དྲུག་གཅིག་བྱིས་པའི་དུས་ཆེན་ལ་ཕུལ་ བའི་ལེགས་སྐྱེས།

ནམ་མཁའི་སྒལ་ཚིགས་འདི་ཧ་ཅང་སྔོ།

སྒལ་ཚིགས་ལ་བཏབ་པའི་སྐར་མ་འདི་དག།

བྱིས་པ་འུ་ཚོའི་མགུལ་རྒྱན་བྱས་ན་ཇི་འདྲའི་སྐྱིད་པ་ལ།

མིག་སྔོ་བའི་བུ་མོ་འདི།

ཤོག་ངོས་སུ་བྲིས་པའི་རི་མོ་མ་རེད།

ཕྱི་རྒྱལ་ནས་ཐོན་པའི་ཕྱི་མོ་ཞིག་རེད།

སྐྲ་ལོ་རིང་ཞིང་སེར་བ་འདི།

སྟོན་ཁའི་ཡུག་རྩྭ་དང་འདྲ་བས།

དེང་ཐོག་མི་མཛེས་མོད། ལྟ་བཞིན་ལྟ་བཞིན།

སྐྲ་ཡི་ལན་བུ་རེ་རེ་དང་།

གཡུ་རྡོག་ལྟ་བུའི་མིག་ཆུང་སྔོ་བ་གཉིས་ལས།

གང་ལ་བལྟས་ཀྱང་ཧམ་སེམས་མི་སྐྱེ་བ་མི་འདུག།

བྱིས་པ་ང་ཚོས་སློབ་གྲྭའི་གླིང་ནས་དེ་སྐད་སྨྲས།

ཤ་བ་སྐེ་རིང་དང་མཚུངས་པའི་ཕྱི་རྒྱལ་འདི་ཚོ།

ཁང་བའི་སྒོ་ཆུང་ལས་མི་ཤོང་བར་བསམ།

པན་ནའི་གླང་ཆེན་དང་འདྲ་བའི་སོག་པོ་འདི་ཚོ།

ཁང་བའི་སྒོ་ཆུང་ལས་མི་ཤོང་བར་སྙམ།

དེ་ལྟར་བསམ་ཞོར་ང་ཡུལ་ལ་ལོག་པའི་

ལམ་བར་ནས། དྲན་བྱུང་།

ངས་སློབ་དེབ་ངོས་ཀྱི་སློབ་ཚན་དེ་དྲན་བྱུང་།

རྔ་མོང་དང་ར་རྒན་ཞེས་པ་དེ། ཧ་ཧ། དགོད་བྲོ་བ་ལ།

བྱིས་པ་འུ་ཚོ། བློ་རྒྱ་ཁྲོན་པ་ལས་དོགས། ཧ་ཧ།

ཡང་བསྐྱར་ངས་སློབ་ཚན་ཞིག་དྲན་བྱུང་།

ཁྲོན་པའི་ནང་གི་སྦལ་བ། ཧིན།

ང་སྦལ་བ་དང་གཏན་ནས་མི་འདྲ།