ཕུག་རོན་དཀར་མོའི་གཤོག་འགྱུར་ཁྲོད་དུ་ཞི་བདེ་གཙང་མའི་ཕྱྭ་གཡང་འཁྱིལ།།ཡར་ཀླུང་གཙང་པོའི་རླབས་རིས་ངོས་སུ་ཆོས་རྒྱལ་བཙན་པོའི་ལོ་རྒྱུས་གསལ།།ཕོ་བྲང་དམར་པོའི་བང་མཛོད་ཁྲོད་དུ་གངས་ཅན་བོད་ཀྱི་གཙུག་ལག་མངོན།།རང་རིགས་འཕེལ་རྒྱས་ལམ་བུར་བསམ་བཞིན་སློབ་དཔོན་ཐོན་མིའི་བཀའ་དྲིན་དྲན།།
གངས་ཅན་མུན་པའི་མཐའ་འཁོབ་ལྗོངས་ལ་འོད་ཟེར་སྟོང་ལྡན་གྱི་ཉི་མ་འཆར་འདྲའི་སློབ་དཔོན་ཐོན་མི་ནི་བོད་རྒྱལ་སྲོང་བཙན་སྒམ་པོའི་ཆོས་བློན་ཡིན་ལ།  ཁོང་ཉིད་རྒྱ་གར་འཕགས་པའི་ཡུལ་དུ་བྱོན་ནས་བོད་རང་གི་བཅུ་ཕྲག་རིག་གནས་གསར་གཏོད་མཛད།  འདི་ནི་ཐོན་མི་རང་གི་མཛད་རྗེས་འབུར་དུ་ཐོན་པའམ་བསྙོན་དུ་མེད་པ་ཞིག་ཡིན་པ་མ་ཟད།  དེ་ལས་ཀྱང་འཕགས་པའི་ཡུལ་ནས་ནང་པའི་ཆོས་གཞུང་མང་པོ་བོད་དུ་བསྒྱུར་ཏེ་ནང་ཆོས་བསྟན་པའི་དྲི་བསུང་བར་སྣང་མཐོངས་སུ་ལྷང་ངེར་འཐུལ།  དེ་ལྟར་བོད་ལ་གཙུག་ལག་གི་རྒྱུན་ལེགས་པོར་སྤེལ་བས་ཐོན་མིའི་བཀའ་དྲིན་ནི་རྡོ་བརྐོས་རི་མོ་ལྟར་བསུབ་ཏུ་མེད་པ་ཞིག་ཡིན་ནོ།།
སློབ་དཔོན་ལགས་ཐོན་མི།  ང་རང་ཆུང་དུས་སུ་ཁྱེད་ཉིད་མཚན་ལས་ཅི་ཡང་མི་ཤེས།  རྗེས་ནས་ང་རང་ལོ་རྒྱུས་ཀྱི་གླེགས་བམ་ལས་ཁྱེད་ཉིད་མངོན་སུམ་མཇལ་ཚེ།  གཞི་ནས་ཁྱེད་ཀྱི་དཔའ་ངར་ཞུམ་མེད་ཀྱི་སྙིང་སྟོབས་དང་།  གློག་དམར་འཁྱུག་པའི་མྱུར་རྩལ་གྱི་རྣམ་དཔྱོད།  ངར་ལྕགས་ཀྱི་རང་གཤིས་ལྡན་པའི་དཔའ་བོ་ཞིག་ཡིན་པ་ཤེས་བྱུང་།  ད་དུང་ཁྱེད་ནི་གངས་ཅན་ལྗོངས་འདིའི་ལམ་སྟོན་གྱི་སྒྲོན་མེ་དང་།  གངས་ཅན་ལ་གསོན་ཉམས་ལྡན་པའི་ཟུངས་ཁྲག་བསྣན་ཞིང་།  ཁ་བ་རི་བོའི་སྙན་གྲགས་ཀྱི་དྲི་བཟུང་རྒྱང་རིང་ལ་ཁྱེར་བའི་དྲི་བཞོན་བུ་མོ་ཞིག་ཡིན་པའང་ཤེས་བྱུང་།
སློབ་དཔོན་ལགས་ཐོན་མི།  ཁྱེད་མེད་ན།  སྒྲ་རིག་པའི་ས་གཞི་གཤིན་པོ་མེད་ལ།  བཟོ་རིག་པའི་ཡུར་ཆུ་སུ་ཡིས་འདྲེན།  གསོ་རིག་གི་ཆུ་ལུད་དང་།  ཚད་མའི་མེ་ཏོག   ནང་རིག་པའི་འབྲས་བུ་ཅི་ལྟར་སྨིན།
ཁྱེད་ཀྱིས་མཁས་པའི་མེ་ཏོག་འདི་ནས་བཞད་ཅིང་།  རིག་གནས་ཀྱི་འོད་སྟོང་འདི་ནས་འགྱེད་པས།  མ་ཡུམ་གངས་ལྗོངས་ལ་འཆི་མེད་ཀྱི་བདུད་རྩི་བསྩལ།  མ་ཡུམ་གྱི་ཐུགས་སུ་ཁྱེད་ནི་གཅེས་ཕྲུག་ལྷག་བསམ་ཅན་ཞིག་ཡིན་ལ།  གངས་རིའི་ར་བར་སྐྱེས་པའི་སྤུན་མཆེད་ཡོངས་ཀྱི་སྙིང་དབུས་ཀྱི་ཉི་མ་ཡིན་ནོ།།