ཨེ་མ་ནམ་མཁའ་སྔོ་ཞིང་དྭངས་པའི་ངོས།།

རབ་གསལ་ཉི་མའི་དཀྱིལ་འཁོར་རྫོགས་པར་འཆར།།

མཛེས་པའི་འོད་ཀྱི་རྣ་ཆ་གཡས་གཡོན་འཛིན།།

འཇིག་རྟེན་མུན་པའི་དཔུང་ཚོགས་ཕམ་པས་བྲོས།།

གསལ་ཞིང་འཚེར་བའི་འོད་ཀྱི་ཟེགས་མ་ནི།།

འགྲོ་ལ་དཔྱངས་པའི་བརྩེ་བའི་དར་སྐུད་ཡིན།།

དྲོ་འཇམ་འོད་ཀྱི་ཁུ་བས་བྲན་པའི་ཚེ།།

གྲང་བའི་མྱ་ངན་སྐད་ཅིག་ཉིད་ལ་བསལ།།

ལང་ལོང་ཆུ་འཛིན་འཁྲིགས་པའི་གདན་སྟེང་དུ།།

འགྱུར་མེད་བཞིན་གྱི་འཛུམ་མདངས་རྣོན་པོ་ཡིས།།

ནོར་འཛིན་སྒེག་མོའི་བཞིན་རས་མ་ལུས་པ།།

ཉིན་མོར་བྱེད་པའི་ཡོན་ཏན་ཆ་ལག་རྫོགས།།

མ་ཟིན་ངོ་མཚར་རང་བྱུང་སྐྱེད་མོས་ཀྱི།།

ཚལ་དེར་ཡུད་ཙམ་གནས་པ་དེ་ཡི་ཚེ།།

དྲི་ཞིམ་དང་བཅས་མེ་ཏོག་སྣ་མང་གི།།

མཛེས་སྡུག་མཐོང་ཚེ་སེམས་ཀྱི་ངལ་དུབ་བརྗེད།།

འཕུར་ཞིང་རྩེན་པའི་སྦྲང་མའི་གཤོག་པ་ལ།།

ཡང་ཡང་བལྟས་རྗེས་ང་རང་འཕུར་བར་འདོད།།

ཐོས་འཛིན་རྣ་བ་རང་དབང་མེད་པའི་ངང་།།

སྙན་པའི་གླུ་ལ་ཡུན་རིང་ཆགས་འགྲོ་ཨང་།།

ཁུ་བྱུག་བུ་མོས་དཔྱིད་ཀའི་དུས་ཚིགས་ཀྱི།།

མཛེས་ཤིང་སྡུག་པའི་དཔལ་ཡོན་མ་ལུས་བསུས།།

རྩི་ཤིང་ལོ་འདབ་སྐྱེས་སྟོབས་གསར་པ་ཡིས།།

སྐྱེས་འགྲོའི་སེམས་ལ་བདེ་སྐྱིད་འཚོ་བ་བསྐྲུན།།