ཆུ་ཤེལ་ཟླ་བའི་ལང་ཚོ་ལས་འཁྲུངས་ཤིང་། །
དཀར་བསིལ་བདུད་རྩིའི་སྙིང་པོས་ཡོངས་བཟུང་བའི། །
འོད་ཟེར་ནོར་བུའི་ཕུང་པོ་མངོན་མཐོ་བ། །
རི་ཡི་རྒྱལ་པོ་ཇོ་མོ་གླང་མ་ནི། །
 
གནས་མཆོག་བསིལ་ལྡན་དག་པའི་ཕོ་བྲང་དུ། །
ཧི་མ་ལ་རི་ནོར་བུའི་ཁྲི་སྟེང་ན། །
རང་བྱུང་རིན་ཆེན་གཏེར་བརྒྱའི་ཕྲེང་བ་ཅན། །
ཡངས་པའི་ཁྱོན་འདིར་ཤིས་པའི་དགེ་མཚན་བསྒྲེངས། །
 
གླིང་ལྔ་མཚོ་བཞིའི་བཀོད་པ་རྨད་བྱུང་བའི། །
ལྷུན་གྲུབ་གཞིར་ལྡན་ནོར་འཛིན་ཡངས་པའི་ཁྱོན། །
རི་ཁྲི་ཆུ་སྟོང་མཐའ་ཡས་མུ་ཁྱུད་ན། །
གྲགས་པ་སྤྲིན་གྱི་རོལ་མོས་སྟོང་གསུམ་གང་། །
 
ནོར་འཛིན་སྒེག་མོའི་ཡན་ལག་མཆོག་གི་རྩེར། །
འོད་དཀར་ཐིག་ལེ་བཀོད་པའི་མཚར་སྡུག་གིས། །
དྭངས་པའི་མཁའ་ན་རྒྱུ་སྐར་ཕྲེང་བར་བཅས། །
ཉ་གང་ཟླ་བ་རྒྱས་པའི་མཛེས་པ་འཕྲོག །
 
ཕུན་ཚོགས་ལྔ་ལྡན་ཞིང་གི་བཀོད་པ་བཞིན། །
སྡེ་བཞི་དཔལ་གྱིས་གཏམས་པའི་རྒྱལ་ཁམས་འདིར། །
དགྱེས་འཛུམ་བཞིན་གྱི་འོ་མཚོ་འཁྱིལ་བ་ནས། །
ཁ་བ་དཀར་པོའི་དགེ་མཚན་རྟག་པར་འཁྲིགས། །
 
གཙོ་བོ་ལ་ནི་འཁོར་གྱིས་བསྐོར་བ་བཞིན། །
ཁོར་ཡུག་རི་བོའི་སྙིང་པོར་མངོན་འཕགས་ཤིང་། །
དྲིན་ཅན་མ་དེས་བུ་ལ་ཇི་བཞིན་དུ། །
གངས་ལྗོངས་བུ་ཚ་བདེ་བའི་པང་ན་སྐྱོང་། །
 
འབྱུང་ལྔའི་དྭངས་མ་བཅུད་དུ་འཁྱིལ་བ་ལས། །
དྲི་མེད་ཚུལ་ཁྲིམས་གཙང་མའི་སྐུ་མངའ་ཞིང་། །
ལྷུན་བརྗིད་རྩེ་མོ་མཁའ་ལ་རེག་པ་ནི། །
ཤེས་རབ་རལ་གྲི་གྱེན་དུ་བསླངས་པ་བཞིན། །
 
སྦྱིན་པའི་ཆུ་བཞི་ཆད་མེད་འབབ་གྱུར་གྱང་། །
གྲགས་པའི་མཚོ་བཞིའི་མཛོད་ལ་བྲི་བ་མེད། །
རང་བྱུང་རིན་ཆེན་འབྱོར་དགུའི་ཁུར་ལྕི་ཡང་། །
བཟོད་པ་བརྟན་པོའི་ཕྲག་པར་དགའ་བས་ལེན། །
 
