སྤྱིར་ཁྱུང་ཞེས་པ་ནི་འདི་ངག་རྒྱུན་ལ་གྲགས་པའི་བྱ་རིགས་གལ་ཆེན་ཞིག་ཡིན་པར་མ་ཟད།བོད་ལ་གནའ་སྔ་མོ་ནས་ཁྱུང་དང་འབྲེལ་བའི་རུས་རྒྱུད་དང་།ས་མིང་།གཏམ་རྒྱུད་སོགས་ཡོད་ལ།ད་དུང་།རུ་དམག་གི་རྟགས་ཐམ་དང་།ཁྱུང་མགོ་ཏོག་བྱས་ནས་བརྒྱན་པའི་རུ་དར།རླུང་རྟ།ལྷ་ཁང་སོགས་སུ་བྱ་ཁྱུང་གི་གཟུགས་རིས་བཀོལ་ཏེ་ཚེ་ཚེ་རབས་རབས་སུ་ཡོང་བ་སྨོས་མ་དགོས་ལ།ཁྱུང་འདིར་གོ་བ་ལེན་སྟངས་ཀྱང་མི་འདྲ་བ་རེ་ཟུང་ཡོད་པ་དེ་དག་བརྗོད་ན།

དང་པོ།ཁྱུང་ནི་བྱ་རིགས་ཤིག་ཡིན་པ།

བྱ་ཁྱུང་གི་ལོ་རྒྱུས་ནི་ཡིག་ཐོག་ཏུ་བཀོད་ཡོད་པ་དཀོན་མོ་ཡིན་པ་མཁས་དབང་དུང་དཀར་རིན་པོ་ཆེས་གསུངས་ལ།ཡིན་ཡང་།ངག་རྒྱུན་དུ་བཤད་པའི་ཁྱུང་ནི་འདབ་ཆགས་བྱ་རིགས་ཤིན་ཏུ་ཆེན་པོ་རྐང་ལག་བཞི་ཅན་ཞིག་སྟེ།ལུས་པོ་ནི་མིའི་ཤ་ཚུགས་ཅན།ལག་པ་མིའི་ལག་པ་དང་།རྐང་པ་བྱའི་རྐང་པ་ཅན།མཆུ་བྱའི་མཆུ་ཅན་ཞིག་ཡིན་ལ།གཤོག་པའང་ཡོད་པས་མི་ཚད་མགོ་ན་རྭའང་ཡོད་པ་ཞིག་ཡིན་འདུག བྱ་ཁྱུང་ལ་སྤུ་མདོག་སྣ་ཚོགས་བྲིས་འདུག་པ་ལས་བྱ་ཁྱུང་སྤུ་མདོག་ཁྲ་བོའི་རིགས་ལ་ཁྱུང་ཁྲ་ཞེས་བཤད་པར་སྣང་ཞིང་།སྤུ་མདོག་སྔོན་པོ་བྲིས་པ་ནི་མང་ངོ་།།བྱ་ཁྱུང་གི་མིང་གཞན་ལ།ནམ་མཁའ་ལྡིང་དང་།རི་ལ་གནས་པ།ཤལ་མ་ལིར་གནས།ལྷ་རྒྱལ་འདུལ།ཕྲེང་ལྡན།རྡོ་རྗེའི་མཆུ་ཅན།བདུད་རྩི་སྐྱེས།འོད་སྲུང་སྐྱེས།ལག་འགྲོའི་ཟས་ཅན།ཀླུ་མཐར་བྱེད།འདབ་བཟང་།འུག་པའི་བདག་པོ་སོགས་ཤིན་ཏུ་མང་བ་ལ་འགྲེལ་ཚུལ་ཡང་རེ་རེ་ཡོད་པས་བྱ་ཁྱུང་ལ་ངོས་འཛིན་སྟངས་མང་བར་ངེས་ཤིང་།ད་རུང་།ངག་རྒྱུན་དུ་བྱ་རྒྱལ་ཁྱུང་ཆེན་ཞེས་དང་།ལེགས་སྦྱར་སྐད་དུ་གརུཌཿཞེས་འབོད་ཅིང་།གང་ལྟར་འདི་ནི་བྱ་རིགས་ཤིན་ཏུ་འཕུར་ལྡིང་སོགས་ནུས་སྟོབས་ཅན་ཞིག་ཡིན་པ་སྟེ།དཔེར་ན།ཁྱུང་མཁའ་ལྡིང་སྙི་ལ་འཛིན་ཐབས་མེད།།སྟག་དམར་ཡག་ཐག་པས་བཏགས་ཐབས་མེད།།ཅེས་པ་ལྟ་བུའོ།།ད་དུང་།བོད་ཀྱི་ས་ཁུལ་ལ་ལར་རྡོ་ཕ་བོང་ཆེན་པོའི་སྟེང་དུ་བྱ་ཁྱུང་གི་སྡེར་རྗེས་ཆེན་པོ་དཔར་བའི་ཤུལ་རྗེས་ད་ལྟའང་མཐོང་རྒྱུ་ཡོད་པར་སྨྲའོ།།

