ཀ་མད་ཡི་གེའི་འབྱུང་ཁུངས་བོན་ཡིན་པ།།
     ཁ་བ་ཅན་གྱི་གདོད་མའི་ལོ་རྒྱུས་ཏེ།།
     ག་དུས་ཡིན་ཡང་ཡི་གེ་འདིར་དཔྱོད་ན།།
     ང་ཚོར་བདེན་རྟགས་འཁྲུལ་མེད་ཤིན་ཏུ་མང་།།
     ཅ་སོགས་ཡིག་དྲུག་རྙེད་པ་ཡར་སྣོན་ན།།
     ཆ་ཚང་རང་སྐད་འདང་བའི་གྲངས་འཇོག་ཚུལ།།
     ཇ་རྒོད་ཆང་ལ་རོལ་བའི་བཟི་གཏམ་ལས།།
     ཉ་ཆུ་མཐུན་པ་ལྟ་བུའི་བདེན་ཐུབ་དཀའ།།
     ཏ་ཐཱའི་བསྟན་ལ་གུས་ཞེན་ཆེ་བའི་ལན།།
     ཐ་མའི་དོན་ཆུང་ཙམ་ཡང་རྒྱ་གར་གཏུགས།།
     ད་དུང་དེ་ལ་སྒྲོ་བཏགས་བསྟོད་བཀུར་གྱིས།།
     ན་སོ་རྒན་གཞོན་རྒྱུས་མེད་མགོ་བོ་གཡོགས།།
     པ་ཏྲ་སྣོལ་ལྟར་བོན་དང་སངས་རྒྱས་གཉིས།།
     ཕ་གཤིས་བུས་བསླབས་ཙམ་ལས་མ་མཆིས་ཕྱིར།།
     བ་གླང་ཇི་བཞིན་དཔྱོད་བྲལ་མི་དགོས་པར།།
     མ་གཞིའི་ཆོས་འདི་བོན་ཆོས་འགྱུར་བར་གསལ།།
     ཙ་རི་ལ་སོགས་གནས་བསྟོད་བསང་མཆོད་དང་།།
     ཚ་ན་གཅོག་བྱེད་ཆོ་ག་སྒྲུབ་མཆོད་དང་།།
     ཛ་ཏི་སྨན་སྣ་གཏར་བསྲེག་ལག་ལེན་བཅས།།
     ཝ་ལེར་མཐོང་སླའི་བོན་པོའི་ཕྱག་ལེན་མང་།།
     ཞ་ཞོར་མ་གཏོར་ཆེད་དུ་དཔྱད་པ་ན།།
     ཟ་བཏུང་འགྲོ་ལུགས་ཡོད་ཅོག་བོན་ཆོས་སུ།།
     འ་ཅག་ཤེས་ཚད་ཕལ་ཆེར་གཅིག་འདྲ་བ།།
     ཡ་ཡོ་ཙམ་མིན་བདེན་པའི་ཁུངས་སུ་འཁྱོལ།།
     ར་རིའི་མིག་ལྟོས་ལོག་པའི་ཕྱོགས་རིས་ཀྱིས།།
     ལ་ལུང་འདི་ལ་བསམ་བློ་མ་གཏོང་ཡང་།།
     ཤ་རུས་སྤུན་ཟླ་སྨ་འབེབས་མི་བྱ་བར།།
     ས་འདིའི་ལ་རྒྱའི་ལྟ་ཚུལ་མཐུན་པོར་གཅེས།།
     ཧ་ཧའི་འཕྱ་དགོད་འཆོར་བའི་སྐྱོན་འགྱུར་རམ།།
     ཨ་མཆོག་བདུད་རྩིར་སྨིན་པའི་ཡོན་ཏན་གང་།།
     ཧ་ཅང་རྡོག་རྩ་གཅིག་སྒྲིལ་རང་བཀུར་ཕྱིར།།
     ཨ་མེས་གསར་གཏོད་གཞན་ཕྱོགས་མ་སྤྲོད་ཅིག།