ལོ་ཟླ་བསྟུན་མར་འཁོར་བའི་ཁུགས་སོ་ནས།།
     བདག་སེམས་སྐྱི་བསེར་རླུང་བུ་སུ་ལ་ཐོགས།།
     ཕྱིར་དྲན་སྤྲིན་དཀར་འཁྱིལ་བའི་གུར་ཁང་ན།།
     ཁྱོད་ཞལ་དུང་མདོག་ཟླ་བ་མཛུམ་གྱིས་ཚེས།།
     ལོ་རྒྱུས་བརྒྱུད་རིམ་མང་པོ་སོང་མིན་ཞིང་།།
     གློ་བུར་རྐྱེན་གྱི་བྱུང་བ་ཡིན་ཡང་ཆོག།
     སེམས་ཀྱི་ཟབ་སར་ཕྱིན་པའི་ཟིན་ཐོ་འདི།།
     མིག་ཆུས་རམ་འདེགས་བཅས་ཏེ་གླེང་ན་འདོད།།
     དགའ་བའི་མོད་ལ་འཛུམ་པའི་སོ་ཕྲེང་མངོན།།
     སྐྱོ་བའི་ཚེ་ན་མིག་ནས་མཆི་མ་ལུད།།
     སེམས་པ་སྙི་བའི་རྒྱང་རིང་བུ་ཆུང་ངའི།།
     རང་ཚུགས་ཤོར་འདི་བརྩེ་བ་ཟབ་པས་ཡིན།།
     ཁྱོད་ལ་ཁྱོད་ཀྱིས་གཅེས་པའི་སྙིང་གྲོགས་ཤིག།
     ང་ལ་ང་ཡིས་བཅངས་བའི་རེ་བ་ཞིག།
     མི་གཅིག་སོ་སོར་གྱུར་བའི་སྣང་ཚུལ་འདིས།།
     དམར་ཆུང་སྙིང་ལ་བཞག་པའི་རྨ་ཁ་ལྕི།།
     མི་སེམས་གཙང་མས་གཉོར་བའི་དུང་ཞེན་གྱིས།།
     སྙིང་གཏམ་དྲོད་མོ་ལག་པས་བཀྱག་དུས་སུ།།
     སྣ་གཉིས་ཚིག་གི་གཏམ་ལན་བྱིན་པ་ཡིས།།
     སྐྱོ་གདུང་འབུམ་གྱིས་གཏམས་པའི་ཁུར་བོ་བརྩེགས།།
     འོན་ཏེ་ང་ལ་ཁེ་ཕན་མ་ཐོབ་ཅིང་།།
     གལ་སྲིད་སྐྱོ་བས་མནར་ཏེ་ཤི་ན་ཡང་།།
     ཁྱེད་སེམས་དགའ་ན་བསམ་པའི་ཀུན་སློང་གིས།།
     ཁྱོད་ལ་བྱིན་པའི་ཁེ་དབང་ད་དུང་ཡོད།།
     དྲན་པའི་དུད་སྤྲིན་བྲང་ཁོག་སྟོད་ནས་འཁོར།།
     གདུང་བའི་མཆི་མ་སེམས་ཀྱི་གཞུང་ནས་འབབ།།
     སྐྱོ་བའི་སྐྱུར་རྩི་མྱང་བའི་འཁྱམ་པོ་ང་།།
     བཙན་པོ་ལས་ཀྱིས་གཅིག་པུར་གཏོང་ན་ཐང་།།
     གྱེས་ཕྱག་སྐྱོ་བོ་ཞིག་གིས་སྣེ་འདྲེན་འོག།
     བུ་ང་ཁེར་རྐྱང་རྒྱང་དུ་འགྲོ་དགོས་དུས།།
     མཐའ་མཇུག་ང་ལ་སྟོན་པའི་ཞལ་སྒོ་ནས།།
     མིང་ལ་ལན་གསུམ་འབོད་པའི་རེ་བ་ཡོད།།
     མི་ཚེ་ཟེར་བ་བདེ་སྡུག་འཁོར་ལོ་ཅན།།
     བརྩེ་དུང་ཟེར་བ་དགའ་སྐྱོ་སྤེལ་མ་ཅན།།
     ཁྱོད་ཀྱིས་བརྗོད་པའི་ཚིག་ཉུང་འདི་རིགས་ཀྱིས།།
     དོན་མང་བསྡུས་པ་ད་གཟོད་ཁོ་བོས་རྟོགས།།
     སྒལ་ཚུགས་མེད་དང་ཡིད་ཆེས་མེད་ཀི་སོགས།།
     ཚིག་ངན་དམོད་པའི་མཆིལ་ཞགས་འཕངས་ན་ཡང་།།
     ཁྱོད་ལ་དུང་བའི་གཞུང་དྲང་གཤིས་རྒྱུད་འདི།།
     བཅོས་མེད་རེད་ཅེས་ཁོ་བོས་དེང་འདིར་སྨྲ།།
