ངའི་ཕ་ཡུལ་ནི་ཀྲུང་གོའི་གཞས་ཀྱི་ཕ་སའམ་དྲི་ཞིམ་ཀུ་ཤུའི་ཕ་ཡུལ་ཏེ་འབའ་ཐང་རྫོང་གི་ཤར་ཕྱོགས་སུ་སྤྱི་ལེ150ལྷག་ཡོད་པའི་ཀུན་འཛོམས་གྲོང་སྡེ་ཡིན།དེ་ནི་ང་རང་ལྟེ་ཁྲག་འཕོ་ས་དང་བྱིས་དུས་ཀྱི་འཚོ་བ་རོལ་ས་ཡིན་པས་ཕ་ཡུལ་ལ་ནམ་ཡང་ཐུན་མིན་གྱི་དུང་སེམས་ཆེན་པོ་ཞིག་ངང་ངམ་ཤུགས་ཀྱིས་སྐྱེས།སྟབས་ལེགས་པ་ཞིག་ལ་ན་ལོའི་རྒྱལ་སྟོན་དུས་ཆེན་གྱི་གུང་གསེང་གཏོང་བའི་དུས་དང་བསྟུན་ནས་ང་རང་ཕ་ཡུལ་དུ་ཉེ་འཕྲད་ཐེངས་ཤིག་ཕྱིན་པ་ཡིན།ཕ་ཡུལ་དུ་སླེབས་མ་ཐག་གཉེན་ཉེ་བ་དང་ཤག་ཕོ་བཤེས་རྣམས་འཚང་ཁ་བརྒྱབ་ནས་ང་ལ་ཁ་ལན་བྱེད་ས་སླེབས་བྱུང་།ཁོང་ཚོ་དང་ཁ་བརྡ་བྱེད་པའི་ཁྲོད་དང་ང་རང་ཕ་ཡུལ་དུ་སླེབས་པའི་མཐོང་ཐོས་མྱོང་གསུམ་བཅས་གང་ཅིའི་ཐད་ནས་བལྟས་ཀྱང་མཐའ་འཁོབ་ཏུ་གནས་པའི་ཕ་ཡུལ་ལ་འཕོ་འགྱུར་ཆེན་པོ་བྱུང་འདུག་སྟེ་འགྲོ་ལམ་བདེ་ཞིང་འཐུང་ཆུ་སྒོ་ཁར་སླེབས་པ་དང་།གློག་གིས་འདང་ཞིང་བརྡ་འཕྲིན་བཟང་བར་མ་ཚད།དུད་ཁྱིམ་སོ་སོར་འཕྲུལ་རྟ་རེ་དང་ལག་ཁྱེར་ཁ་པར་རམ་གདན་འཇོག་ཁ་པར་རེ།ཉི་ནུས་ཆུ་སྲོ་ཆས་རེ་མེད་མཁན་ཧ་ཅང་དཀོན་ཞིང་།དུད་ཚང་ཁ་ཤས་ཀྱིས་ད་དུང་འདྲུད་འཐེན་འཁོར་ལོ་ཡང་ཉོས་འདུགསྔོན་ཆད་སྒོ་ཟོག་ཁྲོད་མེད་དུ་མི་རུང་བ་ནི་མཛོ་ཡིན་པས་ད་ལྟ་མཛོ་ཡང་མཐོང་དཀོན་པོ་རེད་འདུག  ཡུལ་མི་ཚོ་ལ་རྒྱུ་མཚན་དྲིས་དུས་ད་ལྟ་དུད་ཚང་མང་ཆེ་བས་ཞིང་རྨོ་འཕྲུལ་ཆས་སྤྱོད་བཞིན་ཡོད་པས་མཛོ་ནི་རུ་བར་འགྲོ་དུས་ཁལ་འཁེལ་བ་ཙམ་ལས་བེད་མེད་པའི་དབང་གིས་གཞན་ལ་བཙོང་བའམ་བཤས་ཁོངས་སུ་