ཁྱེད་ནི་དུས་ཚོད་ཀྱི་གཙང་པོའི་གཞུང་གི
རྒྱང་བཞུད་ཀྱི་ཀོ་གྲུ་ཞིག་ཡིན་པའི་དབང་དུ་བཏང་ན།
ང་ནི་ཁྱེད་ཀྱི་མི་ཚེའི་འགྲུལ་བཞུད་ལམ་གྱི།
ལས་བསྐོས་ཀྱི་མགྲོན་པོ་ལམ་ཐུག་ཅིག་སྟེ།
ཁྱེད་ཀྱི་ཉི་འོད་འོག་ནས་གྲང་མི་སྲིད་ལ་།
ཁྱེད་ཀྱི་ཁ་བའི་ནང་ནས་ཚ་ཡང་མི་སྲིད་དོ།
ཡང་ན།བུ་ཆུང་གངས་དགའ་རིག་གྲོལ་གྱི་འཛུམ་ཆུང་ནང་ན།
གཟུགས། སྒྲ། དྲི། རོ། རེག་བྱ་གང་རུང་གི་དོད་དུ།
ཉི་མ་ཡིན་ལ་ཟླ་བ་ཡིན་ལ་སྐར་མ་ཡང་ཡིན་པའི་ཁྱེད།
དགེ་རྒན་དུས་ཆེན་ལ་རང་ཉིད་གླེང་བའི་ཚིག་རྐང་བཅུ་བཞི་མ།
བུད་མེད་ཅིག་གི་སེམས་པ་ཡིན་ལ།
བུ་ཆུང་ཞིག་གི་མིག་ཟུང་ཡང་ཡིན་པའི་ན་ཚོད་འདིར།
བུ་ཆུང་ལས་ལྷག་པའི་བུ་ཆུང་གང་མང་ཞིག
བུ་མོ་གང་མང་ཞིག 
ངའི་དུས་གསུམ་ལ་དཔྱངས་ཡོད།
མར་མེ་བཞིན་སྤར་ནས་བཞུས་ཟིན་པ་དེ་མིན་ལ།
ས་སྨྱུག་ལྟར་བྲིས་ནས་ཟད་ཀྱང་མེད་པའི་བདག 
བདག་གི་མི་ལོ་ག་ཚོད་ཀྱི་བདེ་སྡུག་དཔར་སའི་དཔྲལ་ངོས་ན།
ཟ་ཡིག་ལྟ་བུའི་ལོ་རྒྱུས་ཀྱི་ཡིག་ཚང་དེ་དཔར་ཡོད།
དེ་རིང་།  གློ་བུར་དུ་ཆང་ལས་དྭངས་དུས།
མིག་མཐའ་ན་བཞུར་མི་ཐུབ་པའི་གཤེར་ཁུ་གཞན་ཞིག་ཡོད་པ་དེ་ནི།
བཞད་མ་ཐག་པའི་མེ་ཏོག་རྐང་གཅིག་གམ།
མེ་ཏོག་རྐང་གཅིག་ལ་ཆགས་པའི་སྦྲང་མ་ཁྱུ་གཅིག 
དེ་དག་གི་ཉིན་མཚན་གཉིས་ཀ
དེ་དག་གི་དུས་གསུམ།