སློབ་མགོ་རྩོམ་པའི་ཚོགས་ཐོག་ཏུ།སློབ་གཙོས་ད་ལོའི་གཅིག་གྱུར་གྱི་ཚོད་རྒྱུགས་ལ་ཞུགས་པའི་འཛིན་གྲྭ་ནི་ལོ་རིམ་གསུམ་པ་རེད་ཟེར།དེར་མཐུད་ནས་ཁོས་འཛིན་བདག་གིས་དུས་ཚོད་དམ་འཛིན་གྱིས་གྲ་སྒྲིག་བཟང་པོ་བྱེད་དགོས་ཚུལ་གྱི་གནས་ལུགས་མང་པོ་ཞིག་བཤད་སོང་། 
 སྣང་ཚོད་ལ་ཉིན་ཞག་གི་འཁོར་ལོ་དལ་འགྲོས་བྱེད་པ་འདྲ་མོད།སློབ་སྐབས་འདིའི་སློབ་མཇུག་རྫོགས་ལ་ཉེ་ཞིང་ཚོད་རྒྱུགས་ཀྱི་ཉིན་མོའང་ཇེ་ཉེ་ནས་ཇེ་ཉེ་རེད།ལོ་རིམ་གསུམ་པའི་དགེ་སློབ་ཚོས་སེམས་ཁུར་རམ་སྐྲག་སྣང་དང་བཅས་ཏེ་བློར་འཛིན་སྐྱོར་སྦྱོང་ལ་བྲེལ་འདུག་ཅིང་།གོ་ཐོས་ལ།རྫོང་འདིའི་སློབ་ཆུང་སོ་སོ་ན་འདི་ལྟར“རྟ་རྒྱུག་པར་ཆས་ཀྱིས་གསོ”བཞིན་ཡོད་ཚོད་འདུགཏག་ཏག་སྐབས་འདིར།གནས་ཚུལ་ལ་འགྱུར་ལྡོག་བྱུང་སོང་།ཚོད་རྒྱུགས་ལ་ཞུགས་པའི་འཛིན་གྲྭ་ནི་ལོ་རིམ་ལྔ་བ་དང་དྲུག་པ་ཡིན་པ་དང་།འཛིན་གྲྭ་སོ་སོའི་མི་གྲངས་དང་མིང་ཐོ་སོགས་ཁ་གསལ་གྱི་རེའུ་མིག་བཟོས་ཏེ་སློབ་གསོ་ཅུའུ་ལ་སྤྲད་དགོས་ལུགས་ཀྱི་བྲེལ་མྱུར་བརྡ་སྦྱོར་ཅིག་ཐོན་བྱུང་། 
 ལོ་རིམ་གསུམ་པའི་འཛིན་བདག་གི་ཁུར་བོ་ལྕི་མོ་དེ་གློ་བུར་དུ་ངའི་ཕྲག་སྟེང་དུ་ལྷུང་ཞིང་།ང་དང་ངའི་སློབ་མ་ཚོས་སྔར་ལས་དགུང་འཕྱི་ཉལ་དང་ནངས་སྔ་ལངས་ཀྱིས་བསྐྱར་སྦྱོང་ལ་རེམ་པ་ཡིན།དགེ་གྲོགས་ཚོས་བཤད་ན།ཐེངས་འདིའི་རྒྱུགས་འབྲས་ནི་སློབ་ཁུལ་སོ་སོའི་སློབ་ཁྲིད་ཀྱི་སྤུས་ཚད་བཟང་ངན་འཇལ་བྱེད་ཀྱི་ཚད་གཞི་ཡིན་པ་དང་།རབ་འབྲིང་ཐ་གསུམ་གྱི་དབྱེ་བ་ཕྱེ་སྟེ་ལེགས་བསྟོད་ཉེས་སྨད་ཀྱིས་མཛངས་པ་ལ་ལེགས་པའི་བྱ་དགའ་དང་དམན་པ་ལ་བཀྱོན་ཏེ་ཆད་པ་གཅད་རྒྱུ་ཡིན་པའི་གཏམ་ཡང་སྨྲས་སོང་།དེ་ནི་ངའི་སེམས་ནང་གི་གནོན་ཤུགས་ཆེན་པོ་ཞིག་ཏུ་གྱུར་ཏེ་བློ་བདེ་བག་ཕེབས་ཀྱི་དུས་སྐབས་ཤིག་མཚན་མོའི་རྨི་ལམ་དུའང་མ་ཡོང་། 
