རིག་པའི་དཔའ་བོ།
ཨོ་རྒྱན་དོན་གྲུབ། 2011-11-30
མདོ་སྨད་དགུ་འགྱུར་པད་མོ་རོང་གི་མཐིལ།།
རིག་པའི་ཁྱེའུ་རང་གྲོལ་མཚན་དེ་གང་།།
ས་ཆེན་མི་ཡི་ཞིང་གི་པང་ཁ་ནས།།
དབུ་ནག་གངས་ཅན་པ་ཡི་སྐལ་དུ་བྱོན།།
ཨ་མས་ནུ་ཞོ་ཁ་ལ་བསྣུན་པ་ནས།།
ཤེས་རབ་མིག་ཟུང་དཔྲལ་བའི་ཐོད་དུ་བསྩལ།།
དབྱངས་གསལ་སྦྱོར་ཀློག་ངག་ལ་གྱེར་བ་ནས།།
གངས་རི་དཀར་པོའི་མཐོ་ཚད་སེམས་ཀྱིས་གཞལ།།
རིག་པའི་སྒོ་གླེགས་རིམ་གྱིས་བརྒལ་བ་ནས།།
རིགས་ཞེན་བརྩེ་བའི་ཟུངས་ཁྲག་དྲོད་ཀྱིས་འཁྱིལ།།
གསར་སྐྱེས་རིག་པའི་དཔའ་བོ་རང་གྲོལ་ཞེས།།
མཚན་གྱི་སྙན་པ་ཕྱོགས་བཅུའི་ཐ་གྲུར་ཁྱབ།།
སྐྱེས་སྟོབས་རང་བྱུང་ངག་སྒོ་ཡངས་བའི་མཁར།།
སྦྱངས་སྟོབས་བརྩོན་པའི་གོ་ཆ་རབ་བསྒོས་ཏེ།།
གསུང་རྩོམ་པོད་དྲུག་གསེར་གནག་གཟི་འོད་ཅན།།
ཕྱི་རབ་གངས་ཅན་བུ་ཡི་སྐལ་དུ་བཞག།
རྙིང་ཞེན་གསར་འགོག་མཁྲེགས་འཛིན་ཨུ་ཚུགས་ཀྱིས།།
གངས་རིའི་རང་མདངས་བསྒྱུར་ལ་མ་བཟོད་པར།།
རྐང་ལམ་ཕྲ་མོའི་གཡས་འཁྱིལ་དུང་གི་སྒྲས།།
སྒང་བ་བོད་ལ་ཕན་པའི་བརྡ་ཞིག་བཏང་།།
ཡངས་བའི་སྨྱུག་ཁས་རྩོམ་རིག་གླིང་ག་རུ།།
ངོམ་མེད་རྩོམ་གྱི་མེ་ཏོག་ལེགས་བཏུས་ཏེ།།
ལང་ཚོ་རྦབ་ཆུས་དྲག་ཏུ་འབབ་པ་ནས།།
གསར་རྩོམ་རིག་པའི་སྒོ་གླེགས་ཐོག་མར་ཕྱེས།།
ལྷ་སྒྲུང་བྱེ་མའི་ཕུང་པོས་མ་གཏུམས་པའི།།
དེབ་ཐེར་དཔྱིད་ཀྱི་རྒྱལ་མོའི་གླུ་དབྱངས་ཀྱི།།
ཚིགས་སུ་བཅད་པའི་སྙན་ངག་འགྲེལ་བ་ཡང་།།
གངས་རིའི་བུ་ལ་དུངས་བའི་སྐྱེས་སུ་གཏམས།།
མ་འོངས་མངོན་གཟིགས་གངས་རིའི་མདུན་ལམ་ཆེད།།
སྒྱིད་ལུག་ལེ་ལོ་ནད་ངན་རབ་དོར་ཏེ།།
ཁ་ཚ་དགོས་ལ་གཏུག་པའི་མན་ངག་རེ།།
ཕྱི་རབས་གསར་བྱུང་བུ་ཡི་སྙན་དུ་བླུགས།།
སྐྱེ་འཆི་མི་རྟག་ལས་དབང་དེ་དྲན་ན།།
གཤིན་རྗེ་རྒྱལ་པོ་དེ་ལ་སྙིང་རླུང་ལྡིང་།།
མི་རབས་ཤིག་གི་རིག་པའི་དེད་དཔོན་ཁོང་།།
ཕྱི་མའི་འཕྲང་ལ་ཁྲིད་པའི་དགོས་དོན་གང་།།
དུང་གི་ཟླ་གཞོན་ནུབ་རིར་ཡིབ་དང་ལྷན།།
གསེར་གྱི་ཉི་མ་མཁའ་ནས་མ་འཆར་གོང་།།
ཐོ་རངས་དུས་ཀྱི་ཆ་ཡི་བར་མཚམས་ནས།།
སྐྱེས་ཆེན་གང་ཉིད་གཤེགས་པ་ཕང་བ་ལ།།
ཆབ་ཆའི་ཆུ་གཉིས་འགལ་སྒྲ་སྔར་བཞིན་གྲགས།
གངས་རི་ཆེན་པོར་སྟོང་བའི་སྒྲ་ཞིག་ཁྱབ།།
ཆོལ་གསུམ་ས་ཆེན་སྐྱོ་བའི་མིག་ཆུ་དེ།།
ཡར་ཀླུང་གཙང་བོའི་འབབ་པའི་རླབས་དང་བསྡོངས།།