གངས་འཁྱག་འདབ་ཕྲེང་བརྩེགས་པའི་ཡུལ་ཞིག་ན།།
     ཤེས་རིག་ངོ་མཚར་འཕྲུལ་གྱིས་སྟོབས་དར་བ།།
     འཇིགས་མེད་གདོང་ལྔ་འབར་བའི་གཡུ་རལ་ཅན།།
     བདེན་པའི་གད་རྒྱངས་མཐོ་བ་གནམ་གྱིས་བྱིན།།
    
     གྲགས་དཀར་རང་སྒྲའི་མི་ཁྱུད་མཐར་བཟླུམས་པས།།
     མཁས་རློན་དྲེགས་བརྒྱའི་རལ་བ་ས་ལ་བསྙིལ།།
     རིག་བཟང་སྙིང་གི་འདབ་སྟོང་གྲོལ་བའི་གཉེན།།
     མཛེས་པའི་གཏམ་གྱིས་སུ་ཞིག་ཡིད་མ་བསྡུས།།
    
     འགྱུར་མེད་བདེན་དོན་གཡས་འཁྱིལ་དུང་གི་སྒྲས།།
     མཚོན་མིན་མི་ཆོས་གཙང་མའི་གྲུབ་པའི་མཐའ།།
     རང་རིགས་གཟུར་གནས་དགྱེས་པའི་ལྟད་མོ་རུ།།
     མི་འཇིགས་སྟོབས་ཀྱིས་དྲངས་པ་རྣམ་པར་རྒྱལ།།
    
     འཛམ་གླིང་གོ་ལ་ཟླུམ་པོའི་ཡང་སྟེང་ན།།
     རིག་པའི་ཁོ་ལག་རྫོགས་པའི་དྲེགས་ལྡན་མ།།
     རྙིང་ཞེན་དུག་སྡོང་སྤར་འཛིན་མཐུ་སྟོབས་ཀྱིས།།
     བཅོས་མའི་སྲོག་གི་རྩ་བ་རྦད་ཀྱིས་བཅད།།
    
     ལེགས་ཉེས་བླང་དོར་མ་ལུས་གསལ་བའི་མིག།
     ལེགས་བཤད་རིན་ཐང་བྲལ་བའི་ཡིད་བཞིན་ནོར།།
     མ་བཅོས་སེམས་གཏམ་འོ་མའི་ཆུ་གཏེར་ལས།།
     ལྗགས་རྩོམ་མེ་ཏོག་སྐལ་བཟང་རྒྱན་དུ་བཀོད།།
    
     གནའ་དེང་རྩོམ་རྩལ་རིག་བརྒྱའི་དགའ་ཚལ་དུ།།
     ལུང་རིག་བཤད་གསུམ་དག་པའི་བསུང་ངད་ཅན།།
     རྦབ་ཆུའི་ལང་ཚོ་མེ་ཏོག་ཟོལ་དུ་བཙུགས།།
     གང་གི་མཛད་རྗེས་མཁས་རློམ་སུ་ཡིས་འགོག།
    
     འོན་ཏེ་རིགས་མཐུན་ལ་ལའི་སྙིང་གི་སྒོར།།
     ཕྲག་དོག་ཆགས་སྡང་འགོང་བོའི་གདོན་ཞུགས་ཏེ།།
     ལྟ་ལོག་ལྟས་ངན་ཚིག་གིས་སྨད་པ་ལ།།
     ཤེས་ལྡན་སུས་ཀྱང་སྐྱོ་གདུང་དངན་པ་འབྱིན།།
    
     མཐིང་སྔོན་རལ་བ་སྟུག་པོའི་ཅོད་པན་དང་།།
     རང་བྱུང་མཆེ་སྡེར་རྣོན་པོའི་མཚོན་ཆ་ཐོགས།།
     གཉིས་འཐུང་ཀླད་ཁྲག་ས་ལ་ཟགས་བྱེད་པའི།།
     སྟོབས་ལྡན་གདོང་ལྔ་གཉིས་པ་ཁྱོད་མིན་སུ།།