དཔྱིད་ཀ    ཡོད་ཚད་ལ་དབུ་ཁྱུད་འབྲི་བའི་དུས་ཚིགས་ཤིག    ས་ཆེན་པོ་དགུན་མལ་གྱི་སྔུར་སྒྲའི་རུམ་ལས་གྱེས་ཏེ་ཞོགས་པ་འདིའི་རང་གཟུགས་གྱོན།  དུས་ཚིགས་འདིའི་ནགས་ཀློང་ན་དལ་མེད་དུ་རྒྱུ་བ་ནི་ཞིག་གྲོང་གི་བུད་མེད་ཚོ་རེད།  སྲིན་འབུ་དང་ལྗང་སྨྱུག་གི་འཕག་འཚག་ཁྲོད།  ལང་ཚོ་དང་སྐྲ་ལོ་རྒྱབ་ཕྱོགས་སུ་འབྱིལ་བཞིན།  ཁྱིམ་ཕུག་གྲུ་བཞིར་དྭངས་གསལ་གྱི་མཁའ་དབུགས་གསར་པ་ཞིག་བསྣན་རྗེས།  ལག་ཟུང་གིས་ལྕགས་ཁེམ་གྱི་རྫིག་རྔམ་དང་འཇོན་ཐང་སྐྱོར་ཏེ་ཞིང་ཁར་ཆས།
ཞིང་ཁ་ན།  ཁོ་མོ་ཚོའི་བདེ་སྐྱིད་ཀྱི་མངའ་ཐང་དང་མི་ཚེ་ཡི་ལོངས་སྤྱོད་ཡོད།  ཞིང་ཁ་ན།  ཁོ་མོ་ཚོའི་ཕུགས་བསམ་དང་རེ་སྨོན་གྱི་བསམ་བྱ་མང་པོ་བརྩེགས་ཡོད།
    ལྕགས་ཁེམ་གྱི་རྩོལ་ཤུགས་ལ་འཇུས་པའི་གོ་རིམ་ཧྲིལ་པོ།འཚོ་གནས་ཀྱི་རིན་ཐང་བསྲུངས་ཏེ་རྔུལ་ཁྲག་གིས་བྲིས་པའི་ལོ་ཟླ་མང་པོའི་རྒྱབ་ལྗོངས་ཡིན།  ནམ་རྒྱུན་རྨོ་མཛོའི་སུག་རྗེས་སུ་མཐུད་པའི་ཐོང་གཤོལ་ཟད་པོ་སེམས་ཆུང་གིས་སྐྱོར་ཏེ།  མི་ཚེའི་གཤིན་ས་རུ་བསྐྱར་ཟློས་ཀྱི་འཚོ་བའི་རི་མོ་ཤར་ཤུར་དུ་བྲིས།
    ངོ་གདོང་།  ས་རྡུལ་གྱི་ཕྱི་ཁེབས་གྱོན་པའི་ངོ་གདོང་།རླུང་འཚུབ་དང་ཚ་གདུག་གི་ཁ་གཏད་དུ་ལངས་ཏེ།  རྔུལ་ཆུ་དཔྲལ་གཉེར་གྱི་ཡུར་ལས་བརྒྱུད་ནས་ས་ཞིང་གི་རྫ་སུལ་དུ་གཏོར།
དབྱར་ཁ།  མེ་ཏོག་གི་བཀྲག་མདངས་བུད་མེད་ཚོའི་དཔལ་ལྟར་མཛེས་ཤིང་།  བུད་མེད་ཚོའི་སྒེག་འཛུམ་མེ་ཏོག་གི་གཡོ་སྐྱོམ་ཁྲོད་མཚར་སྡུག་གིས་ཕྱུག    མིག་ཀོང་གི་འཛུམ་བག་ཕྱེ་ལེབ་ཀྱི་འཕུར་སྐྱོད་ཁྲོད་ལྷེམ་ལྷེམ་གཡོ་བཞིན།  མགོ་དཀྲིས་དམར་པོའི་ལྟེབས་ཁུགས་སུ་གཅུད་པའི་སེམས་འདུན་ཕྲ་མོ།  མིག་ཟུང་གི་སྒེའུ་ཁུང་ལས་སྒོ་ཞིང་གི་རྣང་མར་འཕྲོས།  