འཛུགས་སྐྲུན་གྱིས་རྣམ་པར་མཛེས་པའི་གྲོང་དང་གྲོང་རྡལ།   གྲོང་ཁྱེར་དང་ལྗོངས་དེ་དག་མིག་ལམ་དུ་འཆར་དུས།   ང་ཚོས་ཅིས་ཀྱང་བརྗེད་མི་རུང་བ་ནི་ལུས་ངག་ཡིད་གསུམ་གྱིས་དཀའ་བ་དང་དུ་ལེན་པའི་འཛུགས་སྐྲུན་པ་རྣམས་ཡིན།

      ཆེས་མཛེས་སྡུག་ལྡན་པའི་འཛུགས་སྐྲུན་གྱི་སྣེ་མོར།   ཆེས་ཁྱད་དུ་འཕགས་པའི་བཟོ་རྩལ་གྱི་ངོས་ནས།   འཛུགས་སྐྲུན་གྱི་བྱེད་པོ་རྣམ་པའི་ངལ་བ་ག་ཚོད་ཅིག་འཇལ་མི་ཐུབ་བམ།   རྣམ་དཔྱོད་དང་མིག་འབྲས་རིང་བའི་གྲུབ་འབྲས་ག་ཚོད་ཅིག་དཔག་མི་ཐུབ་བམ།   འོན་ཏེ་ང་ཚོས་ཁོང་རྣམ་པར་གླ་པའི་འདུ་ཤེས་ཙམ་ལས་རྒྱལ་ཁབ་གྱི་བདེ་བཀོད་མཛེས་པར་བྱེད་མཁན་ཞིག་ཏུ་ག་ལ་བསམ་མྱོང་།

      སྟོབས་འབྱོར་མངའ་ཐང་རྒྱས་པའི་འཚོ་བའི་ངོགས་སུ།   འཆར་གཞི་གྲངས་མེད་ཅིག་གི་ཟབ་ཚད་ནས།   འཛུགས་སྐྲུན་པས་དཀའ་བ་ག་ཚོད་ཅིག་ཁྱད་གསོད་བྱས་ཏེ།   འཛམ་བུའི་གླིང་དུ་བླ་ན་མེད་པའི་རྒྱལ་ཁོངས་ཀྱི་འཛུགས་སྐྲུན་ཆེས་དམིགས་དཔེར་འོས་སའི་གཞི་རུ་འགྱུར་བ་བྱས་མེད་དམ།   

       དབུ་ལ་བདེ་འཇགས་ཀྱི་ཞྭ་མོ་གྱོན་ཞིང་ཕྱག་ཏུ་སྦྱག་མ་སོགས་པའི་ལག་ཆ་བཟུང་ཏེ།   ཉིན་མཚན་དུས་དྲུག་ཀུན་ཏུ་དཀའ་སྤྱད་འབད་བརྩོན་བྱེད་པ་ནི།   མ་འོངས་པའི་མེས་རྒྱལ་སྔར་བས་མཛེས་སྡུག་ལྡན་པ་ཞིག་ཏུ་འཛུགས་སྐྲུན་བྱེད་པའི་སྙིང་སྟོབས་ཤིག་ཡིན།   མགོ་རྟིང་ཀུན་ཀྱང་ཐལ་བས་འབག་མོད།   རིག་པ་སྐྱེན་པོས་ཨར་ལས་ལ་འབད་པ་དེ་ཁོ་ནས་མིའི་རིགས་ཀྱི་འབྱུང་འགྱུར་ལ་འོད་ཟེར་སྦྱིན་པའོ། 

      སེར་གས་བཏུམས་པའི་ཕྱག་ཟུང་ལ་དལ་ཁོམ་མེད།   རྔུལ་ཆུས་བརླན་པའི་བར་ཚིགས་སུ་ཡང་ངལ་གསོ་བའི་དུས་ཡུན་ལ་དམ་འཛིན་བྱེད་དགོས།   ནམ་ཡང་སེམས་ན་འཕྱོ་བའི་མེས་རྒྱལ་གྱི་མཚར་སྡུག་ལ་མནོ་བསམ་གཏོང་གིན།   གསར་གཏོད་ཀྱི་གོང་བུར་ཀུན་ཀྱང་ཡིད་ཁ་འཇོ་བའི་བདེ་བའི་དཔལ་ལ་བཀོད།

      ང་རང་ཆེས་དུངས་སའི་མི་ལགས།   ཁྱོད་ཀྱིས་ཆེས་དཀའ་ཁག་ཆེ་བའི་འབད་བརྩོན་གྱི་སྣེ་མོ་ནས།   ཆེས་བསྔགས་པར་འོས་པའི་འཛུགས་སྐྲུན་གྱི་བྱ་གཞག་མང་དག  །རིམ་པར་མིའི་རིགས་ཀྱི་མིག་ལམ་དུ་སྟར་བར་ངེས་སོ། 

      དུས་བཞིའི་འགྱུར་བག་གི་དབུས་སུ།   དལ་ཁོམ་མེད་པའི་འཛུགས་སྐྲུན་པས་རང་ཉིད་མིའི་རིགས་ལ་ལེགས་སྐྱེས་འབུལ་བཞིན་ཡོད་དེ།   ཆེས་རླབས་ཆེ་བའི་མཛད་འཕྲིན་གྱི་ཕ་མཐར།   ཁོང་རྣམ་པ་ནི་འཕྲུལ་ཆས་རྩེར་སོན་པ་ཞིག་ཡིན།   དེས་ན་ང་ཚོས་ཀུན་ཏུ་བརྗེད་མི་བཏུབ་པ་ནི་འཛུག་སྐྲུན་གྱི་བྱེད་པོ་རྣམ་པའི་གཟི་བརྗིད་ཡིན།

      བླ་ན་མེད་པའི་རྒྱལ་ཁོངས་ཀྱི་གསར་གཏོད་དབྱར་མཚོ་བཞིན་དུ་རྒྱས་པའི་དུས་རབས་ཉེར་གཅིག་གི་ཕང་བར།   འཛུགས་སྐྲུན་པའི་ངོ་མཚར་གྱི་གསར་གཏོད་དེ་དག  །གཏན་དུ་ཉམས་པ་མེད་པའི་དཔའ་སྟོབས་ཤིག་ཡིན།   མིའི་རིགས་ཀྱི་ཡིད་ཁ་འཇོ་བའི་ལེགས་གྲུབ་ཀྱི་ངོས་གཞི་རྨད་དུ་བྱུང་བ་ཞིག་ཀྱང་ཡིན།

      མཛེས་སྡུག་ལྷུན་གྱིས་ཆགས་པའི་ཁོར་ཡུག་འདིའི་ཕྱི་ནང་དུ།   རང་ཉིད་ཀྱི་ནུས་ཤུགས་ཡོད་ཚད་གཞན་གྱི་བདེ་སྐྱིད་ལ་ལེགས་སྐྱེས་འབུལ་བའི་འཛུགས་སྐྲུན་གྱི་བྱེད་པོ།   ཉི་ཟེར་བས་ཀྱང་ཆེས་འོད་སྟོང་ལྡན་པ་ནི་ཁྱེད་རྣམ་པའི་གསར་གཏོད་ཀྱི་གྲུབ་འབྲས་སོ།