ་ཆེན་མཐར་ཕྱིན་སློབ་མ་ཡིན་རྐྱེན་ད་ལོའི་སློབ་སྐབས་འདིར་རང་ས་རང་ཡུལ་གྱི་བཅའ་སྡོད་སློབ་ཆུང་དུ་དངོས་སྦྱོང་སློབ་མ་བྱས་ནས་ཡོད། མ་ཟད་བཀྲ་ཤིས་ཀྱི་ཆེད་ལས་ཀྱང་དགེ་རྒན་ཡིན་པས་སློབ་ཁྲིད་དང་སློབ་གསོ་སོགས་ཕྱོགས་ཀུན་པོ་ནས་ནན་ནན་བཅག་བཅག་མཛད་ཀྱིན་གདའ།

སློབ་ཁྲིད་རྫོགས་རྗེས་ཀྱི་ཉིན་གུང་ཞིག་ལ་བཀྲ་ཤིས་ལུས་རྩལ་ར་བ་རུ་ཡོང་དུས།ཁོ་དང་སློབ་གླིང་གཅིག་པའི་སློབ་བུ་དཔལ་ལྡན་ཡང་བཅའ་སྡོད་སློབ་ཆུང་དུ་འབྱོར་འདུག། ཁོང་གཉིས་ནི་ཕན་ཚུན་ལ་ཡིད་ཆེས་གནང་མཁན་གྱི་གྲོགས་པོ་ཡིན་པར་མ་ཟད་སྔོན་ཆད་གཅིག་གཅིག་ལ་རོགས་རམ་ཡང་བྱས་མྱོང་། ཁོང་གཉིས་འཕྲད་མ་ཐག་ཕན་ཚུན་ལ་ལག་འཇུ་བྱེད་ཀྱིན་རང་རང་གི་གནས་ཚུལ་སོགས་རགས་བརྗོད་བྱས།

ཉིན་དེ་ནས་བཟུང་ཁོང་གཉིས་བཅའ་སྡོད་སློབ་ཆུང་དུ་ཟླ་འགའ་ལ་འདུག་དགོས་བྱུང་བ་རེད། ཟླ་འགའི་རིང་ལ་མཉམ་འགྲོ་མཉམ་འདུག། མཉམ་ཟ་མཉམ་འཐུང་བྱེད་ཀྱིན་ཕན་ཚུན་གྱི་བར་ལ་གསང་བ་མེད་པར་སྙིང་གཏམ་སོགས་ཆུ་མོ་བཞུར་བཞུར་བཤད། ད་དུང་མ་འོངས་མདུན་ལམ་བཤད་ནས་ཕྱོགས་གང་ལ་འབད་དགོས་པ་དང་གནས་གང་ལ་བརྩོན་དགོས་པ་སོགས་ཀྱིས་སྐུལ་འདེབས་ཡང་ཡང་བྱས་མྱོང་།

༼ གཉིས་པ།༽

གཟའ་མཇུག་ཞིག་ལ་ཁོམ་གླགས་བྱུང་རྐྱེན་ཁོང་གཉིས་གྲོང་རྡལ་གྱི་སྲང་ལམ་དུ་ཆས་ཀྱིན་འདུག། རང་གཉིས་ལ་མཁོ་བའི་ཡོ་བྱད་སོགས་གང་དགོས་ཉོས་པ་རེད། ཉོ་ཚོང་ཚར་རྗེས་སུ་བཅའ་སྡོད་སློབ་ཆུང་དུ་ཡོང་ནས་བསྡད་པ་ན། སྤྱིར་བཏང་དུ་འདི་འདྲ་ཞིག་ཟེར་སྲོལ་ཡོད་མོད། “ཨ་ཡས་མ་ལ་བཤད་རྒྱུ་མང་།། བ་ལུ་མ་ལ་གཏང་རྒྱུ་མང་།།”ཞེས་པ་ལྟར་རེད། ད་ཐེངས་ཁོང་གཉིས་ཀྱང་ཨ་ཡས་མ་ཞིག་ལྟར་མི་བཤད་རྒྱུ་གང་ཡང་མེད་པ་རེད། རང་གཉིས་ལ་རྒན་མོ་ཕར་ཞོག། ཐ་ན་དགའ་རོགས་ཤིག་ཡོད་མེད་བཤད་པ་ན། ཕན་ཚུན་ལ་བལྟས་ནས་དགོད་ཁ་ཤོར་བར་མ་ཟད་མཚང་འབྲུ་བྱས་པ་རེད། གཏམ་གླེང་བྱེད་སྐབས་སུ་དཔལ་ལྡན་གྱིས་ལག་ཏུ་ཁ་པར་བཟུང་ནས་བསྡད་འདུག། སྐབས་དེར་ཁ་པར་ནི་འཛིན་ཚད་ཞིག་ལ་བཟུང་འདུག་པ་འདྲ།