 མཚན་སྙན་དེའི་ཕྱིར་དུ།དགེ་གྲོགས་ཚོས་སྐབས་སྐབས་སུ་ང་དང་སློབ་གྲོགས་ཚོར་དངོས་བརྒྱུད་གང་རུང་ནས་སྐར་གྲངས་ལོན་ཐབས་ཀྱི“མན་ངག”འགའ་རེ“གདམ་ངག”གི་ཚུལ་དུ་གནང་བྱུང་ལ།ང་ནི་ཧ་ལས་པའི་ཞོར་ལ་ཞེ་ཤོར་བའི་སྐྱོ་སྣང་ཞིག་སྐྱེས་བྱུང་།དགེ་རྒན་ཞིག་གི་ཆ་ནས།རང་གི་སློབ་མར་སློབ་སྦྱོང་བྱེད་ཐབས་དང་མི་ཡ་རབས་ཚུལ་ལྡན་ཞིག་བྱ་དགོས་ཚུལ་སོགས་བཤད་ན་ཤིན་ཏུ་འོས་མོད།དེ་ལས་ལྡོག་སྟེ།སྐར་གྲངས་ཀྱི་ཆེད་དུ་རྐུ་ཐབས་དང་དེ་བྱ་དགོས་ཚུལ་བཤད་ན་ནག་ཉེས་ཤིག་བསགས་པ་རེད་ཨང་།དེ་བས།ངས་རང་གི་སློབ་མ་ཚོར་རྐུ་མི་རུང་བའི་གནས་ལུགས་དང་རང་ཉིད་ཀྱིས་བྱ་སྤྱོད་དེ་འདྲར་རྒྱབ་སྐྱོར་དང་སྐུལ་སློང་མི་བྱེད་ལ།དེ་འདྲའི་རེ་བའང་མི་འདོན་པའི་རྒྱུ་མཚན་སོགས་རང་ཉིད་ཀྱི་བསམ་ཚུལ་ཐེངས་འགར་སྲོང་བོར་བཤད་མྱོང་། 
 དེ་ལྟར།ཚོད་རྒྱུགས་ལེན་པའི་ཉིན་མོ་དེ་གོ་མེད་ཚོར་མེད་ངང་དངོས་སུ་སླེབས་བྱུང་ལ།རྫོང་སློབ་གསོ་ཅུའུ་ཡི་མགོ་གཙོ་དང་འབྲེལ་ཡོད་མགོ་ཁྲིད་དག་གིས་དྲང་བདེན་དང་ལུགས་མཐུན་གྱིས་རྒྱུགས་རའི་སྒྲིག་ལམ་དམ་པོར་བསྲུངས་ཏེ།ཐེངས་འདིའི་ཚོད་རྒྱུགས་བདེ་བླག་ངང་མཇུག་སྒྲིལ་བར་དགེ་རྒན་དག་གིས་འབད་པ་བྱ་དགོས་ཚུལ་གྱི་རེ་བ་གལ་བོ་ཆེ་ལ་ནན་ཏན་དང་དམ་པའི་ཆོས་ལ་བརྒྱ་ཚར་གྱི་ཚུལ་དུ་བཏོན་ཅིང་།སློབ་ཁང་རེ་ལ་དགེ་རྒན་གཉིས་རེ་མངགས་བྱུང་། 
