སྔོ་སངས་ཀྱི་མཁའ་ལས་སྤྲིན་དཀར་ཚོམ་བུར་རྒྱུ།།

དྲོ་འཇམ་གྱི་ཉི་འོད་ཡངས་པའི་ས་གཞིར་འཕྲོས།།

མཛེས་སྡུག་གི་ལྷུན་པོ་བར་སྣང་མཁའ་ལ་ཟུག།

དྭངས་གཙང་གི་ཆུ་བོ་འཛམ་གླིང་ཕྱོགས་བཞིར་འབབ།།

གཡང་གཟར་གྱི་བྲག་ཕུག་གཞལ་ཡས་ཁང་དུ་བརླམས།།

ཟས་ཆག་གི་འཚོ་བ་སྨྱུང་གནས་ལུགས་སུ་བརྩིས།།

ཕྱི་རོལ་དུ་མི་ཕེབས་སྟོང་ཉིད་སྒོམ་ལ་ཞུགས།།

རྟུག་དྲི་ཡིས་ཁེངས་པ་དྲི་ངད་སྤོས་ལ་སེམས།།

བདེ་བ་ཡི་ཆེད་དུ་བྲེལ་བའི་ལས་ལ་ཞུགས།།

འཚོ་བ་ཡི་དོན་དུ་ལ་ལུང་འཕྲེད་དུ་བཅད།།

འདབ་ཆགས་ཀྱི་རིགས་ལ་བསྟོད་པ་འོས་ན་ཡང་།།

སྟོང་བསམ་ལ་གཡེང་པའི་ལྟས་ངན་ཐན་བྱ་འདིས།།

ཉིན་མོ་ལ་མི་བྲེལ་གཏི་མུག་གཉིད་ལ་ཤོར།།

མཚན་མོ་ལ་མི་ཉལ་རྐུན་མའི་ལས་ལ་ཞུགས།།

མཁའ་འགྲོ་ཡི་རིགས་ཀྱི་ཐ་མ་ཁྱོད་དང་བཅས།།

དུམ་བུ་ལ་བཏང་ནས་འཆི་ལམ་བརྫང་ན་འདོད།།

དྲི་བཞོན་དང་འགྲོགས་ནས་ནམ་མཁའི་དབྱིངས་སུ་རྩེན།།

རྒོད་པོ་དང་འདྲ་བའི་གཤོག་རྩལ་མེད་ན་ཡང་།།

མཁའ་དབྱིངས་སུ་ལྡིང་བའི་གཤོག་ཟུང་མངའ་བའི་ཕྱིར།།

ཕྱི་རོལ་ལ་འཕུར་ནས་ཁ་ཟས་འཚོལ་སོང་ཨང་།།

བདེ་སྐྱིད་ཀྱི་འཚོ་བ་དབྱར་མཚོ་ལྟར་རྒྱས་ཤིང་།།

རེ་བ་ཡི་གཤོག་རྩལ་མཁའ་དབྱིངས་སུ་ངོམ་དུས།།

སྤོབས་པ་ཡི་ཁྲབ་རྨོག་གོན་རྒྱུ་ཞིག་མེད་ཀྱང་།།

ལེ་ལོ་ཡི་དུས་དྲུག་འདས་ཁོམ་ཞིག་ཡོད་དམ།།

གནམ་གཤིས་དང་བསྟུན་ཏེ་སྐྱིད་པོ་ཡི་ཡུལ་ལ།།

འགྲོ་འདོད་ཀྱི་བསམ་པ་ཁྱོད་ལ་ཡང་ཡོད་མོད།།

རྣམ་གཡེང་གི་ཐག་པས་དམ་པོ་ལ་བཅིངས་ཏེ།།

མི་ཚེ་ཡི་ལས་དབང་བྲག་སྲུབས་ལ་བསྐྱལ་ལོ།།

ཁུ་བྱུག་གི་གསུང་སྙན་མི་ཡུལ་ལ་བསྒྲགས་ཏེ།

མཛེས་སྡུག་གི་དཔྱིད་དཔལ་ལོངས་སྤྱོད་ལ་རོལ་དུས།།

དུས་བཞི་ཡི་འགྱུར་བ་ཡིད་ངོས་ལ་མེད་པའི།།

ལས་ངན་གྱི་བྱ་ལ་སྙིང་རྗེ་རེ་སྒོམས་དང་།།

དྲན་ཤེས་ཀྱི་དབང་པོ་ཅིག་ཅར་དུ་འཕྲོག་ཅིང་།།

སྙན་མོ་ཡི་གསུང་སྐད་མི་ཡུལ་ལ་སྒྲོག་དུས།།

འཇིག་རྟེན་དུ་ཡོད་ཚད་རྨོངས་གཉིད་ལས་དཀྲོགས་ཀྱང་།།

ཕྱི་རོལ་ལ་ལྟ་བའི་མིག་ཟུང་དེ་ལྡོངས་སོང་།།

ལ་ལུང་གི་བགྲོད་ལམ་ཡུག་ཅིག་ལ་གཤགས་ཏེ།

ཕུན་ཚོགས་ཀྱི་འཚོ་བ་སུམ་རྩེན་ལས་ལྷག་ཅིང་།།

མཛེས་སྡུག་གི་སྒྲོ་མདངས་རི་ཀླུང་ལ་འཕྲོས་ཀྱང་།།

མུན་ནག་ཏུ་འཚོ་བའི་སྔུར་སྒྲ་དེ་ཐོས་བྱུ