མདོ་སྨད་རེབ་གོང་རིག་འབྱུང་གྲོང་ཁྱེར་ནས།།
     དགེ་ཆོས་བྱ་བའི་རིག་པའི་དཔའ་བོ་ཅིག།
     རྒྱ་གར་ལ་སོགས་རྒྱལ་ཁམས་ཡོངས་འགྲིམས་ཏེ།།
     ས་སྟེང་མཁས་པའི་གཙུག་གི་རྒྱན་དུ་གྲགས།།
    
     ཤེས་བྱའི་མཛོད་འཛིན་རིག་གྱི་བུ་རྒོད་གང་།།
     སྐྲ་སེར་སྤྲེའུའི་བདུད་ཀྱི་ཆོ་འཕྲུལ་འོག།
     ཉི་བཞིན་རི་བོའི་ཕག་ཏུ་ནུབ་པ་དེ།།
     ས་ཆེན་གོ་ལ་མུན་པས་བཟུང་བའི་རྟགས།།
    
     མཐོ་བ་དཔོན་ནས་དམའ་བ་སྤྲང་པོའི་བར།།
     ནོར་དང་དབང་གི་ཆེད་དུ་འདུར་མོད་ཀྱང་།།
     འདོད་ཆུང་ཆོག་ཤེས་ཅན་གྱི་སྐྱེས་བུ་དེས།།
     འགོ་བའི་ནད་བཞིན་རིང་ནས་རིང་དུ་སྤངས།།
    
     ཡོན་ཏན་ཅན་ལ་སྡང་བའི་མིག་བགྲད་ཅིང་།།
     མཁས་རློམ་རང་སྣང་མཐོ་སའི་མཐའ་མཁོབ་འདིར།།
     རྨོངས་མུན་མཐོང་བའི་མིག་དབང་རྣོ་ནའང་།།
     ཐན་བྱ་འུག་པར་སྒྲོག་པ་བོད་ཀྱི་སྲོལ།།
    
     རྣམ་དཔྱོད་བློ་གྲོས་རྩལ་ལ་འོད་འབར་བས།།
     གང་ཡིན་ལྟ་བའི་རྗེས་སུ་མི་འབྲང་བར།།
     བདེན་རྫུན་དབྱེ་བར་དོགས་སློང་རབ་མཛད་དེ།།
     ཀུན་ཡིད་ཅིག་ཅར་འཕྲོག་པ་ངོ་མཚར་ཆེ།།
    
     དུས་གསུམ་ཀུན་ཏུ་བཙལ་ཀྱང་རྙེད་དཀའ་བའི།།
     རིན་ཆེན་བཻཌྰུརྱ་ཡི་བུམ་པ་ཞིག།
     གནས་མཆོག་ཆོས་ཀྱི་རྒྱལ་ཁམས་ལྷ་ས་ནས།།
     མི་འདོད་རྐྱེན་གྱིས་ཆག་པ་ཡིད་རེ་སྐྱོ།།
    
     འཇིག་རྟེན་མི་ཁའི་རླུང་འཚུབ་རྒོད་པོའི་འོག།
     ཚུལ་ཁྲིམས་གཙང་མའི་མིག་འབྲས་རབ་དོར་ནས།།
     བུད་མེད་དང་ནི་དུ་ཆང་སྤྱོད་པ་ཡི།།
     ཐུན་མིན་ལྟ་བ་དེ་འདྲ་སུ་ཡིས་འགྲེལ།།
    
     དཀའ་བ་སྡུག་གི་བཙོན་དུ་ལྷུང་ན་ཡང་།།
     ཞུམ་མེད་ཡ་ཆུང་གངས་དཀར་སེམས་ཀྱི་སྦུབས།།
     རང་རིགས་འདུ་ཤེས་བྲག་ལྟར་སྲ་བ་ཡི།།
     གངས་ཀྱི་སེང་གེ་དེ་འདྲ་ཅི་ཙམ་མཆིས།།
    
     རང་རེའི་གངས་ཅན་བོད་མིའི་ལུགས་སྲོལ་ལ།།
     ཕོ་མཆོག་མོ་དམན་འདུ་ཤེས་ཟབ་མོད་ཀྱང་།།
     རིགས་ཀྱི་བུ་དེའི་དྲན་པའི་མེ་ལོང་དུ།།
     ཐམས་ཅད་འདྲ་མཉམ་ཡིན་པའི་གཟིགས་རིས་འཁྲུངས།།
    
     མི་ཆེན་དཔོན་པོར་མགོ་བོ་མི་སྒུར་ཞིང་།།
     ཉམ་ཆུང་ཚོགས་ལ་རང་མཐོང་མི་བྱེད་པའི།།
     རང་ཚུགས་ཅན་གྱི་སྐྱེས་མཆོག་དེ་འདྲ་བ།།
     སྐལ་བའི་མཐར་ཡང་ཉིན་གྱི་སྐར་མ་ཙམ།།
    
     གདོང་དམར་བོད་ཀྱི་རྗེ་བོ་སྲོང་བཙན་སོགས།།
     ཡབ་མེས་ལོ་རྒྱུས་ཡིག་ཚགས་རབ་གསལ་བའི།།
     རྒྱལ་རབས་དེབ་དཀར་དྲི་མེད་ལྷ་དར་དེ།།
     སྒང་པ་བོད་ཀྱི་རྒྱན་དུ་རླུང་གིས་བསྐྱོད།།
    
     དེང་རབས་ཚན་རིག་ལག་རྩལ་འཕྲུལ་ཆས་དང་།།
     བཟོ་རིག་ལྷ་རིས་སྒྱུ་རྩལ་ཐང་ཀ་སོགས།།
     གང་ཡིན་ཐམས་ཅད་ཁོང་དུ་ཆུད་པ་ཡི།།
     པཎ་ཆེན་དགེ་ཆོས་ཞབས་ལ་ཕྱག་འཚལ་ལོ།།
    
     གོ་དཀའི་མིང་དང་ཚིག་གིས་མ་སྒྲིབ་པའི།།
     མཁས་དབང་གང་དེ་དྲན་པའི་སྐྱོ་བའི་གླུ།།
     མདོ་སྟོད་མི་ཡི་ཆོལ་ཁའི་ཟུར་ཞིག་ནས།།
     ལོ་བ་ཆོས་མིང་འཛིན་པས་བླངས་སོ་ལོ།།