དཔལ་ལྡན་གྱི་ཁ་པར་ནང་དུ་བརྙན་ཐུང་ཞིག་འཆར་གྱིན་འདུག། བརྙན་ཐུང་ནང་གི་བུ་མོ་གཟུགས་མཛེས་མ། མིག་ཟུང་ལ་ཆ་ག་ལྡན་པ། སྐྲའི་ལན་བུ་རྒྱབ་ཏུ་གཡུགས་པ། ཞལ་རས་བཅོ་ལྔའི་ཟླ་བ་འདྲ། སྐུ་གཟུགས་ཚིགས་དྲུག་སྨྱུག་མ་བཞིན། ལྷད་མ་འདྲེས་པའི་འཛུམ་མདངས་ཁྲོད་ན་བདེ་སྐྱིད་ཀྱི་འཚོ་བ་ཞིག་འདུག། ལྷོད་མ་མྱོང་བའི་གོམ་སྟབས་བར་ན་བརྗོད་མ་མྱོང་བའི་སེམས་གཏམ་ཞིག་གདའ།

བཀྲ་ཤིས་ལ་འདང་རྒྱག་གང་ཡང་མེད་པར། དཔལ་ལྡན་ལགས། བུ་མོ་འདིའི་སྐད་འཕྲིན་ཨང་གྲངས་ང་ལ་གནང་རོགས། བུ་མོ་འདིས་ང་རང་བཟི་རུ་བཅུག་བྱུང་ཟེར་བ་ན། དཔལ་ལྡན་དགོད་ཀྱིན་འདི་ལྟར་བརྗོད་པ་རེད། ངས་ཁྱེད་ལ་སྐད་འཕྲིན་ཨང་གྲངས་སྟེར་ཆོག། ཡིན་ན་ཡང་ངེད་གཉིས་འབྲེལ་བ་སྤྱིར་བཏང་ཞིག་མིན་པས་ང་རང་བཙོང་མི་ཆོག་ཟེར།

༼ གསུམ་པ།༽

ཉིན་དེ་ནས་བཟུང་། བཀྲ་ཤིས་ཀྱི་སྐད་འཕྲིན་ནང་དུ་གང་ཟག་གཞན་དང་མི་འདྲ་བའི་མི་སྣ་འདང་ཆེན་ཞིག་བྱུང་མགོ་ཚུགས།

བཀྲ་ཤིས་ཀྱིས་ཉིན་གང་བོར“བསམ་བློ་བཞི་གསུམ་བཅུ་གཉིས།། བློ་རྩེ་ཉི་ཤུ་རྩ་ལྔ།།”ཞེས་པ་ལྟར་བསམ་མནོ་བཏང་བ་རེད། ཡིན་ན་ཡང་མོ་རང་ལ་ཅི་ལྟར་བྱས་ནས་ཁ་བརྡ་བྱེད་དགོས་འཕྱང་མོ་ཉུག།

