ལྷ་ལམ་རྒྱུ་སྐར་གྲངས་མེད་འཆར་ན་ཡང་།།
     མུན་པའི་སྨག་རིམ་སེལ་ལ་ཟླ་བ་སྟེ།།
     ལྗོངས་འདིར་མཁས་དབང་རྣམ་མང་ཕེབས་ན་ཡང་།།
     མདུན་སྐྱོད་ལམ་སྟོན་སྒྲོན་མེ་དགེ་ཆོས་མཐོང་།།
     རྒྱ་གར་ལྷ་ཡི་ཡུལ་ལ་བཀུར་བསྟི་དང་།།
     རྒྱ་ནག་ཀླུ་ཡི་ཡུལ་ལ་བརྩི་བཟོ་བའི།།
     གུས་སྲོལ་བཅོས་མེད་སོར་འཇོག་བྷོ་ཊའི་སེམས།།
     དཔྱོད་གསུམ་ཆུ་ཡིས་འཁྲུ་བའི་དགེ་ཆོས་མཐོང་།།
     ཀླ་ཀློ་སྲིན་མོའི་ཡུལ་ཞེས་སྤྱོ་བའི་ཚིག།
     མེས་དབོན་སྙན་ལ་བདུད་རྩིར་འགྱུར་ན་ཡང་།།
     ལ་རྒྱའི་སྡང་མིག་མ་ཟུམ་དགོ་ཆོས་ངོར།།
     མི་བཟོད་མདའ་མོ་སྙིང་ལ་སྣུན་བཞིན་མཐོང་།།
     རྟོག་བཟོའི་བདེ་སྐྱིད་འཇའ་ཚོན་སྣ་ལྔའི་གཟུགས།།
     མི་ལོ་སྟོང་ལྷག་རེ་བས་འཚོལ་བརྩོན་པ།།
     དོན་སྙིང་འབྲས་བུ་སྦུན་པ་འཕྱར་འདྲ་བའི།།
     ངོ་བོ་རྗེན་པར་སྟོན་པའི་དགེ་ཆོས་མཐོང་།།
     ལྟ་གྲུབ་མི་མཐུན་འགལ་བའི་ཆགས་སྡང་ལམ།།
     ནན་གྱིས་བགྲོད་བའི་རང་རིགས་རྣལ་མའི་སེམས།།
     རྨོངས་བའི་རྒྱ་རུ་ཨུ་ཚུགས་སྡོམ་པ་དེ།།
     གྲོལ་ལ་དཔའ་བའི་དགེ་ཆོས་ལྷག་པར་མཐོང་།།
     ས་གཙང་མཐོ་སྒང་འཚོ་བའི་ཁ་བ་ཅན།།
     ས་ཆ་གཞན་གྱི་མི་དང་མཚུངས་པའི་ཕྱིར།།
     ས་ལམ་གྲུབ་མཐས་ལྷ་རིགས་སློབ་པ་ལས།།
     ས་སྟེང་མིར་སྦྱོང་སྐུལ་བའི་དགེ་ཆོས་མཐོང་།།
     གོ་ལ་འཕོ་འགྱུར་དངོས་རྣམས་གཞོག་ཞིག་བཅས།།
     སྐད་ཅིག་ཡུན་ལའང་འགྱུར་བ་མཆིས་མཐོང་ན།།
     བཅོས་མེད་དཔྱོད་བཟོད་བྲལ་ཡང་རང་རིགས་སྲོལ།།
     སྙིགས་དོར་བཅུད་ལེན་སྐུལ་བའི་དགེ་ཆོས་མཐོང་།།
     མི་རིགས་གཞན་ལ་བསྒྲུན་ནུས་རང་རིགས་བློ།།
     སྩོལ་བར་མཛད་པ་བྷོ་ཊའི་དོད་དབོན་ཏེ།།
     རྟོག་བཏགས་རྙེད་དཀའི་རྫུན་གྱི་འཁོར་ལོ་ཆེ།།
     སྐོར་བར་བྱེད་པོའི་བཀའ་དྲིན་གང་ན་མཐོང་།།
     ལུས་འཛིན་ཚེ་སྲོག་མ་ལས་བཙམ་པའི་སེམས།།
     ངར་འཛིན་འདོད་སྐྱོང་མི་དགོས་འཚོ་ཐབས་གང་།།
     བདག་འཛིན་སྤོང་བའི་བསམ་བློ་ཉི་ཚེ་རིགས།།
     རྟག་འཛིན་ཅན་ལ་བདེ་བ་ཅི་ཞིག་མཐོང།།
     དེས་ན་ལུང་དབང་མན་ངག་མོ་རྩིས་པྲ་ལ་ཡིད་ཆེས་བཅོས་པ་རྣམས།།
     ལུས་སེམས་ལག་ཟུང་མིག་རྣ་རྐང་ལ་མི་བརྟེན་འཚོ་བ་གང་ནས་རྙེད།།
     གོང་མའི་བཀའ་བཙན་ལྟ་བ་གཙིགས་འཛིན་རང་ལུགས་སྒྲོག་བཅིངས་གོམས་པའི་གཤིས།།
     རང་ཅག་གནས་བབ་ཕྱོགས་ལ་བསམ་ན་ཨུ་ཚུགས་དགོས་མིན་ཞིབ་དཔྱོད་ཞུ།།