༼ དབྱངས་ལྡེའུ། ༽ 2024-06-07
མ་བཀྲུས་བཞིན་དཀར་བདེ་འབྱུང་གཙུག་གི་རྒྱན། །
མ་བཀོད་སྤྱན་རས་གཟི་མིག་དགུ་པའི་དཔལ། །
མ་སྨད་མཁུར་ཚོས་མཛེས་སྨིན་མཛའ་ན་མོ། །
མ་མཆོག་དབྱངས་ཅན་ལྷ་མོའི་ཞབས་ལ་སྙེན། །
རྣམ་དཀར་འོ་མའི་མཚོ་ཆེན་རྒྱས་པའི་ངོར། །
རྣམ་གྲོལ་ཐར་བའི་དོན་གཅེས་ངང་དཀར་སློབ། །
རྣམ་དག་མི་འཇིག་དད་གསུམ་ཨ་ལོང་དུ། །
རྣམ་མཁྱེན་ཐུགས་རྗེའི་ལྕགས་ཀྱུས་ལེགས་འཛིན་ཀྱེ། །
རབ་གསལ་སྤྱན་རས་རི་དྭགས་སྐྲག་པའི་མིག །
རབ་དཀར་ཟླ་བའི་བཞིན་ངོར་མཛེས་གཡོ་ཞིང་། །
རབ་ཡངས་འཛིན་མའི་མཐའ་མཉམ་མ་གྱུར་འགྲོར། །
རབ་མཆོག་བརྩེ་བས་ལེགས་སྐྱོང་བྱམས་ཆེན་མ། །
དཀར་མཛེས་ཚེམས་དཀར་མུ་ཏིག་དར་བརྒྱུས་མ། །
དཀར་གསལ་སྤྲིན་པའི་དར་གོས་སྟོད་གཡོག་མ། །
དཀར་འཇམ་གཞོན་ནུའི་ལང་ཚོའི་ངག་དབང་མ། །
དཀར་ཕྲའི་གློག་གི་ལུས་ལས་མཉེན་ལྕུག་དཔལ། །
ཀུན་གསལ་སྤྲོས་མེད་དབང་གཞུའི་གུར་ཁྱིམ་དུ། །
ཀུན་རིག་མཁྱེན་གཏེར་ཉིན་བྱེད་ལང་ཚོ་ཅན། །
ཀུན་དགའི་སྒྲ་དབྱངས་སྙན་པའི་བསྡུས་གཟུགས་མ། །
ཀུན་ཏུ་དགྱེས་པའི་སྙན་ཚིག་བླ་བྲེ་གསོལ། །
དཀར་མཛེས་མཛེས་ལེགས་དཔལ་འདུས་ཟླ་བའི་ཕྲེང་། །
རབ་ཡངས་ཡངས་པའི་བྲང་གཞུང་རྒྱན་བཀླུབས་ཏེ། །
ཡེ་སྟོང་སྟོང་པའི་དབྱིངས་སུ་གར་རོལ་པའི། །
ཕར་ཕྱིན་ཕྱིན་དྲུག་མཐར་སོན་ལྷ་དེར་མཆོད། །
མཛེས་བྱེད་ལང་ཚོའི་ཕར་ཕྱིན་ལེགས་པར་སྨིན། །
སྨིན་ལེགས་ལེགས་བྲིས་གཞོན་དབུ་མངོན་དུ་འཕགས། །
འཕགས་མའི་ཡོན་ཏན་ཡོངས་འདུས་རིག་བྱེད་མ། །
མ་ལུས་སྲིད་ཞིའི་དབྱངས་ཀྱི་སྙན་པ་སྩོལད། །
རྒྱལ་ཀུན་ཐུགས་བསྐྱེད་ཀྱིས་སྦྲུམ་དབྱངས་ལྷས་མ། །
མ་སྨད་ཕྱིན་དྲུག་དོན་ཀུན་ཐུགས་རྒྱུད་སྨིན། །
སྨིན་ཕྲའི་གནག་སྣུམ་རེ་ཁ་མཛེས་འཁྱུག་མ། །
མ་ལི་ཀ་ཡི་མདངས་ལྟར་ཁྱེད་སྐུ་དཀར། །
སྲི་ཞིའི་དབྱངས་ཀྱི་བསྡུས་གཟུགས་ངང་མོ་དཀར། །
དཀར་ཞོ་མདངས་ལས་ཁྱད་འཕགས་ཡིད་འོང་སྐུ། །
སྐུ་རྒྱན་བྱུ་རུའི་འཕྱང་འཕྲུལ་བྲང་ལྟོངས་མཛེས། །
མཛེས་བཀྲག་ལྟ་བའི་མི་ངོམས་བསམ་གཏན་མ། །
སྙན་ཤལ་སྤྲིན་དཀར་འདབ་མ་རྒྱས་པའི་ལྟོངས། །
མཛེས་བྱད་གསེར་གྱི་རྣ་ཀོར་རྨད་བྱུང་ཅན། །
འཛིན་མེད་བསིལ་རླུང་བསྒུལ་བའི་སིང་སྒྲ་ཡིས། །
སྙན་འཕྲིན་ངོ་མཚར་འཛིན་པར་སྐྱེངས་པ་སྟེར། །
མི་བཤིག་རྡོ་རྗེའི་སྲུང་ཕྲེང་བསྐོར་བའི་དཀྱིལ། །
དཀར་དམར་དར་གོས་སྐུར་གསོལ་གར་མཁན་མས། །
དཀར་འཇམ་དབྱངས་ཀྱི་སྐུད་སྣེར་སོར་རེག་སྟེ། །
མི་ངོམས་སྒྲ་དབྱངས་སྙན་པ་ཆར་ལྟར་བསྙིལ། །
བྱུར་དམར་མུ་ཁྱུད་མཛེས་པའི་སྨྲ་སྒོའི་ཚལ། །
ངག་རིག་པད་མོའི་འཛུམ་ཁ་དགོད་པ་ཡིས། །
སྨྲ་དབང་མཁས་ཡིད་བུང་བ་མྱོས་བྱེད་ཀྱི། །
ངག་དབང་བརྩེ་བའི་ཡུམ་ཆེན་གང་དེར་རྒྱལ། །
སྒྲ་རྒྱན་མུ་ཏིག་དོག་པོས་མཛེས་བཀྲམ་པའི། །
རྨད་བྱུང་དབྱངས་གསལ་མེ་ལོང་འདི་ཀོ་ནི། །
ངག་དབང་དབྱངས་ཅན་དགྱེས་པའི་འཛུམ་རིས་བཞིན། །
དཔྱོད་ལྡན་མཁས་པའི་སྤྱན་དུ་དཔྱིད་འཇོ་སྨོན། །
རྩོམ་གསར། 10