གཡོ་དང་སྒྱུ་མའི་རྩེད་ཆས་མཚར་བོ།།
     བརྟན་དང་གཡོ་བའི་བདག་པོར་གྱུར་ཀྱང་།།
     རང་གཤིས་བོར་བའི་གྲིབ་གཟུགས་ནག་པོ།།
     ནང་སྙིང་རུལ་བའི་ཀུ་ཤུ་འདྲའོ།།
     འདོད་པའི་དབྱིངས་ལ་མུ་མཐའ་མེད་ལ།།
     སེམས་ངལ་གསོ་བའི་སྟེགས་བུ་མེད་པས།།
     ཤབ་ཤུབ་གཏམ་གྱི་རླུང་བུའི་ངོགས་ན།།
     སུ་ཡི་རྨི་ལམ་ཐབས་ཀྱིས་བརྐུས་ཡོད།།
     ས་སྨུག་དྲག་པོའི་གདོང་ན་འཕྱོ་བའི།།
     བས་མཐར་དྲངས་པའི་སེམས་ཀྱི་རེ་བ།།
     མེ་ལྕེ་དམར་པོའི་སྟངས་སྟབས་འོག་ན།།
     ཚི་དྲེག་རིམ་དགུའི་མྱ་ངན་གྱོན་ཡོད།།
     ཞོ་དང་འོ་མའི་གཏང་རག་སྣ་ཚོགས།།
     ལྷ་ཡི་ཞིང་ལ་སྟོབས་ཀྱིས་མཆོད་ཀྱང་།།
     རླུང་གིས་སྐུལ་བའི་ལག་ཟུང་ཕྲ་མོ།།
     སྐྱོ་གར་ཟབ་མོའི་ཀློང་ན་བཟི་འདུག།
     ཡང་ཡང་འཕྱུར་བའི་སྒྲོ་སྐུར་སྐྱུར་མོ།།
     ལུས་ལ་བགོས་པའི་ཁྲག་ཐིགས་མིན་ཡང་།།
     རྒྱང་ལ་བཞུད་པའི་བུ་ཆུང་ཁེར་རྐྱང་།།
     ལྕགས་སྒྲོག་ངར་མའི་ནུས་མཐུ་ལྡན་ནོ།།
     དུས་ཚིགས་བཞི་པོའི་སྡང་སྡིག་ཁྲོད་ནས།།
     ཐུན་གཅིག་ཉལ་བའི་གནས་ཚང་དབུལ་བས།།
     བརྗོད་པར་དཀའ་བའི་གད་སྙིགས་རྫོབ་པོ།།
     མི་ལོ་ལྔ་བཅུའི་ཐེམ་པ་འདྲའོ།།
     ཨ་ཕའི་མིང་བྱང་ས་ལ་གཡུགས་པས།།
     སེམས་ཀྱི་སྡོམ་པ་རྨང་ནས་ཤོར་འདྲ།།
     ལས་དབང་ཞེས་པའི་དྲི་ངན་རྫོབ་པོ།།
     མི་རིགས་འདི་ཡི་གཤེད་མར་ཆས་འོང་།།
     ལུས་སེམས་བཅིངས་པའི་སྒྲོག་གུ་དམར་པོ།།
     སྐེ་ལ་དཔྱངས་པའི་སྲུང་མདུད་འདྲ་ཡང་།།
     མར་དང་རྩམ་པའི་རོ་བཅུད་འཛོམས་པས།།
     གོམ་འགྲོས་ཡང་མོ་རླུང་གིས་བཏེགས་བྱུང་།།