འཛམ་གླིང་ཡང་རྩེའི་ཕྱོགས་ཀྱི་འཛིན་མའི་སྤོར། །
གཡོ་མེད་གྲུབ་པའི་བསམ་གཏན་ལ་གནས་ཤིང་། །
ལོ་རྒྱུས་ཆུ་བོ་འབབ་པའི་རྒྱུན་རིང་པོར། །
རང་མདངས་དཀར་པོའི་ལ་རྒྱ་བརྩོན་པས་འཛིན། །
 
ཕྱོགས་ལས་རྣམ་པར་རྒྱལ་བའི་རྒྱལ་མཚན་བཞིན། །
ས་ཡི་གོ་ལའི་སྒང་ན་མངོན་འཕགས་ཤིང་། །
འཇའ་སྤྲིན་འཁྲིགས་པའི་ནོར་བུའི་བསིལ་གདུགས་ནི། །
ཉི་ཟླའི་འཕྱང་འཕྲུལ་གཡོ་བ་དབུ་ལ་འཁོར། །
 
མཐའ་བཞི་མུ་ཁྱུད་རི་གླིང་ཆུ་མཚོ་ཡི། །
པད་མ་འདབ་བརྒྱད་གདན་དུ་བཀོད་པ་ལ། །
མཐོན་མཐིང་དགུང་སྔོན་དབྱིངས་ཀྱི་རྒྱལ་མོ་ནི། །
རྩིབས་སྟོང་འཁོར་ལོའི་ཐོག་ཕུབ་བསྐོར་བ་བཞིན། །
 
རི་རྩེ་གསེར་ལྡན་ཉ་མོའི་འཁྱུག་རྩལ་གྱིས། །
སྔོ་བསང་མཁའ་ཡི་རྒྱ་མཚོ་སྙེག་པ་དེར། །
རི་ལུང་བྱེ་བས་མཐའ་ནས་འཁོར་བ་ནི། །
བཀྲ་ཤིས་དཔལ་བེའུའི་རི་མོར་བཀོད་པ་འདྲ། །
 
འདོད་འཇོའི་བུམ་བཟང་ལ་ཡང་དམའ་འབེབས་པའི། །
རིན་ཆེན་གཏེར་གྱི་སྙིང་པོས་ཡོངས་བཟུང་ཤིང་། །
བསིལ་ལྡན་ཞིང་འདི་མཚོན་པའི་རི་མོ་བཞིན། །
གཡས་སུ་འཁྱིལ་བ་སྙན་པའི་རྗེས་ལ་འགྲོ། །
 
དྲེགས་ལྡན་ཁྱོད་ཀྱི་ཆེ་བའི་རྒྱལ་ཁ་རུ། །
གོ་ལར་རྡོག་བརྫིས་བྱེད་པའི་སྣང་ཚུལ་དེ། །
དབྱིག་འཛིན་མ་ནི་མཆོད་ཡོན་སྡེར་མ་བཞིན། །
སྟོབས་ལྡན་རུས་སྦར་དཔུང་པས་འདེགས་ཞེས་གྲགས། །
 
འདི་ལྟར་ཐོས་སོ་མ་དྲོས་འཛམ་བུའི་མཚོར། །
གསེར་ནག་སྒོ་ང་སྦྲུམ་པའི་ངོ་མཚར་གཏམ། །
རྨད་བྱུང་ཁ་འབབ་ཆུ་བོའི་རལ་པ་ནི། །
མཐའ་བཞི་རྒྱ་མཚོའི་ཀློང་ན་ཁྲུས་ལ་རོལ། །
 
གང་ཞིག་གསེར་རི་རོལ་མཚོའི་དཀྱིལ་འཁོར་ན། །
ཉི་ཟླའི་རྣ་ལུང་འཛིན་པའི་ལྷུན་པོ་ཡང་། །
དེ་ཡི་གཟི་བརྗིད་ལ་ནི་མ་བཟོད་དེ། །
ཡུལ་གླིང་གཞན་ཞིག་ཏུ་ནི་བྲོས་སམ་ཅི། །
 