 ང་རང་བཀོད་སྒྲིག་བྱས་པའི་སློབ་ཁང་དེའི་ནང་སློབ་གྲྭ་དེའི་སློབ་མ་དང་གཞན་པའི་སློབ་ཁུལ་གཉིས་ཀྱི་སློབ་མ་བསྡོམས་ན་སུམ་ཅུ་འདུགབསམ་ཡུལ་ལས་འདས་པ་ཞིག་ལ།དགེ་གྲོགས་ཚོའི་ཉམས་མྱོང་སྦྲགས་མའི་ལུང་བསྟན་དེ་དངོས་གནས་མངོན་སུམ་དུ་མཐོང་ཐུབ་པ་བྱུང་།གཉོམ་ལག་མ་རྒྱས་པའི་བྱིས་པ་དེ་དག་གིས་ང་རང་ཧང་སངས་པར་བྱས་སོང་།མགོ་བརྩམས་མ་ཐག་ནས་ཁོ་ཚོས་རྐུན་དེབ་བླངས་བྱུང་ལ།རྐུན་དེབ་མེད་པ་གཅིག་ཀྱང་མི་འདུགལྷག་པར་དུ་སློབ་གྲྭ་དེའི་སློབ་མ་ཚོས་ལག་མཐིལ་ཙམ་གྱི་རྐུན་དེབ་བཟོས་འདུག་ཅིང་།ལ་ཤས་ཤིག་ལ་དེབ་ཆུང་གཉིས་རེ་ཡོད་ལ།གཅིག་ནི་ཅིག་ཤོས་དེའི་རྗེས་གནོན་དུ་གྲ་སྒྲིག་བྱས་པ་ཡིན་ཚོད་རེད།རྐུན་དེབ་དེ་རུ་རྩོམ་ཡིག་དང་བཅས་ཏེ་རྒྱུགས་གཞིའི་ནང་དོན་མང་ཤོས་ཤིག་འདུག་ལ།ཕལ་ཆེར་གནས་ཚུལ་ལ་རྒྱུས་ལོན་འདྲ་ལོས་ཡོད་སྙམ་པའི་དོགས་པ་ཞིག་ཀྱང་སྐྱེས་བྱུང་།ངས་ནི་གཟབ་ནན་གྱིས་མིག་ཟུང་མ་ལྷོད་པས་སློབ་གྲོགས་རེ་གཉིས་ཀྱིས་ཁྱི་སྒོ་ཁར་བཙན་པའི་རྣམ་འགྱུར་དང་ཚུགས་ཀ་སྣ་ཚོགས་བསྟན་བྱུང་ལ།བུ་མོ་ཆུང་ཆུང་ཞིག་གིས་དེ་དོན་དུ་མིག་ཆུ་བཏོན་པའང་ད་དུང་བརྗེད་ཐབས་མེད། 
 དེ་དག་ལས་ཀྱང་སྙིང་ལ་ན་ཟུག་སློང་བྱེད་ཅིག་དགེ་རྒན་བུད་མེད་ཅིག་གིས་བྱས་སོང་།བར་སྐབས་ཤིག་ལ།བུད་མེད་ཅིག་གིས་སྒོ་ཕྱེས་ནས་ནང་དུ་ཐོན་བྱུང་ལ།ངས་ནི་སློབ་གོས་ཅུའུ་ཡི་མགོ་ཁྲིད་ཅིག་སྐོར་ཞིབ་ཏུ་ཐོན་པ་ལོས་ཡིན་སྙམ་ཞིང་སྔར་ལས་ཀྱང་གཟབ་ནན་གྱི་ཉམས་ཤིག་བསྟན་ནས་བསྡད།ཁོ་མོས་སློབ་གྲོགས་ཤིག་གི་རྒྱུགས་ཤོག་ངོས་སུ་ཡུད་ཙམ་ལ་བལྟས་རྗེས།“རྩོམ་ཡིག་ལ《…》ཞེས་པ་ཕྲིས་དང་འགྲིག་འདུག”ཟེར་བས།ད་གཟོད།ངས་མོ་རང་སློབ་གྲྭ་དེའི་དགེ་རྒན་