དྲོད་ཉི་ཟེར་རྡུལ་གྱི་འོད་སྟོང་གིས།།

ཆུ་ཆབ་རོམ་ཤེལ་དཀར་དལ་འགྲོ་བྱས།།

ས་ནོར་འཛིན་གཡང་ཁྱིམ་རློན་བག་ཆགས།།

སྔོ་རྩི་ཤིང་མགོ་བོ་གཡུག་གིན་འདུག།

སྙན་གཡུ་འབྲུག་གླུ་སྐད་མཁའ་ནས་གྲགས།།

གནམ་མཚམས་སྤྲིན་བར་ནས་ཆར་ཆུ་འཐོར།།

ས་རི་ལུང་སྟེགས་བུ་སྔོ་ལྗང་ལྡེམ།།

དུས་དཔྱིད་ཟླ་བསུ་བའི་དབུ་ཁྱུད་འབྲི།།

གྲང་ལྷགས་རླུང་བསེར་བུ་རྒྱང་དུ་བསྐྱལ།།

གངས་ཁ་བའི་འདབ་མ་ཆུ་ལ་འཐིམ།།

སྤང་མེ་ཏོག་སེར་ཆེན་མགོ་བོ་གཡོ།།

དུས་དཔྱིད་ཟླ་ཚེས་བྱུང་སེམས་པ་སྤྲོ།།

མཛེས་མེ་ཏོག་འབུངས་པའི་སྐྱེད་ཚལ་དུ།།

བྱ་ཁུ་བྱུག་མོན་ནས་མགྲོན་ལ་བྲེལ།།

སེམས་ཚོར་བའི་ན་ཆུང་དགའ་མ་ལགས།།

དུས་དཔྱིད་ཟླ་ཚེས་པས་སྙིང་ལ་དྲོ།།

སྐྲ་དབུ་དཀར་དུང་གི་ཚོན་མདངས་ཅན།།

ལུས་གཉེར་མས་གང་བའི་རྒན་པོ་དེས།།

གཡང་འབྲུ་རིགས་ནོར་གྱི་ས་བོན་དེ།།

གཞི་ནོར་འཛིན་ཁྱོན་ལ་འདེབས་དུས་བསུ།།

མཛེས་ཆུ་སྐྱེས་མེ་ཏོག་པད་དཀར་གྱི།།

ལུས་ལང་ཚོའི་འདབ་མ་མཚར་སྡུག་བཞད།།

འབུ་སྦྲང་ཆུང་འཕུར་ལྡིང་གཤོག་རྩལ་བདེ།།

དུས་དཔྱིད་ཟླ་ཡག་པོ་ངོ་མཚར་ཆེ།།

རྩོམ་པ་པོ། རང་མདངས།

རྩོམ་སྒྲིག་པ། མགར་རྒྱལ་སྲས།