བཏང་ཟིན་པ་ཧ་གོ་བྱུང་།གཉེན་ཉེ་བ་ཚོས་ང་རང་མགྲོན་པོ་བོས་ནས་ཅི་དགའ་གང་དགའ་བྱས་ཤིང་དུད་ཚང་གང་ལ་སོང་བ་ཡིན་ཡང་ཁང་པ་གསར་ཞིང་རྒྱ་ཆེ་བ་དང་ཐོག་མཐོ་ལ་ནང་གཅོད་ཡག་པར་མ་ཚད།ཁྱིམ་དུ་དེང་རབས་ཀྱི་གློག་ཆས་འཛོམས་དགོས་ངེས་ཚང་མ་འཛོམས་འདུགགངས་ཆུ་དང་རྫ་ཆུས་བསྐོལ་བའི་སྲུབ་ཇ་ཞིམ་པོ་འཐུང་ཞོར་ཁ་བརྡ་ལབ་པའི་ཁྲོད་དུ་ན་ལོར་ཞང་བཟའ་མནའ་བཀྲ་ཤིས་ལ་སྙིང་ནད་ལྕི་མོ་ཞིག་ཕོག་པས་ཡུན་ནན་ཞིང་ཆེན་ཏཱ་ལི་སྨན་ཁང་ཆེན་མོར་སྨན་བཅོས་བྱེད་སར་སོང་ནས་སྒོར་མོ་ཁྲི་མང་པོ་སྨན་རིན་ཤོར་སོང་བའི་སྐོར་ཤེས་བྱུང་།དེ་ནས་ངས་ཁོམ་སྐབས་ཤིག་བཙལ་ནས་ཞང་པོ་ཚང་གི་ཁྱིམ་དུ་འཚམས་འདྲི་དང་འཁྱམ་གོ་ཉིས་ཆོད་བྱས་ནས་ཕྱིན་པ་ཡིན།ཞང་པོ་དང་ཞང་བཟའ་གཉིས་ཀྱིས་ང་རང་ཁྱིམ་དུ་བསུས་རྗེས་ཇ་ཆང་གིས་སྣེ་ལེན་གཟབ་རྒྱས་བྱས་རྗེས་ཞང་བཟའ་སྨན་ཁང་འགྲོ་རབས་བཤད་བྱུང་།ན་ལོའི་ཟླ་བ9པར་ནམ་རྒྱུན་ཆམ་དྲི་ཙམ་ཡང་བྲོ་མི་མྱོང་བའི་ང་རང་གི་སྙིང་དྲག་ཏུ་འཕར་ཤིང་དབུགས་ཧལ་བར་མ་ཟད་བརྒྱལ་ཐེངས་ཀྱང་མང་པོ་རེད་ཐལ།འབའ་ཐང་སྨན་ཁང་དུ་ཕྱིན་ནས་བརྟག་དུས་སྙིང་གི་རྩ་ཆེན་ལ་ནད་ཚབས་ཆེན་ཕོག་ཡོད་པ་དང་ད་ལྟ་མྱུར་དུ་ཆ་རྐྱེན་འཛོམས་པའི་སྨན་ཁང་ཆེན་པོ་ཞིག་ལ་སོང་།ཐོག་མར་སྒོར་མོ་མང་ཙམ་གྲ་སྒྲིག་གྱིས་ཞེས་ཟེར་བྱུང་།ང་རང་ཧན་ཐོར་ནས་ཁ་ཡང་གྲག་རྒྱུ་མེད་པ་ལུས་ཤིང་དེ་ནས་བཟུང་ཅི་གོ་འདི་གོ་མེད་པ་རེད་ཐལ།ཡར་ཅིག་སད་དུས་ཏཱ་ལི་སྨན་ཁང་ཆེན་མོར་སླེབས་ཚར་འདུགཁྱིམ་མི་ཚང་མ་དང་གཉེན་ཉེ་བ་མང་པོས་ལྷ་རྔ་