དུས་རབས་ཉི་ཤུའི་རླབས་རྩེ་ན།
     དཔྱོད་མིག་གི་འོད་དཀར་ཁྱོད་ཀྱིས་སྒྲོན་དུས།
     སུ་ཞིག་གིས་དཔུང་རོགས་མ་བྱས་ལ།
     ལོ་རབས་བརྒྱད་ཅུ་པའི་བྲང་གཞུང་ནས་རྔུལ་ཆུ་དང་ལྷན་དུ་
     འགྲིལ་སྐབས།
     གང་གིས་ཀྱང་གདེངས་འཇོག་མ་སྟེར།
     རང་གྲོལ།
     མི་ལོ་སུམ་ཅུའི་རིང་གི་ཉམས་མྱོང་དེ་དག
     དགག་སྒྲུབ་ཀྱི་སྙིང་སྟོབས་ལ་བསྒྱུས་ཏེ།
     གཞན་དབང་སྟུག་པོ་ཚང་གི་རི་གྲོང་ན།
     རྐང་རྗེས་ཙམ་ལས་མ་བསྐྱུར་བར་གང་དུ་བུད་སོང་།
     རང་གྲོལ།
     ལོ་རྒྱུས་ཀྱི་དཔང་པོ།དཔྱོད་ཤེས་ཀྱི་ལྡེ་མིག
     མི་རབས་ཤིག་གིས་ངོམ་ཆོག་ཆོག་གི་ང་རྒྱལ།
     དུས་རབས་ཤིག་ལ་ཚང་འོས་པའི་ཡོད་ཚད།
     གུ་དོག་དང་མཁྲེགས་འཛིན་ཀྱི་མིག་ལམ་ན་འཕྲེད་དུ་གནས་
     པའི་གཟེར་བུ་རྣོན་པོ།
     ཁྱེད་ཀྱིས་ལྷད་མ་འདྲེས་པའི་མི་སྐད་སྨྲས་པ་ནས།
     བོད་ཡུལ་ལ་ན་གཞོན་ཀྱི་ཐ་སྙད་བྱུང་ཞིང་།
     མི་ཡུལ་ལ་མཛེས་སྡུག་གི་ཁ་དོག་བསྣན།
     རང་གྲོལ།
     མི་ཁ་མཆིལ་ཞགས་ཀྱི་ཁུར་བོ་ཁྱེར་ཏེ།
     མ་ངེས་པའི་དུར་ས་རུ་ཁྱེད་ཉིད་ཞུགས་པ་ནས།
     རང་མོས་སྙན་ངག་གི་དུར་མཆོད་པ་གྲངས་མེད་ཅིག
     ཁྱེད་དང་ཁྱེད་ཀྱི་སྙན་ངག་ལ་སྨོན་པ་འཆོར་བཞིན།
     འཇིག་རྟེན་གྱི་བདེན་པ་བརྡར།
     རང་གྲོལ།
     མི་ཡུལ་གྱི་གནས་ལུགས་ལ་སྤར་འཇུས་བྱས་ཏེ།
     ཆང་དུམ་གང་ལ་བརྩེ་བས་རོལ་བའི་ཁེར་རྐྱང་གི་སྙན་ངག་པ།
     མི་སྐད་ཀྱི་ངག་གདངས་ལ་འོད་ཟེར་བྱུག་སྟེ།
     གཏོར་བཤིག་དང་འཛུགས་སྐྲུན་གྱི་སྙིང་སྟོབས་ཚང་བའི་གངས་ཅན་པ།