སྐྱིད་རྒྱ་མཚོ། 2023-11-03
སྙིང་རྗེ་ཡི་མེ་ཏོག་འཁྲུངས་ཤིང་། །
འགྲོ་ཚོགས་ལ་བྱམས་པ་གནང་བའི། །
དུས་མཐའ་ཡི་ཁྱེའུ་དཀར་པོ། །
བྱང་ཐང་གི་སྒྲོན་མེ་འོད་ཆེན། །
གནས་ལུགས་ཀྱི་བདེན་དོན་ཟབ་མོ། །
ཐུགས་ཀློང་གི་གཞི་རུ་འདྲེས་པས། །
ཉམས་རྟོགས་ཀྱི་མགུར་གླུ་ལེན་མཁན། །
རྗེ་བཙུན་ཏེ་མི་ལ་རས་པ། །
མྱང་ཚ་མས་དུར་ཁུང་ནང་ནས། །
བུ་ཆུང་གི་ཆོས་ལམ་སྙེག་ཚུལ། །
ཡིད་ཁོང་དུ་འཆར་ཚུལ་བསམས་ན། །
མནར་གཅོད་ཀྱི་སྡུག་བསྔལ་ཁྲོད་ནས། །
སྐྱོབ་མཛད་ཀྱི་སྐྱེས་བུ་ཡོད་པས། །
མ་ཡུམ་དེ་བསོད་ནམས་མི་ཆུང་། །
སྡེ་མཐའ་ཡི་སྒོ་ཁྱི་ཟུག་སྐད། །
དངངས་འཚུབ་ཀྱི་ཁྲོད་དུ་ཡོད་ཀྱང་། །
བཀྲེས་སྐོམ་གྱི་སྡུག་བསྔལ་དེ་ཡིས། །
གཞན་ངོ་ཡི་དཀར་ནག་འཚོ་བའི། །
པེ་ཏ་མའི་ལས་དབང་ནག་པོ། །
ཡ་ཆུང་གི་ཡིད་སེམས་སྨྲེང་ཡང་། །
མིང་པོ་ཡི་ཆོས་དོན་ཟབ་མོ། །
སེམས་ཁོང་དུ་བསྐྱལ་བ་ཅི་གོ །
མཛེས་སེ་ཡིས་མིག་ཟུང་གཉོམ་པོ། །
མི་ལ་ཡི་འཁྲིས་སུ་བཏབ་ཀྱང་། །
ལས་དབང་གི་ཁ་ཡིག་བསམ་པས། །
སྐྱེ་བ་འདི་ཕྱིར་འཐེན་བྱས་ཤིང་། །
དུང་བརྩེ་ཡི་མདུད་པ་ཟབ་མོ། །
རང་སེམས་ཀྱི་མཁའ་རུ་དཀྲིས་ཏེ། །
ཐག་རིང་དང་ཐག་ཉེ་རྣམས་ནས། །
མིག་ཟུང་གི་ཡང་ཡང་བལྟས་ཡོད། །
རྩོམ་གསར། 10