ཚ་མོའི་སྟེང་གི་འབུ་གྲོག་མ་བཞིན་ཡར་རྒྱུག་དང་མར་རྒྱུག་བྱས་ནས་དངུལ་སྐྱི་ས་འགྲོ་བ་དང་།ཨ་རོགས་སྤར་རོགས་བྱས་པ་ལ་བརྟེན་ནས་སྒོར་མོ་ཁྲི་བཅོ་ལྔ་ཙམ་འདུས་འདུགང་ལ་སེམས་ཁྲལ་མ་བྱེད།མི་མི་ཤི་ན་བློ་མི་ཟད་ཟེར་བ་སོགས་ཀྱིས་སེམས་གསོ་གང་མང་བྱས་ཀྱང་ངའི་སེམས་པ་ད་དུང་གྲང་ཤུར་ཤུར་དང་སྟོང་འཁྱར་འཁྱར་རེད།ཏཱ་ལི་སྨན་ཁང་དུ་ངའི་ནད་དང་འདྲ་བའི་ནད་པ་ད་དུང་གཅིག་འདུགསྨན་པ་གང་མཁས་ཀྱིས་བརྟག་ཀྱང་གཤག་བཅོས་མི་བྱེད་ཐབས་མེད་རེད།འོན་ཀྱང་གཤག་བཅོས་བྱེད་ཐུབ་མཁན་སྨན་པ་ང་ཚོའི་སྨན་ཁང་ནང་དུའང་མེད་ཅེས་ཟེར་བ་ཚོར་དུས་ང་རང་ཡང་བརྒྱལ་ཐལ།དུས་ཚོད་ནམ་ཙམ་བརྒལ་སོང་བ་མི་ཤེས་པ་ང་རང་ཡར་སད་དུས་ནད་ཁྲིའི་ཐོག་ཉལ་སྣང་།འཁྲིས་སུ་སྨན་པ་དང་ཁྱིམ་མི་ཚོ་ལངས་ནས་ང་ལ་ལྟ་གི་འདུགསྨན་པས་ད་སད་བྱུང་སྐྱོན་རྒྱུ་མ་རེད་ཅེས་ཟེར་བ་ཐོས་པ་དང་ངའི་སེམས་པ་ལྷོད་ཆེམ་མེར་སོང་ཞིང་སྙིང་ཡང་མི་ན་བའི་ཚོར་སྣང་སྐྱིད་པོ་ཞིག་ཤར་བྱུང་།ཁྱིམ་མི་ཚོར་མིག་འགྲེས་ནས་ལྟ་དུས་ཁོ་ཚོའི་ངོ་གདོང་དུ་ཡང་དགའ་སྤྲོའི་འཛུམ་མདངས་ཀྱིས་ཁེངས་འདུགམ་གཞི་ནི་ཏཱ་ལི་སྨན་ཁང་གིས་སྨན་པ་ཚོས་གྲོས་བྱས་ཏེ་པེ་ཅིན་ནས་ཆེད་དུ་སྙིང་ནད་ཚན་ཁག་གི་སྨན་རམས་པ་ཞིག་གནམ་གྲུ་ནས་གདན་འདྲེན་ཞུས་ཏེ་ང་དང་ངའི་ནད་རོགས་གཉིས་ལ་གཤག་བཅོས་བྱེད་སར་ཡོང་བ་ཤེས་བྱུང་།ངོ་མ་སྨན་པ་ཚོ་དྲིན་ཆེ་མོ་ཡིན།དེ་ནས་ང་ཟླ་བ་གསུམ་དང་ཞག་མ་ལྔ་སྨན་ཁང་དུ་བསྡད་ནས་སྨན་བཅོས་བྱས་པས་སྙིང་ནད་ཀྱང་རིམ་གྱིས་དྲག་བྱུང་།སྨན་རིན་བསྡོམས་རྩིས་རྒྱག་དུས་སྒོར་ཁྲི133869སོང་འདུགསྨན་ཁང་ནས་ཕྱིར་ཐོན་ཁར་སྨན་པས་ང་ལ་རྗེས་སུ་གཟབ་གཟབ་བྱ་དགོས་པའི་དོན་ཚན་བཤད་པས་མ་ཚད་སེམས་ཁྲལ་མ་བྱེད།ཁྱོད་སྨན་བཅོས་ཉེན་འགོག་ནང་ཞུགས་ཡོད་པས་ནད་ཚབས་ཆེན་ཕོག་དུས་སྨན་རིན་རྩིས་ཞུ་ཡང་འབོར་ཆེན་བྱེད་ཐུབ་རེད་ཅེས་སེམས་གསོ་ཡང་ཡང་བྱས་བྱུང་།དེ་ནས་ཕ་ཡུལ་དུ་ལོག་རྗེས་ཤང་སྲིད་གཞུང་གི་ལས་སྒྲུབ་མི་སྣའི་བཀའ་དྲིན་ལ་བརྟེན་ནས་ཟླ་བ་གཉིས་ལས་མི་འགོར་བར་རྒྱལ་ཁབ་ཀྱིས་ང་ལ་མར་སྨན་རིན་ཁྱོན་བསྡོམས་སྒོར་ཁྲི114000རྩིས་ཞུ་བྱས་བྱུང་།ངས་བུ་ལོན་ཚང་མ་དུས་ཐོག་སེལ་ཐུབ་སོང་།ངོ་མ་རྒྱལ་ཁབ་ཀྱི་སྨན་བཅོས་ཉེན་འགོག་གི་སྲིད་ཇུས་བཟང་པོ་འདིས་ང་རང་གཤིན་རྗེ་ཆོས་ཀྱི་རྒྱལ་པོའི་ལག་ནས་ཐར་ཐུབ་སོང་།ཡང་མི་ཟས་འཆའ་ནས་ལོ་ཁ་ཤས་འདུག་ཆོག་པར་མ་ཟད་མ་ཎི་ཡང་མང་པོ་གསོག་ཐུབ་རྒྱུ་རེད།རྒྱལ་ཁབ་ནོར་བུའི་དྲིན་ལན་བརྗེད་ས་མེད་ཅེས་ཞང་བཟའི་མིག་ཟུང་ལས་དྲིན་གཟོའི་མཆི་མ་འཁོལ་བཞིན་དེ་ལྟར་བཤད་བྱུང་།མ་གཞི་ཞང་བཟའ་ནི་འབའ་ཐང་བཙལ་བ་གྲོང་སྡེའི་མི་ཡིན་ཞིང་མིང་ལ་བཀྲ་ཤིས་ཟེར་བ་དང་ཞང་པོ་ཚང་དུ་མནའ་མ་ཡོང་རྗེས་མི་ཚང་མས་མནའ་བཀྲ་ཤིས་ཞེས་འབོད་པས་མིང་དེ་ལྟར་ཆགས་སོང་བ་རེད།ང་རང་ཞང་པོའི་དྲོ་སྐྱིད་འཛོམས་པའི་ཁྱིམ་ཚང་ནས་ཁ་གྱེས་དུས་གསེར་ཉི་ལ་རྒྱབ་ཏུ་ཕྱིན་འདུག་པ་དང་།ད་ལྟ་ཚེ་མ་ཟད་ན་ནད་ལྟ་དཀའ་བ་དང་ལྟ་མི་ཐུབ་པའི་གནད་དོན་རྩ་བ་ནས་མི་འདུག་ཅེས་ཞང་པོས་བཤད་པའི་སྐད་ཆར་འདང་རྒྱག་བཞིན་རང་ཁྱིམ་དུ་ལོག་པ་ཡིན།།