སློབ་ཐུན་གཉིས་ཡོད་པ་ཇི་ལྟར་བྱས་ནས་ཕྱིན་པ་མ་ཚོར། ཁྲི་གདུགས་ཉི་མའང་ནུབ་རི་ལས་མཐོང་མི་མཐོང་ཙམ་དུ་སྣང་། བཀྲ་ཤིས་ཀྱིས་སྔར་བཞིན་བསམ་མནོ་བཏང་ནས་བསྡད་འདུག་པ་རེད། དུས་ཚད་ཅིག་ལ་ནུབ་ཚ་འཐུང་དགོས་བྱུང་། སྤྱིར་ཡིན་ན་དེ་རིང་གི་ནུབ་ཚའི་ནང་དུ་ནོར་ཤའང་མང་ཙམ་གདའ་ཡང་ནུབ་ཚ་འཐུང་འདོད་ཀྱིས་སེམས་པ་མི་འདུག

དེ་ལྟར་བྱས་ནས་བཀྲ་ཤིས་གཟིམས་ཁང་ནང་དུ་ཕྱིན་སོང་། གྱོན་ཆས་སོགས་ཕུད་ནས་སོས་དལ་གྱིས་རྔན་པ་ཞིག་འཐེན་གྱིན་གན་རྐྱལ་དུ་ལོག

༼ བཞི་པ།༽

གཟིམས་ཁྲི་ལས་ཡར་མགོ་བོ་བཀྱགས། ལག་ཏུ་ཁ་པར་བཟུང་། ཁང་མིག་ནང་གློག་སྒྲོན། ཐེ་ཚོམ་གང་ཡང་མེད་པར་སྐད་འཕྲིན་ལས་གཟུགས་མཐོང་བཏང་བ་རེད། ལས་དབང་ཟེར་ན་འདྲ། སྟེས་དབང་ཟེར་ནའང་རུང་། གང་ལྟར་མོས་གཟུགས་མཐོང་དངོས་ལེན་བྱས།

བཀྲ་ཤིས་ཀྱིས་ཕྱོགས་བཞིའི་སྐད་ཆ་བཤད་པར་མ་ཟད། མཚམས་བཞིའི་སྐད་ཆའང་བཤད་ཟིན་པ་འདྲ།

གློ་བུར་དུ་ཆར་པ་བབས་བྱུང་། བཀྲ་ཤིས་ཀྱིས་མུ་མཐུད་དུ་ཆར་སྒྲ་ལ་ཉན་ནས་སྐད་ཆ་བཤད། ཐ་ན་ཆར་པ་དང་འབྲེལ་བའི་སྙན་ངག་བཏོན། མདོར་ན་རང་གིས་བརྗོད་འདོད་ཀྱི་སྐད་ཆ་བསྙད།

ཁོ་མོ་འཛུམ་གྱིན“ཁྱེད་རང་ནི་ཅི་འདྲའི་ཁ་བདེ་ལྕེ་བདེ་ཞིག”ཟེར་ནས་མུ་ནས་མུ་རུ་བཀྲ་ཤིས་ཀྱིས་སྙིང་གཏམ་ལ་ཉན།

“ ཆར་པ་ཤག་ཤག་བབས་བྱུང་།།

སྤང་ལ་མེ་ཏོག་བཀྲ་སོང་།།

ཆུ་ནང་ཉ་མོས་རྐྱལ་རྩལ།།

ཡར་ནས་ཡར་དུ་རྒྱས་སོང་།།”

ཞེས་རང་གི་སྙིང་གཏམ་སོགས་བརྗོད།

༼ ལྔ་པ།༽

དོ་དགོང་གི་ཆར་པ་ནི་ད་ལོའི་ཆར་འབབ་ཀྱི་ཐོག་མ་རེད། ཁྱེད་ནི་ངའི་དང་ཐོག་རེད་ཟེར་ནས་ཡུན་གྱིས་བཤད་གྲབས་བྱེད་དུས།