གང་གི་ཞབས་སྐྱེས་བསྙེན་པས་མཆོག་ཐོབ་པའི། །
གླིང་ཆེན་བཞི་ཡིས་འདེགས་པའི་མུ་ཁྱུད་ཀྱང་། །
བྱེད་པོའི་ཡིད་ལས་འཁྲུངས་པའི་ངོ་མཚར་གཏམ། །
འགྲོ་བ་རྣམས་ནི་རྒྱུན་གྱི་ཁ་ཏོན་བྱེད། །
 
རིན་ཆེན་འབྱུང་གནས་རྒྱས་པའི་ཡོན་ཆབ་དང་། །
དབང་ཆེན་ས་ཡི་མན་ཊལ་ཕུལ་ནས་སུ། །
འཇིག་རྟེན་འདི་ཀུན་གུས་པའི་སྤྱི་བོ་ཡིས། །
གང་གི་ཞབས་སེར་ནོར་བུའི་རྡུལ་ལ་ལེན། །
 
མཐོ་བའི་དབུ་འཕང་དགུ་ཐོག་དགུང་ལ་བསྙེགས། །
བརྗིད་པའི་སྐུ་ཡིས་ཉི་ཟླ་ཕྲག་ཏུ་བླངས། །
བརྟན་པའི་རྩ་བ་རྒྱ་མཚོའི་གཏིང་ལ་ཟུག །
ཁྱོད་ཀྱི་ཆེ་བའི་ཡོན་ཏན་བསམ་མི་ཁྱབ། །
 
ལྷོ་ཕྱོགས་མ་ལ་ཡ་ནས་ཙན་དན་དང་། །
བྱང་ཕྱོགས་ཁ་བའི་ལྗོངས་ནས་བཟང་དྲུག་སོགས། །
དྲི་ཡི་བཞོན་པའི་རྟ་ལ་བསྐྱོན་ནས་སུ། །
ཁྱོད་ལ་དགྱེས་པའི་མཆོད་སྤྲིན་བསམ་མི་ཁྱབ། །
 
ཁ་བ་དཀར་པོའི་འདབ་མ་མཁའ་ན་འཕུར། །
ཁ་དོག་སྣ་ལྔའི་མེ་ཏོག་རི་ལ་འཁྲུངས། །
འཇའ་ཚོན་སྣ་ལྔའི་རི་མོ་སྐེད་ལ་འཁོར། །
ཁྱོད་ལ་མཛེས་པའི་ཡོན་ཏན་བསམ་མི་ཁྱབ། །
 
དགའ་བའི་ཚལ་ན་བུང་བའི་གཤོག་སྒྲ་དང་། །
པད་པའི་རྫིང་བུར་ངང་པའི་སྙན་འགྱུར་དབྱངས། །
བྱང་གླིང་རྫིའུའི་ལ་རིང་རྒྱང་གླུ་སོགས། །
ཁྱོད་ལ་བསྟོད་པའི་སྙན་ངག་བརྗོད་ལས་འདས། །
 
གཞན་ཡང་སྣང་སྲིད་ཆེ་དགུའི་གྲགས་པ་ཀུན། །
གཅིག་ཏུ་བསྡུས་ཤིང་བསྡོམས་པའི་དགེ་མཚན་གྱིས། །
གྲངས་མེད་འཇིག་རྟེན་ཞིང་ལ་དམའ་འབེབས་པའི། །
ནོར་འཛིན་མ་ནི་སྐལ་བཟང་དམ་པར་གྱུར། །
 
མདོར་ན་ལོ་རྒྱུས་འཁོར་ལོའི་རྩིབས་མ་རེར། །
ཁྱོད་ཀྱིས་བགྲོད་པའི་རྐང་རྗེས་བསུབ་མེད་ཅིང་། །
ཆུ་དཏེར་བཞི་ཡིས་འཁྱུད་པའི་ར་བ་ཀུན། །
གང་གི་གཟི་བརྗིད་སྣང་བས་སྒྲིབ་མེད་གསལ། །