ཆུང་དུས་གོམ་གསུམ་ཆེད་དུ་རེ་འདུན་ཡུན་རིང་འཆང་།།

ལུས་ཕུང་སྡང་བ་བསམས་ནས་བདག་དང་གྲིབ་མ་བཞིན།།

ཁག་ཁག་སོ་སོ་མི་འབྲལ་མཉམ་འགྲོ་མཉམ་འདུག་བྱས།།

དྲིན་གྱི་བདག་པོ་འདི་འདྲ་འཚོལ་ཡང་རྙེད་ཐབས་བྲལ།།

ཕྲན་ལ་མཉེས་གཤིན་གནང་བའི་ཡབ་ཡུམ་དྲིན་ཆེན་ནོ།།

བརྩེ་བའི་དྲོད་ཁོལ་ནང་ནས་རྣམ་དག་སེམས་ཀྱིས་བསྐྱངས།།

མཛའ་མཐུན་ཡིད་ཀྱི་འཚོ་བར་ནན་ཏན་ངག་གིས་ཁྲིད།།

ཡིད་འོང་འབུམ་ཕྲག་གསེང་ནས་ང་ཉིད་ལྷག་ཏུ་གཅེས།།

ཚེ་འདིའི་བྱམས་པའི་མ་ལོ་དྲན་ཐེངས་ལན་གཅིག་མིན།།

སྐུ་ཚེ་བརྟན་པོར་བཞུགས་ཤིག་ཀྱེ་མ་ཡུམ་ཆེན་ལགས།།

དཔྱིད་དུས་ཁ་ཆར་ཁྲོད་ནས་ཁྱིམ་གྱི་མཛེས་སྡུག་བཙལ།།

དབྱར་ཁའི་ཚ་གདུང་འོག་ཏུ་ཞོར་ལས་སོགས་ལ་གཉེར།།

སྟོན་དུས་ཆར་ཞོད་ཀློང་ནས་འབྲས་བཟང་ཁྱིམ་དུ་བསྡུས།།

དགུན་ཀའི་གྲང་རླུང་མཉམ་དུ་སྔ་ལོངས་འཕྱི་ཉལ་བྱས།།

དཀའ་བའི་རྔུལ་ཆུ་གྲངས་མེད་ངེད་ཅག་སླད་དུ་མྱོང་།།

ལན་ཆགས་རིང་མོ་ཐོགས་པའི་དྲིན་གྱི་ཡུམ་ཆེན་མོ།།

དཀའ་སྡུག་འཚོ་འདུ་གསེང་དུ་བྱམས་པའི་མིག་གིས་ལྟ།།

རང་བཞིན་དྭངས་ཤིང་གཙང་པའི་སེམས་ཀྱི་ལྷ་མོ་ཁྱེད།།

དགའ་བའི་ལོ་འདབ་ཚོགས་ལས་ང་ཉིད་འཚར་དུ་ལོང་།།

མ་ལོའི་རང་ཞལ་མཇལ་བར་སྐྱིད་ཀྱིས་རྟག་ཏུ་ཁེངས།།

རྒྱུས་མེད་ལས་དབང་ཞིག་གིས་ཡུལ་ལུང་གཞན་དུ་འཚོ།།

ཆ་མེད་སློབ་གླིང་གཅིག་ནས་དྲན་གདུང་ཚོར་བས་མནར།།

སྔོན་གྱི་བསོད་ནམས་ཕུང་པོས་ཁྱེད་ཀྱི་བུ་ཕྲུག་གྱུར།།

བདག་ལ་སྙིང་དུ་སྡུག་པའི་ཡུམ་ཆེན་ཟླ་མིང་ཅན།།

རྒྱང་རིང་ཡུལ་གྱི་བདག་ལ་སེམས་ཀྱིས་རྟག་ཏུ་སྲུང་།།

རྣམ་དག་འཆར་སྒོའི་གསེབ་ཏུ་ཡིད་འོང་ལང་ཚོ་རྫོགས།།

གཞུང་དྲང་འཛུམ་ཞལ་འཕྲོ་ནས་རང་ཡུལ་ལུང་པ་ནས།།

ཕྲན་ལ་བག་ཆགས་མཐུག་པོས་དགའ་བའི་ལོ་ཟླ་ཚོགས།།

གཅིག་རྗེས་གཉིས་མཐུད་བགྲང་ཡང་བརྩིས་པའི་དུས་ཤིག་མེད།།

ཨ་མའི་མཉེས་གཤིན་དྲོན་མོར་ཨེ་མ་ངོ་མཚར་རྨད།།

ལུས་ཕུང་སྒྱུ་མའི་མདངས་ལ་མི་རྟག་ལས་ཀྱིས་གཙེ།།

གདོང་གི་གཉེར་མ་མཐའ་དག་ང་དང་ང་ལ་འབྲེལ།།

སྲོག་གི་རྒྱུད་སྐུད་ཕྲ་མོ་བརྩེ་བའི་རང་བཞིན་མངོན།།

ཆུང་ནས་ད་བར་སྐྱོང་མཁན་བྱམས་ལྡན་མ་ལོ་ཁྱེད།།

བདག་དང་གཏན་དུ་འགྲོག་པའི་སྨོན་ལམ་ཡང་ཡང་ཞུ།།

གཡང་དཀར་ལུག་གི་བལ་ལས་གཤིས་ཀ་ཡག་ཅིང་ཡག།

གངས་རི་དཀར་པོའི་མདོག་ལས་ཁ་དོག་གཙང་ཞིང་གཙང་།།

སྦྲང་དཀར་རྩམ་པ་དེ་ལས་རང་བཞིན་དྭངས་ཤིང་དྭངས།།

བརྩེ་ལྡན་ཡབ་ཡུམ་གཉིས་ལས་དྲིན་ཆེན་རྙེད་མེད་ཡིན།།

ལུས་སེམས་ན་ནད་མེད་ཅིང་འབྲལ་མེད་བདག་དང་འཚོ།།

ཁྱིམ་གཞིས་དྲོན་མོ་དེ་ནས་ཨ་འགྲིག་ཆ་འགྲིག་གི།།

མཛའ་མཐུན་ཡིད་ཀྱི་དགའ་བ་ཕྱི་ནང་ཡོངས་ལ་གསལ།།

མཛེས་སྡུག་ཕང་ཕུང་དཀྱིལ་དུ་ཕ་འཛོམས་མ་འཛོམས་གྱུར།།

ཤ་ཁྲག་རུས་པའི་གཏིང་ནས་དགའ་བདེའི་སྣང་བ་ཚོགས།།

གློ་སྙིང་གྲང་ཁོག་དབར་ནས་ཡལ་མེད་གཏན་དུ་རྟོགས།།

འདི་ནས་ཡན་དུ་བརྩིས་པའི་བགྲང་བྱ་བཅུ་ལྷག་ནས།།

མགོན་སྐྱབས་བཤེས་གཉེན་དུ་མའི་ཞབས་ཀྱི་པད་མོར་རེག།

རྒྱལ་བ་རྒྱ་མཚོའི་གསུང་ལ་རྩོད་ཅིང་རྩོམ་པའི་དགེ།།

ཚེ་འདིའི་དྲིན་ཆེན་རྣམ་གཉིས་ཚེ་ཐག་རིང་བའི་ཕྱིར།།

མ་གྱུར་འགྲོ་དྲུག་ཡོངས་ལ་རྣམ་དག་སེམས་ཀྱིས་སྔོ།།

༼ ཁྲག་གདོང་། ༽