རི་སྨུག། 2023-11-03
ངག་གི་གཙང་པོ་རབ་ཏུ་བྲུག་ཤུལ་གྱི། །
ལས་ཀྱི་སྡིག་སྒྲིབ་ཁུར་བའི་ཉ་མོ་ཨེ། །
བདེན་གྲུབ་ཆོས་ཀྱི་རང་མདངས་མ་མཐོང་ངམ།
ཉམས་རྟོགས་མགུར་གྱི་ལྟ་སྤྱོད་མ་རྟོགས་སམ། །
སྣང་བ་གར་དུ་འཁྲབ་པའི་མཆོད་སྡོང་གི། །
རྩེ་དང་རྩེ་རུ་འཁྲུངས་པའི་སྣ་ཚོགས་གླུ། །
སྒྱུ་འཕྲུལ་མཁའ་དབྱིངས་ངོས་སུ་བླངས་ཙམ་བྱས། །
ངག་གི་རྟ་ཕོའི་འཁྲིས་སུ་འདར་ཙམ་བྱས། །
མི་རྟག་སྐྱེ་འཆིའི་བར་ནས་སྐྱོམ་ཙམ་བྱས། །
གེ་སར་རླུང་གིས་གཙུབས་པའི་པད་མོ་ཨེ། །
གཤོག་པ་བྲག་ལ་བརྡར་བའི་རྒོད་པོ་ཨེ། །
འདུས་བྱས་འཁོར་བའི་ཐང་ལ་མཐའ་མེད་དོ། །
རང་གིས་ཅི་བྱས་ལས་ལ་བདག་མེད་དོ། །
མ་ངེས་སྐྱོ་བའི་ཚུལ་ལ་སྲབ་མེད་དོ། །
དེའི་ཕྱིར་རབ་སྟུག་མུན་པའི་ཀློང་ཡངས་སུ། །
རྙིད་པའི་ཡལ་ག་དག་ནི་རྐྱོང་ཙམ་གནོངས། །
འཁུམས་པའི་བློ་རིག་དེ་ཡང་གསལ་ཙམ་བྱོས། །
ཟབ་མོ་ཆོས་ཀྱིས་རྗེས་སུ་ཟུངས་ཤིག་ཨང་། །
ཏིང་འཛིན་པིར་ལ་འཁྱུག་པའི་ཉོན་མོངས་ཨེ། །
མགྲིན་པའི་སྦུགས་ན་འཕྱུར་བའི་སྤྲིན་པ་ཨེ། །
རྣམ་རྟོག་ལྷུན་གྱིས་གྲུབ་པའི་འགྲོ་དྲུག་ཨེ། །
ང་དང་འདྲ་བའི་སྐྱེས་བུ་ཇི་རྙེད་ཅིག །
བདག་མེད་རྡོ་བ་བཞིན་དུ་དོར་སོང་བས། །
ལན་ཅིག་མིག་གིས་འགྲོ་བའི་ཕྱོགས་བཞིར་ལྟོས། །
རེ་ཞིག་བསིལ་བའི་ཆར་ཆུ་ལྷུག་པོར་བོབས། །
བརྟན་པ་གཤིས་ཀྱི་ངང་རྒྱུད་རིང་བར་མཛོད། །
མི་རྟག་མགུར་གྱིས་བཏུལ་བའི་སྤྱང་མོ་ཨེ། །
འཁྲུལ་སྣང་གླུ་རུ་ལེན་པའི་ཡུ་མོ་ཨེ། །
ཉེས་སྤྱོད་ཚད་མར་སྒོམ་པའི་གར་མ་ཨེ། །
སྤྲིན་གྱིས་གནམ་འཕངས་གཅོད་པའི་རྫ་ལུང་ནས། །
དུད་སྨུག་སྤྲིན་ལ་བསྙེས་པའི་བས་མཐའ་ནས། །
མགོ་བོ་ཁུར་གྱིས་དུད་པའི་ལྗོན་གསེབ་ནས། །
ཆོས་ཀྱི་སྙིང་པོ་རྣ་བར་བླགས་ཨེ་བྱུང་། །
འཁོར་བའི་འཚོ་ཚིས་ཕྱིར་མིག་གནང་ཨེ་བྱུང་། །
ཉེ་དུའི་ཚོགས་ལ་མནོ་བསམ་བཏང་ཨེ་བྱུང་། །
བརྩེ་བས་གཟིགས་པའི་རྗེ་བཙུན་སྒྲོལ་མ་ཀྱེ། །
རིག་པའི་ཀློང་སྒོ་འདྲེན་མཁས་འཇམ་དབྱངས་ཀྱེ། །
ངག་གི་དངོས་གྲུབ་སྩོལ་མཛད་ལྷ་མོ་ཀྱེ། །
གང་གི་སྤྱན་གྱིས་མི་བསྲུན་བདུད་བཅོམས་ནས། །
མི་སྡུག་སྲིན་པོའི་རལ་བ་རྩ་བྲེགས་ནས། །
ཞབས་ཀྱིས་བཏེགས་པའི་འབྱུང་བོའི་ཟིལ་མནན་ནས། །
ང་དག་སྐྱེ་དགུའི་གྲལ་ལ་དཔལ་སྦྱིན་བྱུང་། །
འཇམ་པོ་གདན་གྱི་སྟེང་ལ་བསིལ་གཏོར་བྱུང་། །
གཟེར་བའི་ནད་དེ་དྲུངས་ནས་ཕྱུང་སོང་ངོ་། །
རྩོམ་གསར། 10