ཉི་འོད་ཆེམ་ཆེམ་དུ་འཕྲོ་ཞིང་ལྗང་ལོ་ནེམ་ནེམ་དུ་འགུལ་བའི་གར་སྟབས་སྔོན་པོའི་གདངས་མཚམས་སུ་ལས་ཀའི་ཁོམ་གསེང་ནས་ཐོན་པའི་གླུ་སྐད་རེ་གཉིས་ཀྱང་དལ་བུར་འཕུར་འོངས།  འབྲས་ལྡན་གྱི་དུས་ཚིགས་སེར་པོའི་འཚོ་བཅུད་ལ་སེམས་པས་དམིགས་ཏེ།  བུད་མེད་ཚོས།  ཞིང་ནང་དུ་འཚང་བའི་རྩྭ་ལྡུམ་རེའི་སྐྱེ་སྟོབས་ལ་ཆག་གྲུམ་གྱི་རྨ་ཁ་བཟོས་ཤིང་།  གྲོ་སྙེ་རེར་ཉི་འོད་ཀྱི་འཇམ་ཤ་འཁྱུད་པའི་བརྩེ་དྲོད་དང་བསིལ་ཆར་གྱི་བརླན་གཤེར་ལྟ་བུའི་སེམས་པས་བསྐྱངས།
བུད་མེད་ཚོས།  དབྱར་གཞུང་འདིའི་བརྩེ་མདངས་དྲོན་པོའི་མངར་ཁ་རྒུམ་བཞིན་རྨི་ལམ་ལྗང་ཁུ་ཞིག་གི་འདབ་མ་སྙིམ་པར་བླངས།
    བུད་མེད་ཚོས།  མི་ཚེ་འདིའི་དབྱར་གཞུང་སྒོ་ཞིང་གི་བར་སྣང་དུ་བསྟབས་ཏེ་མི་ཡུལ་ལ་རྒྱགས་ཕྱེ་སྣུམ་པོ་ཞིག་གི་བྲོ་ག་བསྩལ།
    སྟོན་ཀ    ཡོད་ཚད་སྨིན་རན་པའི་དུས་ཚུགས་ཤིག་གི་ངོ་གདོང་རེད།  ཕུགས་བསམ་དང་འདུན་མའི་བསམ་བྱ་མཐའ་དག་ཡིད་བཞིན་དུ་སྨིན་ཏེ་ཞིང་གྲོང་གི་བུད་མེད་ཚོའི་མི་ཚེ་ལ་ལོ་ལེགས་ཀྱི་རི་མོ་གསར་པ་ཞིག་འབྲི་དགོས།  དུས་ཚིགས་འདིའི་ཚ་དྲོད་ཀྱི་རུམ་ཁ་ན།  བུད་མེད་ཚོའི་གོམ་པའི་འདེགས་འཇོག་རེའི་བར་ན་བྲེལ་ཤར་དང་འཚུབ་སྣང་འཕྱུར།
   མུན་ནག་སྟུག་ས་ནས་སྐར་ཆེན་གྱི་མིག་ཟུང་ཕྱེ་མ་ཐགབུད་མེད་ཚོ་ཟོར་བའི་མཆེ་བ་རྣོན་པོའི་ཧམ་སེམས་ལ་འཇུས་ཏེ་སྙེ་མའི་རླབས་ཕྲེང་རེ་རེ་ཁྱུར་མིད་དུ་གཏོར་བཞིན།  དཔྱིད་ཀའི་ས་བོན་ཕར་སོང་བརྒྱ་ལ་སྟོན་གྱི་འབྲས་བུ་སྟོང་གི་སྐྱེད་ཀ་བསྡུས།  རླངས་པ་ཐུལ་ལེར་བྱེད་པའི་རང་ཁྱིམ་གྱི་མངར་ཟས་དང་འབྲུ་དྲུག་ལྡེམ་མེར་གཡོ་བའི་གྲོ་ཞིང་གི་དབུ་ལྕོག་ཁྲོད།  བུད་མེད་ཚོའི་འཇོན་ཐང་གིས་མཛད་པའི་གཏམ་རྒྱུད་ཀྱི་ཁ་དོག་ལ་མེ་ལྕེ་མཆེད་ཅིང་།  