ཡིན་པ་ཤེས་ནས་ཅུང་ཟད་ཁྲོ་ཉམས་ཀྱིས“ཁྱོད་དགེ་རྒན་ཞིག་གིས་འདི་འདྲ་བྱས་ན་བཟང་རྒྱུ་མི་འདུགསྒོར་སོང”ཞེས་བཤད་མ་ཐགམོ་ཡང་གཟུར་སེ་བུད་སོང་ལ།ཅི་ཞིག་ཐོབ་སོང་བ་ལྟ་བུའི་ཉམས་སྣང་དེས་ང་ལ་ཚོར་བ་གཞན་ཞིག་བྱིན་སོང་། 
 སེམས་པ་ཟང་ཟིང་གི་ཁྲོད་ནས་མྱོང་བ་བསྲན་དཀའ་བ་ཞིག་སྐྱེས་སོང་།ངས་སློབ་མ་ཞིག་ལ“གན་སུ་རེད”ཅེས་དྲིས་པ་ན།མོས“ང་ཚོའི་རྒྱ་ཡིག་དགེ་རྒན…རེད”ཟེར།ངའི་སེམས་ལ་གན་དང་གན་ལྟ་བུ་དག་གིས་རང་གི་ཁེ་གྲགས་ཀྱི་ཆེད་དུ།འདི་དང་འདི་ལྟ་བུའི་བྱིས་པ་དག་གི་ལྷད་མེད་གཡའ་བྲལ་གྱི་སེམས་པའི་མེ་ལོང་ངོས་སུ་དོན་གྱིས་སྟོང་བའི་མི་གཙང་ལྗན་ལྗིན་འབྱུག་གིན་པ་ནི་ཆེས་གུ་ཡངས་དང་བཟོད་སྒོམ་བྱེད་དཀའ་བའི་ནག་ཉེས་ཆེན་པོ་ཞིག་རེད་བསམས་བྱུང་། 
 ཕྱི་དྲོར་ཡང་བལྟས་ཚོད་ལ་དགེ་རྒན་ལོས་ཡིན་སྙམ་པ་སྐོར་ཞིག་སློབ་ཁང་གི་མདུན་རྒྱབ་གང་རུང་ན་གཟན་ལ་གཟས་པའི་ཁྭ་སྐྱག་བཞིན་མིག་རིག་རིག་དང་རྣ་ཅོར་ཅོར་ངང་དལ་གྱིས་འཁོར་ཞིང་འགྲོ་བ་མཐོང་ལ།བྱས་རྗེས་ཤིག་འཇོག་འདོད་ཀྱི་སྐྱུག་བྲོ་བའི་བྱ་བྱེད་རེ་རེ་ལས་རང་དོན་ལ་གཞོལ་བའི་ཧམ་སེམས་ཀྱི་ཉམས་འགྱུར་རེ་འགའ་སུས་ཀྱང་མཐོང་ཐུབ་མོད།དེ་དག་ལ་དོ་སྣང་བྱེད་མཁན་གཅིག་ཀྱང་མི་འདུག 
 རྗེས་སུ།ང་རང་སློབ་གྲྭ་དང་རེ་ཞིག་ཁ་བྲལ་ནས་གཞན་ཡུལ་དུ་ཆས་པ་ཡིན་ལ།གོ་ཐོས་ལ་རྫོང་ཐོག་གི་སློབ་གྲྭ་དེས་ཨང་དང་པོ་བླངས་པ་རེད་ཟེར།དེར་མ་ཟད།གོང་རིམ་ནས་ཀྱང“མཛངས”པའི་ལས་ལ་ཟོང་གིས་བསྟོད་སོང་ཟེར།ཡིན་ནའང་།དོན་དངོས་དེའི་ཐོག་མཐའ་བར་གསུམ་དུ་ཞིབ་འདང་ཞིག་བརྒྱབ་ན།ང་ཚོས་རང་མགོ་རང་གིས་གཡོག་གིན་འདུག་ཨང་།  །