ཁྱེད་ཀྱི་ཞལ་མདངས་དམར་ཐེར་ཐེར་དུ་གྱུར་སོང་། དེ་ལྟར་གྱུར་ནས་ག་ཙམ་ཕྱིན་སོང་ལགས།

བརྩེ་སེམས་ཀྱི་ཨ་ལོང་འབྲེལ་བ་ནས་ད་ལྟའི་བར་དུ་ཁྱེད་ཉིད་ལ་སྙིང་གཏམ་གླེང་གིན་ཀྱག་ཀྱོག་གི་ལམ་བུ་རུ་ཆས་པ་ཡིན། མ་ཟད་ཁྱེད་ཀྱིས་འདི་ལྟར་བརྗོད་མྱོང་།“བཀྲ་ཤིས་ལགས། སེམས་པ་མ་སྡུག། ཁྱེད་ལ་ད་དུང་ང་ཡོད་ཟེར། བཀྲ་ཤིས་ལགས།ཁོ་ཐག་མ་ཆད། ཁྱེད་ལ་ད་དུང་མོ་ཡོད་ཟེར།”བཀྲ་ཤིས་ཀྱིས་ནམ་ཡང་དམ་ཚིག་ལ་རྒྱབ་འགལ་མེད་པར་འབད་འབུངས་བྱས། དེ་ལས་གཞན་ད་དུང་མང་པོ་མང་པོ་ཞིག་བསྙད་པ་རེད། དཔེར་ན“སྐྱིད་ཀྱི་རྟ་ཕོ་མཉམ་བཞོན།། སྡུག་གི་ཁུར་བོ་མཉམ་ཁུར།།”སོགས་བགྲང་གིས་མི་ཟིན་པ་གླེང་མྱོང་།

“••••••”

ཕན་ཚུན་གྱི་བརྩེ་བའང་སྤྱིར་བཏང་ཞིག་མ་ཡིན། དེ་ལས་གཞན་ད་དུང་བཤད་རྒྱུ་མང་ན་ཡང་བརྗོད་འདོད་ཀྱི་བསམ་པ་ཡེ་ནས་མི་འདུག།

“••••••”

༼ དྲུག ༽

རེད་དེ། ཁྱེད་ལ་འབྲེལ་བ་བྱས་པ་ནས་བཀྲ་ཤིས་དུས་རྒྱུན་དང་མི་འདྲ། སེམས་ཁམས་སྐྱིད་དུས་ཁྱེད་ཉིད་འཚོལ་ལ་སེམས་ཁམས་སྡུག་དུས་ཀྱང་ཁྱེད་ཉིད་འཚོལ།

ཡིན་ན་ཡང་། ཁྱེད་ཀྱིས་འབྲེལ་ཐག་གཅོད་དགོས་ཟེར་ནས་བཀྲ་ཤིས་ཧད་དུ་བཅུག། བཀྲ་ཤིས་ཀྱི་དུངས་བ་ནི་སྔར་བཞིན་དུངས་བ་ཡིན་རྐྱེན་ཁྱེད་ཉིད་ལ་རེ་སྒུག་བྱས་ནས་འདུག། ཅུང་ཙམ་ཞིག་འགོར་བ་ན། བཀྲ་ཤིས་ཀྱིས་རང་སྨྲས་བྱས། “མཚོ་མོ། ངའི་ཡ་ཆུང་སྙིང་གི་མཚོ་མོ།”ཟེར་ནས་མཐོན་མཐིང་གི་ནམ་མཁའ་ན་སྐར་མ་རྡོག་གཅིག་མེད་པ་ཚོར་བྱུང་།

ཆུ་ཚོད་ག་ཙམ་འདས་པ་མ་ཚོར། ཆར་པ་བབས་བྱུང་། མཚོ་མོ་ཡུལ་ཕྱོགས་གཞན་དུ་འགྲིམས་སོང་།

བཀྲ་ཤིས་ཀྱིས་ཁེར་ལབ་བྱེད་ཀྱིན“ང་དང་ཁོ་མོའི་བར་ལ། དཔྱིད་ཆར་བསིལ་མས་བསུ་མ་བྱེད་མྱོང་བར་མ་ཟད་དབྱར་ཆར་སྔོན་མོས་སྐྱེལ་མའང་བྱས་སོང་།”ཟེར་ནས་དགོད་མ་འཛུམ་གྱིས་བསྡད་འདུག