གཉིས་པ།ཁྱུང་ནི་བོད་ཀྱི་རུས་ཤིག་ཡིན་པ།

ཁྱུང་གི་རུས་འདི་བོད་ལ་ཆེས་གནའ་བོའི་དུས་ནས་ཡོད་ངེས་ཤིང་།བོད་རྒྱལ་གཉའ་ཁྲི་བཙན་པོའི་སྐབས་ཀྱི་ཡབ་འབངས་རུས་དྲུག་ཅེས་གྲགས་པའི་གྲས་ཀྱི་ཁྱུང་པོ་ཞེས་པ་དེ་ཡིན་ལ།རྗེས་སུ་བཙན་པོ་གནམ་རིའི་སྐབས་སུ་གཙང་བོད་ཀྱི་རྒྱལ་པོ་མར་མུན་གྱི་མགོ་བཅད་དེ་དུད་ཁྱིམ་ཉིས་ཁྲི་མངའ་འོག་ཏུ་བཅུག་པའི་ཁྱུང་པོ་སྤུང་ཟད་ཟུ་ཙེ་ཡང་ཁྱུང་གི་རིགས་རྒྱུད་ཡིན།མ་ཟད།བོད་ཀྱི་ཡུལ་ལུང་ཀུན་ཏུ་ཁྱུང་པོའི་རིགས་ཤིན་ཏུ་མང་བའོ།།འདི་ལ་ཁྱུང་པོ་དཀར་ནག་སེར་གསུམ་ཞེས་བཤད་སྲོལ་ཡོད་པ་ནི།བོད་ཀྱི་རུས་རྒྱུད་ཁྱུང་པོའི་རིགས་རྣམས་ཀྱི་མི་རྒྱུད་དང་པོ་ཁྱུང་གི་སྒོ་ང་དཀར་པོ་དང་།ནག་པོ།སེར་པོ་གསུམ་བྱུང་བ་ལས།དཀར་པོ་མངའ་རིས་སུ་ཆགས་པ་ལས་མངའ་རིས་ཀྱི་ཁྱུང་པོ་དང་།ནག་པོ་གཙང་དུ་འཕུར་བ་ལས་གཙང་སྟོད་ཀྱི་ཁྱུང་པོ།སེར་པོ་ཁམས་སུ་འཕུར་བ་ལས་ཁྱུང་པོ་སེར་ཚ་ཞེས་བར་ཁམས་ཁུལ་གྱི་ཡུལ་མི་རྣམས་བྱུང་ཞེས་བཤད་སྲོལ་ཡོད་པ་དང་།བོད་ཀྱི་རུས་མཛོད་སོགས་སུ་བསེ་ཁྱུང་སྦྲ་ཞེས་བྱུང་བ་ལྟར།ཁྱུང་པོའི་རིགས་ནི་བོད་ཀྱི་རུས་ཆེན་སྦྲ་ལ་གཏོགས་པ་སོགས་མང་བས་སོ།།

