ཆོས་སྲིད་ཀྱི་གདུགས་ཆེན་རྙིང་ཧྲུལ་གས་ནས་འཐོར།
     གདུགས་འོག་ཚུད་པའི་རིགས་འདིའི་ལམ་སྣེ་གཞན་གྱིས་ཁྲིད།
     འཛམ་གླིང་ཡོ་ལང་སྣ་ཚོགས་ཀྱི་མཐུ་མདངས་ཁྲོད་དུ།
     དམར་རྗེན་མི་རིགས་འདིས་ཅེ་རེ་ངང་གཞན་གྱི་གར་ལ་ལྟད་མོ་བལྟས།
     འདས་པར་དམོད་མོ་དང་མ་འོངས་པར་རེ་ཐག་ཆད་པའི་སྐྱ་སེར་དག་གིས།
     ལས་དབང་སྡུག་བཙོག་འདིའི་སྨག་རུམ་ཁྲོད་དུ་རང་ཉིད་བོར་ལ་རན་ཚེ།
     སློད་མེད་རང་གཤིས་གསལ་བའི་སྐར་མ་ཞིག་མདོ་སྨད་ཡུལ་དུ་ཤར།
     རིགས་རུས་འདུ་ཤེས་ཀྱི་ཡན་ལག་རིམ་བཞིན་ཆགས།
     ལ་རྒྱལ་དང་ཤ་ཞེན་གྱི་ཟུངས་ཁྲག་བརྟན་པོར་འཕེལ།
     བསིལ་ལྗོངས་འདིའི་མདུན་ལམ་འགོག་པའི་གེགས་གསར་རྙིང་ལས་ཐར་ནས།
     བཅོས་མེད་རང་གཤིས་འཕར་བའི་བདེན་ཚིག་གི་རང་སྒྲ་ལྷང་ལྷང་དུ་བསྒྲགས།
     རྙིང་ཞེན་སྒྲོམ་དུ་ཚུད་པ་རྣམས་ལ་མཚར་སྡུག་གི་ལམ་གསར་ཅི་ཡང་བསྟན།
     རྨོངས་དེད་སྨག་རུམ་ནང་འཁོར་བ་ཀུན་ལ་རྣམ་དཔྱོད་ཀྱི་སྒྲོན་མེ་ལྷམ་མེར་སྦར།
     བག་འཁུམས་ཨི་དུང་དུ་ཡིབ་པ་དག་ལ་སྙིང་སྟོབས་ཀྱི་སྐུལ་འདེགས་ཡང་ཡང་མཛད་།
     ནུས་མེད་རེ་འདོད་བཅོལ་བ་ཡོངས་ལ་རང་བརྩོན་གྱི་སྒུལ་ཤུགས་ནམ་ཡང་བསྩལ།
     གལ་ཏེ་མཐའ་མེད་པའི་ཀླད་མཛོད་བཏོན་ནས་གོ་རྟོགས་ཀྱི་ཁྱེའུ་ཆུང་སད་དུ་བཅུག་ན།
     རྫོགས་ལྡན་གྱི་བློ་སྒོ་ཕྱེ་ནས་གསར་རྙིང་ལ་བླང་དོར་མཁས་ན།
     ཀུན་ཕན་གྱི་སེམས་ཤུགས་བསྐྱེད་ནས་མཐའ་ཐུག་གི་ཕུགས་དམིགས་ལ་བརྩོན་ཤེས་ན།
     རྐང་འོག་གི་ཁེ་ཕན་རྩོད་པ་བཞག་ནས་རླབས་ཆེན་གྱི་མིག་རྒྱང་བསྲིངས་ཐུབ་ན།
     ཁ་བ་ཅན་འདིར་མཚར་སྡུག་གི་འབྱུང་འགྱུར་ཞིག་ཡོད་པར་ངེས་ཤེས་སྐྱེས།
     རེད་དེ།མི་རྣམས་རྨོངས་གཉིད་ཀྱི་མནར་གཅོད་ཁྲོད་འཐོམས་པར་ཁྱེད་རང་སད་སྔ་བ་ཅིའི་ཕྱིར།
     ཁོ་ཚོའི་རྫ་རིའི་སེམས་གཤིས་ཁྱེད་ཀྱིས་ཟུངས་ཁྲག་གིས་སྦངས་མོད་འཇམ་སྣུམ་དུ་བསྒྱུར་ནུས་སམ།
     རུས་ཞེན་མེད་པའི་མྱ་ཐང་གི་ལུས་ཕུང་ལ་ང་རྒྱལ་གྱི་རྦབ་ཆུ་གཏོར་མོད་རློན་གཤེར་དུ་གྱུར་སྲིད་དམ།
     རེད་ཡ།
     སད་སྔ་བའི་ཁྱེའུ་ཚོར་བ་རྣོན་པོ་ཞིག་ཡིན་པས་གཞན་དག་སད་པར་སྒུག་ནས་མནར་སྡུག་མྱོང་།
     རིགས་འདིའི་སླར་སོས་འཁོར་ལོ་དྲུད་པའི་གདོང་ལེན་ཡིན་པས་ཚེའི་ཟུངས་བཅུད་རྫོགས་པ་སྔ།
     བོད་ཀྱི་འབྱུང་འགྱུར་ལ་ཡིད་ཆེས་པའི་བརྩོན་ལེན་པ་ཡིན་པས་རྗེས་རབས་དུ་མར་ངར་ཤུགས་སྟེར།
     ཁྱེད་ཀྱི་སྨྱུག་འོག་ཏུ་འཁྲུངས་པའི་ཤེས་རབས་ཀྱི་མེ་ཏོག་ཡུལ་གྲུ་ཀུན་ཏུ་བཞད་ཅིང་།
     ལང་ཚོ་དར་ལ་བབས་པའི་གཞོན་ནུ་དུ་མའི་སེམས་སུ་འབྲས་བུར་སྨིན།
     ཉིད་ཀྱི་རྣམ་ཤེས་ཀྱིས་ལས་དབང་རྐྱང་དཀར་ལ་འཆིབ་ནས་ཞིང་ཁམས་གཞན་དུ་འཚོལ་སྙེག་སོང་མོད།
     དེའི་འབྲས་བཟང་གངས་ཅན་པ་རྣམས་ཀྱི་ཡིད་དུ་ཟིམ་ཟིམ་དུ་ཐིམ་ནས་རོ་གཅིག་ཏུ་གྱུར།
     བདག་གི་ཡིད་སེམས་དམར་པོའི་མཐིལ་དུ་ཡང་ཡང་འཁོར་བའི་སྐུ་ཞབས་དོན་འགྲུབ་རྒྱལ་ལགས།
     ཁྱེད་ནི་མུ་མེད་ཀྱི་འཇིག་རྟེན་ཉུལ་བའི་འཚོལ་སྙེག་གི་སྐར་མ་ཞིག་སྟེ་ནམ་ཡང་ངའི་སེམས་སུ་དག་ལྗང་ལྗང་དུ་འཚེར།