ཚེ་སྲོག་གི་དར་ཐག་ལ་བརྒྱུས་པའི་ལས་དབང་དམར་པོའི་རླུང་རྟ།  ས་ཞིང་གི་ཐོང་ག་ན་ཉམ་ཐག་གིས་འཕུར་བས།  ཁྱོད་ཅག་གི་རྣམ་ཤེས་གསོན་པོས་གཤིན་ས་འདིའི་སྐོམ་གདུང་འཁུར་ཏེ་ཉམ་ཆུང་གིས་འཚོ།  ཕྱག་ཟུང་།  སེར་ཁའི་གྲོག་རོང་གི་མཁར་རྫོང་མཐུག་པའི་ཕྱག་ཟུང་།  སྒོ་ཞིང་གྲུ་བཞིའི་བར་སྣང་ན་འཆར་བའི་ཉི་མ་ཡིན་ལ།  སྙེ་མ་དང་ལོ་ལེགས་ཀྱི་འཁྲུངས་རབས་བཀོད་པའི་གསུབ་མེད་ཀྱི་བརྗེད་ཐོའང་ཡིན།
     དགུན་ཁ།  ལྷིང་འཇགས་ཀྱི་ཁོར་ཡུག་ནས་རླུང་འཚུབ་ཀྱིས་ཁ་བའི་གདོང་འབག་གྱོན་ཏེ་ཟློས་གར་རེ་བསྒྱུར་ཅིང་།  ནོར་འཛིན་མས་རྡོ་བའི་བརྟུལ་ཞུགས་སྙིང་ལ་སྒོམ་སྟེ་དུས་ཚིགས་འདིའི་རང་གཤིས་བསྲུངས།  གྲང་རེག་གི་བཙན་འཛུལ་ཁང་པའི་ཕྱི་རྒྱབ་ཏུ་བཀག་རྗེས།  བུད་མེ་ཚོས།  འཚོ་བའི་ལྗིད་ཤུགས་སླེ་བོ་དང་མཉམ་དུ་ཕོག་སྟེ་དགུན་ཟླ་འདིའི་ལྷིང་འཇགས་གྱོན་ཞིང་རང་ཁྱིམ་གྱི་གྲུ་ལོགས་གང་ཞིག་གི་བདེ་འཇམ་རུམ་ནས་འཚོ་བའི་དབུགས་དབྱུང་ཅུང་ཟད་བྱས།
    ཉིན་ཞག་གི་ཕྲེང་རྡོག་རེ་རེ་ཨོང་མེ་དང་ལྷན་དུ་སྒྲོན་བཞིན།  ལུས་སེམས་གཉིད་ཀྱིས་དམར་ལྷབ་ལྷུབ་ཀྱི་མེ་ཏོག་སྙོར་ཏེ་ནང་མི་ཚོའི་བརྩེ་སེམས་ཀྱི་མངའ་ཐང་ལ་རོལ།  རྒྱུ་སྐར་དང་ཟླ་འོད་ཀྱི་འཇམ་ཐིང་མནབས་པའི་ཁྱིམ་གཞིས་རེ་རེ་ན།  བུད་མེད་ཚོས་དཀྲོལ་བའི་གཞས་གདངས་ལ་ཁ་དོག་འབར་ཞིང་།  དུད་ཁྱིམ་རེའི་སྲོག་ཤིང་དུ་འགྲེང་སྟེ།  རང་ཉིད་ཀྱི་སྟོབས་འབྱོར་ཡོད་ཚད་ཕངས་མེད་དུ་སྦྱིན་པས།  ཁྱིམ་གཞིས་རེའི་འཕར་རྩ་ན་བུད་མེད་ཚོའི་ཁྲག་རྒྱུན་ལྷོག་ལྷོག་ཏུ་འཕྱུར།  དེ་བས།  དགུན་ཟླ་འདིས་ཁ་གཡང་དང་ཁ་བཏགས་ཀྱི་བདེན་ལུགས་ཕྱར་ཏེ་ཁྱེད་ཅག་གི་འཇིག་རྟེན་དུ་དཀར་མདོག་ཁོ་ན་སྐྱུགས།