དྲིན་ཆེན་གྱི་ཨ་ཕ་ལགས། ཁྱེད་ནི་བདག་ལ་མཚོན་ན་ངའི་ཚེ་སྲོག་དང་བདེ་སྐྱིད་ཅིག་ཏུ་སྒོམ་ཆོག བདག་གི་སྙིང་དབུས་ཀྱི་ཁྱེད་ནི་ཅི་འདྲའི་རླབས་ཆེན་གྱི་སྐྱེས་བུ་ཞིག་རེད་ཨང་། ཁྱེད་ཀྱིས་དཀའ་ཚེགས་ལ་མི་འཛེམ་པར་ཁྱིམ་ཚང་འདི་ཡི་ཡོད་ཚད་ནས་ཡོད་ཚད་ཕྲག་ཏུ་ཁུར་ཞིང་། ཁྱེད་ཀྱིས་དུས་གཏན་དུ་ཁྱིམ་ཚང་འདིའི་ཆེད་དུ་ནང་སྔ་ལངས་དང་དགོང་ཕྱི་ཉལ་བྱེད་བཞིན་མཆིས། དྲིན་ཆེན་གྱི་ཕ་ལོ་ལགས། ཁྱེད་ཉིད་འོ་བརྒྱལ་ཆེ་སོང་། ཁྲེལ་མེད་ཀྱི་བུ་མོ་ངས་ད་ལྟའི་བར་དུ་ཁྱེད་ལ་བཀའ་དྲིན་ཞུ་རྒྱུ་ལྟ་ཞོག ཐ་ན་ཁྱེད་ཀྱི་ཞབས་ཕྱག་ཐེངས་གཅིག་ཀྱང་བཀྲུ་མ་མྱོང་།

    བདག་གི་འཆར་ཡན་གྱི་མེ་ལོང་ངོས་ནས་ཆེས་ཡལ་ཐབས་བྲལ་བ་ནི། གྲང་ངར་ཆེ་བའི་དགུན་ཁའི་ཉིན་ཞིག་གི་ཞོགས་པ་སྟེ། ཉིན་དེའི་ཞོགས་པར་ང་རང་མལ་ལས་ལྡང་སྟེ་སྒེའུ་ཁུང་ལས་ཕྱི་རོལ་ལ་བལྟས། ཕྱི་རོལ་ཡུལ་གྱི་འཇིག་རྟེན་དཀར་ལམ་མེར་བྱེད་ཅིང་། དངུལ་དཀར་གྱི་ན་བཟའ་མནབས་ཡོད་པ་དང་གཉིས་སུ་མ་མཆིས། ངའི་སེམས་པ་སྤྲོ་བས་ཁེངས་བཞིན་ཕྱི་རུ་སོང་། ང་རང་སྒོ་ཕྱི་ལ་བུད་མ་ཐག་ཏུ་ཐོག་དང་པོར་མིག་ལམ་དུ་མཐོང་བ་ནི་ལྷད་མེད་ཀྱི་བྱམས་བརྩེ་ལྡན་པའི་ཕ་ལོ་ཁྱེད་ཉིད་རེད། དེ་མ་ཐག་ཏུ་བདག་གི་སེམས་ལ་བརྗོད་དཀའ་བའི་ཕངས་པ་ཞིག་སྐྱེས་བྱུང་། རྒྱུ་མཚན་ནི། གནམ་གཤིས་འདི་འདྲའི་གྲང་ངར་ཆེ་ལ་ལྷ་ལམ་ལས་ཁ་བའི་མེ་ཏོག་བར་མེད་དུ་འབབ་པའི་ཉིན་མོ་འདིར། དྲིན་ཆེན་གྱི་ཕ་ལོ་ཁྱེད་ཀྱིས་ད་དུང་ཁྱིམ་ཚང་གི་བདེ་སྡུག་ཡོད་ཚད་ཐུགས་ལ་དགོངས་ནས་ཕྱི་རོལ་ཏུ་ངལ་རྩོལ་བྱེད་བཞིན་གདའ། ངའི་མིག་ལམ་ལས་མཆི་མ་རང་དབང་མེད་པར་ཤེལ་ཕྲེང་གི་ཕྲེང་ཐག་ཆད་པ་ལྟར་འཐོར་བྱུང་། ཨ་ཕས་ང་རང་མཐོང་མ་ཐག་ཏུ་ལག་གི་ལས་ཀ་བཞག་ནས་ངའི་ཕྱོགས་སུ་ཡོང་། ངའི་གམ་དུ་ཡོང་ནས་ང་ལ་བཤད་རྒྱུར། མགྱོགས་པོར་ཕྱིར་ཁྱིམ་ལ་འགྲོ་རོགས། ཁྱིམ་ལ་སོང་ནས་དཔེ་ལྟ་ཡག་པོ་བྱོས། རྗེས་སུ་ང་ཚོ་ལྟ་བུའི་དཀའ་སྡུག་མྱོང་མི་དགོས་པའི་མི་ཞིག་ཏུ་འགྱུར་བར་འབད་བརྩོན་ལྷོད་མེད་བྱེད་དགོས་ཟེར། ཨ་ཕའི་གསུང་འདི་ཐོས་མ་ཐག་ངས་རང་གི་སེམས་ལ་དམ་བཅའ་ཞིག་བཞག་པ་ཡིན། དེ་ནི་ང་རང་གིས་རང་ནུས་ཅི་ལྕོག་གིས་སློབ་སྦྱོང་ལ་འབད་པ་བྱས་ནས། རྗེས་སུ་ཕ་མ་ལ་དྲིན་ལན་མཇལ་རྒྱུ་དེ་ཡིན།

    དྲིན་ཆེན་གྱི་ཕ་ལོ་ལགས། ཁྱེད་ཀྱི་བཀའ་དྲིན་ནི་རི་རབ་ལས་མཐོ་ཞིང་བརྩེ་སེམས་ནི་རྒྱ་མཚོ་ལས་ཀྱང་ཟབ་། ཁྱེད་ཀྱི་བཀའ་དྲིན་ནི་བུ་མོ་ངའི་སེམས་ནང་ན་རྡོ་བརྐོས་རི་མོ་བཞིན་ཡོད། བདག་གིས་སློབ་སྦྱོང་ཡག་པོ་བྱས་ནས་ཁྱེད་ལ་དྲིན་ལན་མཇལ་ངེས་ཡིན།