སྙིང་གི་ཟབ་ས་ནས་འཁོར་བའི་དྲིན་ལྡན་བླ་མ།།
     སེམས་ཀྱི་གཅེས་ས་ནས་བསྒོམ་པའི་དགེ་བཤེས་དམ་པ།།
     རྒྱུ་མཚན་ཅི་ཞིག་ལ་ཐུགས་ཀྱི་མོས་པ་ཁེན་ནས།།
     དག་ཞིང་གང་ཞིག་ལ་ཐོལ་གྱིས་བྱོན་པ་མགྱོགས་སོང་།།
    
     ངོ་གདོང་ལྗེན་པ་ནས་བཞུར་བའི་ཆུ་ཐིགས་རློན་པ།།
     བྲང་ཁོག་དྲོད་མོ་ནས་བཏོན་པའི་གདུང་འབོད་སྐྱོ་བོ།།
     དུས་དྲུག་འཁོར་མོ་ལ་རིམ་པ་སྙིང་ནས་བཏོན་པས།།
     བརྩེ་བའི་སྤྱན་མིག་ཅིག་ཕྱིར་ལ་འཁོར་རན་མིན་ནམ།།
    
     སྤྲིན་གྱི་བང་རིམ་ནས་འཕུར་བའི་རྒོད་པོ་གན་ལ།།
     ཐག་རིང་གནམ་ས་ཡིས་བསྐལ་རུང་མཐོང་རྒྱུ་ཡོད་དེ།།
     འཇིག་རྟེན་གནས་ལུགས་ཀྱི་ངོ་བོ་གསལ་པོར་གཟིགས་པ།།
     ཁྱེད་ཉིད་ལམ་སང་དུ་མཇལ་རྒྱུ་མེད་ནོ་ཅི་རེད།།
    
     ཉི་གཞོན་ཤར་རི་ནས་འཇིག་རྟེན་གསལ་པོར་སྒྲོན་དུས།།
     སྣོད་བཅུད་མ་ལུས་ཀྱི་འཛུམ་དཀར་གདོང་ལ་གྱོན་མོད།།
     སེམས་ཀྱི་ཉི་མ་དང་འདི་ཕྱི་ཁ་ཁར་གྱེས་པའི།།
     ཉམ་ཆུང་སློབ་བུ་ངའི་ངོ་ལ་འཛུམ་ཞིག་མི་འདུག།
    
     དབྱར་གྱི་ཆར་ཆུ་དེ་ཉིན་ནས་ཉིན་བཞིན་རྒྱས་པའི།།
     ངང་ཚུལ་དེ་དག་གིས་ང་ལ་དྲན་སྐུལ་གཏོང་བཞིན།།
     སྙིང་གི་རྣོ་ས་ན་འཁོར་བའི་དྲན་གདུང་ཟབ་མོ།།
     མིག་གི་མཆི་མ་དང་ལྷན་དུ་ཉིན་བཞིན་མོད་བྱུང་།།
    
     གཞན་དག་རྩེ་མཚར་གྱི་སྤྲོ་སྣང་དགུང་དུ་འགྱོག་དུས།།
     ཁོ་བོ་དྲན་གདུང་གི་མཆི་མ་ཁོག་ནས་མིད་ཀྱིན།།
     ཁྱེད་ཀྱི་མཚན་ཐོགས་ནས་ཁེར་འབོད་ལན་གསུམ་བྱས་པ།།
     ཞིང་ཁམས་དེ་ག་རུ་སྙན་གྱིས་གསན་པ་ཨེ་བྱུང་།།
    
     དབྱིངས་སུ་ལྷོག་ལྷོག་ཏུ་འཕྱུར་བའི་སྤྲིན་དཀར་ཕུང་པོ།།
     ཁྱོད་ཉིད་དྲན་གདུང་གི་སེམས་པ་རྣམ་དག་ཡིན་ལ།།
     གཤོང་ནས་མར་མར་དུ་བཞུར་བའི་རྫ་ཆུ་དྭངས་མོ།།
     ཁྱོད་ཉིད་དྲན་གདུང་གི་མིག་ཆུ་ལྷད་མེད་ཡིན་ནོ།།
    
     སྙིགས་མའི་དུས་རབས་ལ་ངན་ཁག་གཡོར་ས་བཅོས་ཏེ།།
     ཁྲིམས་འཆལ་བཙུན་གཟུགས་ཀྱིས་ཁོར་ཡུག་ཀུན་ལ་ཁྱབ་དུས།།
     འདུལ་ཁྲིམས་དག་གཙང་གི་བསླབ་སེམས་རྒྱུད་ལ་འཁྲུངས་བའི།།
     སྟོན་པའི་རྗེས་འཇུག་ཁྱེད་སྙིང་ལ་ལྷག་ཏུ་འཁོར་ཡོང་།།
    
     སྒོམ་སྒྲུབ་ཉམས་རྟོགས་ཀྱི་ངོ་བོ་རྨང་ནས་བྲལ་བཞིན།།
     རྣམ་ཤེས་ཁྲི་ཁྲག་གི་མགོ་བོ་སྐོར་མཁན་མང་དུས།།
     མི་གཡོ་ཏིང་འཛིན་གྱི་བསླབ་པ་ཁོག་ནས་རྫོགས་པའི།།
     སྒོམ་ཆེན་བྱ་བྲལ་ཁྱེད་ཡིད་ལ་དེ་བས་དྲན་ཡོང་།།
    
     ཚིག་རིས་སྐམ་པོ་ལ་དཔྱད་བསྡུར་ཡུན་དུ་བགྱིས་ཏེ།།
     ཆོས་ཀྱི་ངོ་བོ་དེ་གང་ཡིན་རྨོངས་མཁན་མོད་དུས།།
     གནས་ལུགས་རྗེན་ཆར་དུ་གཟིགས་པའི་བློ་མིག་ཕྱེས་པ།།
     རྣལ་འབྱོར་དབང་ཕྱུག་ཁྱེད་ཞེ་ལ་ལྷག་ཏུ་དྲན་ཡོང་།།
    
     མདོར་ན་རྫུན་ཟོལ་གྱིས་མགོ་བོ་སྐོར་མཁན་མང་བའི།།
     དེང་དུས་ཁོར་ཡུག་གི་ཕྱི་ནང་ཀུན་ནས་བསླགས་ཀྱང་།།
     ཆོས་པ་རྣམ་དག་ཅིག་ཉིན་སྐར་གྲངས་དང་མཚུངས་བས།།
     དད་འདུན་ཁྱད་པར་ཞིག་སྙིང་དབུས་དཀྱིལ་དུ་བརྟན་ཡོད།།
    
     ཉིན་བྱེད་ནུབ་རི་ནས་འཇིག་རྟེན་གཞན་ལ་འཁོར་རུང་།།
     དཀར་ཆུང་དུང་ཟླ་ཞིག་ཤར་རིའི་ཕྲག་ཏུ་ཚེས་ངེས།།
     དེར་མཚུངས་ཁྱེད་ཉིད་ཀྱི་དགྱེས་ཞལ་དབྱིངས་སུ་ཟིམ་མོད།།
     ཡང་སྲིད་དམ་པ་ཞིག་དད་པའི་ཀློང་ནས་བསྒུགས་ཡོད།།