གསུམ་པ།ཁྱུང་གི་ཁ་ཟས།

བྱ་ཁྱུང་གིས་ཁ་ཟས་སུ་སྦྲུལ་གདུག་པ་ཅན་སོགས་ཟ་བར་གྲགས་ཤིང་།གཟུགས་རིས་མཐོང་སྣང་དུ་སྦྲུལ་སྔོ་ནག་དང་།དམར་པོ།དཀར་ཁྲ་སོགས་ཡོད།འདི་ལ་གཞན་དུ་གཏམ་རྒྱུད་བཀོད་ཡོད་པ་ལྟར་བཤད་ན།རྒྱ་གར་གྱི་ཕྱི་རོལ་པའི་གཏམ་རྒྱུད་དུ།སྔོན་རྒྱལ་པོ་ཞིག་ལ་བཙུན་མོ་འདུལ་བྱེད་མ་དང་བཀྲ་ཤིས་མ་ཞེས་པ་གཉིས་ཡོད་ཅིང་།ལན་གཅིག་བཙུན་མོ་གཉིས་ཉི་མའི་ཤིང་རྟ་མཐོང་བས།འདུལ་བྱེད་མས་དཀར་པོ་དང་བཀྲ་ཤིས་མས་ནག་པོ་ཡིན་ཞེས་རྩོད་ཅིང་རྒྱལ་བྱས་ཏེ།གང་བདེན་པ་རྒྱལ་པོའི་བཙུན་མོ་དང་མི་བདེན་པ་གཡོག་མོ་བྱེད་པ་བྱས།དེ་ནས་ཀླུ་ཞིག་ཡོད་པ་ལ།བཀྲ་ཤིས་མས་བསྙེན་བཀུར་བགྱིས་ཏེ།ཁྱོད་ཀྱིས་ཉི་མའི་ཤིང་རྟ་ནག་པོར་མཐོང་བར་གྱིས་ཤིག་བྱས་པས་དེས་ཁས་བླངས་སོ།།དེ་ནས་བཙུན་མོ་གཉིས་ལྷན་དུ་ཀླུ་དེའི་གནས་སར་ཕྱིན་ཏེ་དྲིས་པས།ཉི་མའི་ཤིང་རྟ་ནག་པོ་ཡིན་བྱས་པས་འདུལ་བྱེད་མ་གཡོག་མོ་བྱེད་དགོས་པ་བྱུང་བས་ཤིན་ཏུ་སྡུག་བསྔལ་བར་གྱུར་པ་ན།དྲང་སྲོང་སྐར་མིག་གིས་སྒོ་ང་གསུམ་བྱིན་ཏེ།འདིས་ཁྱོད་ལ་ཕན་པར་འགྱུར་གྱིས།ཞག་བདུན་རིང་མ་རྟོལ་ཞིག་ཟེར་རོ།།དེ་འདོད་པ་མྱུར་བས།ཉི་མ་གསུམ་ན་གཅིག་བརྟོལ་བ་ན།གློག་ཏུ་གྱུར་ཏེ་ནམ་མཁའ་ལ་སོང་ངོ་།།ཡང་དྲུག་ན་གཅིག་བརྟོལ་བས།སྐར་མ་སྐྱ་རེངས་སུ་སོང་ངོ་།།བདུན་པ་ན་གཅིག་བརྟོལ་བ་དང་བྱ་ཁྱུང་དུ་སོང་སྟེ་མ་ལ་ཕྱག་བྱས་ཏེ།ཁྱེད་ཀྱི་བྱ་བ་གང་དགོས་པ་བདག་གིས་བྱའོ་ཞེས་ཟེར།ཀླུ་ཡིས་ཉེས་པས་ཀླུ་རྣམས་མེད་པར་གྱིས་ཤིག་ཅེས་སྨྲས་པས།དེ་ནས་བཟུང་བྱ་ཁྱུང་གིས་ཀླུ་རྣམས་ཟ་བར་བྱེད་དོ་ཞེས་སོགས་ཀྱི་གཏམ་རྒྱུད་ལྟར་ན།བྱ་ཁྱུང་གིས་སྦྲུལ་ཟས་སུ་བྱས་པ་དེའང་ཀླུ་དང་འབྲེལ་བའི་སྦྲུལ་ཟ་བར་སྣང་ལ།འདི་ལ་ཡང་བཤད་ཚུལ་ཞིག་ཡོད་པ་ནི།ཐོག་མར་བྱ་ཁྱུང་གིས་མཚོ་སྦྲུལ་ཟས་སུ་བྱེད་ཅིང་།མཐར་རྒས་ཤིང་འཁོགས་ནས་རྒྱ་མཚོར་ལྷུང་སྟེ་ལྟོགས་ཤི་སོང་བའི་སྙིང་རྒྱ་མཚོའི་ནང་དུ་ལོ་མང་པོར་ལུས་པ་དེ་ནི་རྙེད་པར་དཀའ་བའི་ནོར་བུ་བསམ་འཕེལ་དབང་གི་རྒྱལ་པོ་ཡིན་ཞེས་གཏམ་རྒྱུད་དུ་གྲགས་པ་སོགས་མང་ངོ་།།