     ཁྱོད་ཀྱིས་བདེ་མོ་བཞག་ནས་ཕེབས་སོང་ན།།
     ང་ཡིས་མིག་ཆུ་གཙང་མའི་སྐྱེལ་མ་བཅས།།
     རང་དབང་མ་ལོན་ཤི་བའི་བརྩེ་དུང་གི།
     དུར་ས་དེ་ནས་ཁྱོད་ལ་སྙིང་གཏམ་འཇོག།
     ང་ལ་ཐོབ་འདོད་ཁྱོད་ཀྱི་ཡོད་ཚད་རེད།།
     ང་ཡིས་ཉན་འདོད་ཁྱོད་ཀྱི་སེམས་གཏམ་རེད།།
     མི་ཁ་གཞན་ངོ་འཚོ་འདོད་མེད་ན་ཡང་།།
     ཁྱོད་དང་མི་བསྟུན་ཀ་མེད་སྔོན་ལས་རེད།།
     ཉིན་དེར་ཉི་མའི་གྲོང་གི་རྒྱ་ཇ་དང་།།
     འགྲོགས་པའི་སེམས་གཏམ་བྲོ་བ་ཞིམ་མངར་ཅན།།
     སྙིང་གི་སྙིང་ལ་སིམ་པའི་ས་བོན་ལས།།
     དྲན་པའི་སྡོང་ལོ་རྒྱས་པའི་གནོན་ཤུགས་སྟོབས།།
     ཐོག་མར་སྤྱི་བཏང་གྲོགས་ཀྱི་ལག་འཇུ་ལས།།
     ཐ་མར་བརྩེ་བས་མྱོས་པའི་བདེ་མོར་གྱུར།།
     འཇིག་རྟེན་ཡོད་ཚད་འགྱུར་བའི་གྲུ་ཟུར་ན།།
     ཁྱོད་དང་འུ་གཉིས་འགྱུར་ལ་མཚར་དོན་ཅི།།
     མཆི་མས་མགྲིན་པ་བརྣངས་ཏེ་ཤོད་དཀའ་ཞིང་།།
     བརྩེ་བའི་མེ་ཕུང་འབར་བས་སྲེག་ལ་ཁད།།
     གློ་སྙིང་མཆིན་གསུམ་བཏོན་པའི་སྙིང་གཏམ་འདི།།
     ཁྱོད་ཀྱིས་རྟོགས་པའི་དུས་ལ་རེ་བས་སྒུག།
     སེམས་འདི་དབྱིངས་སུ་འཕུར་བའི་རྒོད་པོ་བཞིན།།
     རང་དབང་ལམ་ལ་ཆས་པའི་ཉིན་མོ་དང་།།
     བརྩེ་བ་གཤོང་ནས་བཞུར་བའི་ཆུ་རྒྱུན་བཞིན།།
     ལྷུང་ལྷུང་འབབ་པའི་དུས་དེ་ནམ་ཞིག་ཡིན།།
     སྙིང་གཏམ་བདུད་རྩི་སིལ་མ་ལྷོད་དུ་བབས།།
     སྤྲོ་དགའི་མེ་ཏོག་ཆུན་པོ་འཛུམ་གྱིས་བཞད།།
     ལྷ་ཡུལ་ལས་ཀྱང་སྐྱིད་པའི་ཞིང་ཁམས་ནས།།
     སྐྱོ་གདུང་མདུད་པ་གྲོལ་དུས་ནམ་ཞིག་ཡིན།།
     ཚིག་རེའི་རྒྱབ་ན་དཔོག་དཀའི་གསང་བ་རེད།།
     གསང་བ་རེ་རེའི་མདུན་ན་གབ་ཚིག་རེ།།
     གཉོམ་ཆུང་བུ་ངའི་ལྷད་མེད་བརྩེ་དུང་ལ།།
     རང་དབང་ཐོབ་པའི་ཉིན་མོ་ནམ་ཞིག་ཡིན།།
     རི་ཆུ་ལེ་དབར་སྟོང་གིས་ཆོད་ཀྱང་རུང་།།
     གཏམ་ངན་མི་ཁ་བཙན་པོས་འགོག་ན་ཡང་།།
     ཁྱོད་ལ་འཐད་པའི་གཏམ་བཟང་ཡོད་རྒྱུ་ན།།
     འཛེམ་དོགས་སྤུ་ཙམ་མེད་པའི་ཆོད་སེམས་ཡོད།།
     སྤྲིན་གྱི་མངལ་ལས་འཐོར་བའི་སྤྲང་ཆར་དེ།།
     ཡིད་འོང་མེ་ཏོག་གསོས་སུ་བབས་པ་བཞིན།།
     སེམས་ཀྱི་ཀློང་ནས་ཐོན་པའི་སྙིང་གཏམ་འདིས།།
     ཁྱོད་ལ་གཡོ་འགུལ་ཐེབས་པར་ཡིད་ཆེས་ཡོད།།