ཐོག་མའི་སྐྱ་རེངས་ནས་ཆས་པའི་གོམ་ཆེན་རེ་རེས
     ཧ་ཅང་བབ་བརླིང་གིས་ལམ་སྣ་ཡོད་ཚད་ནས་འཇུས་ཏེ
     ཁྲིད་པའི་ས་མཁན་བཞིན་ངའི་མིག་དཔག་ལས་བརྒལ་དུས
     ལས་དབང་གི་དཔྱིད་ཉི་དྲོན་མོ
     ཅི་ལྕོག་གིསངའང་ཡོང་གིན་ཡོད
     ལུས་པོ་ཤེད་ཀྱིས་དྲུད་དེ་གོམ་པ་ཤུགས་ཀྱིས་སྤོས་ནས
     ཁྱེད་ལ་འོ་བརྒྱལ་ཞུ་བཞིན
     ངའང་ཡོང་གིན་ཡོད
    
    
     ལམ་བུ་དག་རྐང་རྗེས་རེ་རེ་ནས་ཤར་མར་བཅད་དེ
     ལྷང་ལྷང་ངང་ཁྱེད་ཀྱི་མིང་ནས་ཤུགས་ཀྱིས་འབོད་ཞོར
     འགྲོ་ཚུལ་ཞིག་གིས་འཕུར་སྟངས་ཤིག་ངོམ་བཞིན
     ཆེས་མཐའ་མའི་གཤོག་རྗེས་སྙེག་བཞིན་འོང་དུས
     ལམ་འགྲོ་བ་ང
     ད་དུངགྲང་ཤུར་ཤུར
     ཁྱེད་ཀྱི་མཁར་ཁའི་ཕྱི་རོལ་ན་ལུས་འདུག
     སྒོ་ར་བའི་ཞེ་སྡངནང་ཁྱིམ་ཁའི་མཆིལ་ཞགས
     ཡུན་རིང་བོར་ངར་སྐད་ཆ་མེད་ཅིང་ངུ་སྐད་ཤོར
     མ་གཞིར་སྟོང་སང་སང
     ཁྱེད་རང་འདི་ལྟར་བུད་སོང
     འཛོམ་པའི་སྔོན་བརྡ་ཞིག་ཀྱང་མ་བཏང་བར་
     འདི་ལྟར་བུད་སོང
    
     ལམ་འགྲོ་བངའི་སྙིང་གི་མེ་ལྕེ་དམར་པོ
     ནམ་རྒྱུན་ཁྱེད་ཀྱི་སྨྲ་ལྕེ་རྒོད་པོས་ང་རང་ཚོ་དུམ་བུར་གསིལ་མྱོང་ལ
     ཁྱེད་ཀྱི་བློ་ཁ་ཡངས་པོས་ང་རང་ཚོ་ཕྱེ་མར་ཡང་བལྡད་་མྱོང
     ཡིན་ནའང་རི་ཚོགས་དང་མཁའ་དབྱིངས་ཧྲིལ་བོ་ཡོམ་ཡོམ་འགུལ་བའི་དེ་རིང
     ཁྱེད་རང་གཏན་འཇགས་སེ་གང་ན་ཡོད
     དེ་རིང་ཁ་བའི་བརྩེགས་རིམ་མཐུག་པས
     དེ་རིང་རླུང་བུའི་གཡུག་སྟངས་དྲག་པས
     མེ་ལྕེ་ལྟ་བུའི་ངའི་སེམས་རྩ་འཁྱགས་སོང
     གཤོག་པ་ལྟ་བུའི་ངའི་ལག་པ་ཕྱིད་སོང
     ལམ་འགྲོ་བཁྱེད་རང་གང་ན་ཡོད