བཤུལ་གྱི་རས་པ། 2023-05-31
ནམ་ཟླ་དཔྱིད་ཀྱི་ལང་ཚོ་ལས།།
འཇའ་སྤྲིན་འོད་ཀྱི་ར་བ་འཐེན།།
འཁོར་བའི་ཚོན་གྱིས་མ་བྱུགས་པའི།།
རང་བྱུང་ལྷ་ཡི་མེ་ཏོག་འཁྲུངས།།
འོད་གསལ་ཤེལ་གྱི་མེ་ལོང་ལ།།
ཚེ་རབས་སྐྱབས་ཀྱི་དྭངས་མ་རྨིས།།
མཁའ་ལ་གཤེགས་པའི་དར་ཟམ་ལས།།
མཇལ་བའི་སྐལ་བཟང་ཁྱེད་ལ་མཉེས།།
ཟིལ་བ་ཤམ་པའི་ནགས་མ་ཡི།།
ཞི་བའི་རུ་སིལ་ཉམས་དགའ་དེར།།
སྡོད་པའི་དྲང་སྲོང་དམ་པ་གང།།
ཐུགས་འདུན་འོ་ཆུ་གཅིག་ཏུ་བསྲེས།།
སྐྱེ་ཕྲེང་གསེར་རིའི་མུ་ཁྱུད་ལས།།
བཀྱེ་བའི་ཟེར་མ་གངས་ལ་ཕོག།
ད་རེབས་སྐུ་ཡི་མཛད་འཕྲིན་གདུགས།།
སྔར་མེད་སྲིད་པའི་རྒྱན་དུ་ཆེ།།
ངུར་སྨྲིག་གོས་ཀྱི་ཚོས་ཁ་ན།།
བྱིན་རླབས་འོད་ཀྱི་དྲ་བ་རུ།།
འཕག་ཅིང་འཚང་བའི་འགྲོ་མང་རྡུལ།།
སྙིང་རྗེའི་གཟུགས་སྐུ་ཁྱེད་ལ་དད།།
རྔམ་ཆེན་ཁྲི་ལ་བརྗིད་པའི་སྐུ།།
ཟབ་གསང་ཕིག་པའི་རྨད་བྱུང་གསུང་།།
རྗེས་ཆགས་འགྲོ་བར་བརྩེ་དགས་ཐུགས།།
མི་ཕྱེད་ཡིད་ཀྱི་བསྟི་གནས་མཆོག།
རྨོངས་བའི་ས་རྡུལ་འཕྱུར་བའི་སེམས།།
བརྗོད་འདས་ངག་གི་གཙང་བོས་བཀྲུས།།
སྡང་སྡུག་ན་བུན་འཐབ་པའི་ཀློང།།
བཅོས་མིན་ཚ་བའི་འོད་ཀྱིས་གཞོམ།།
རྒུད་པའི་འོབས་སུ་ལྷུང་བ་ཡི།།
མྱ་ངམ་སྟོང་གི་ཆོ་ངེ་མཁན།།
མུན་པའི་གོས་ཀྱིས་གཏུམ་པའི་ཚོགས།།
བདེ་ཆེན་བདེ་བའི་ས་ལ་བཀོད།།
བསྟན་ལ་ལྷག་བསམ་འོ་མའི་མདངས།།
གཤིས་ཀྱང་བདེན་པའི་མངལ་ལ་ལྕི།།
གཡོ་མེད་དུང་གི་ལྷུན་པོ་ལགས།།
ཁྱེད་ནི་བསྟན་བདག་སྐྱེས་བུའི་སྙིང་།།
འོག་མིན་ཆོས་ཀྱི་དབྱིངས་རིམ་ན།།
ལེགས་གསུང་རྒྱལ་ཀུན་དགྱེས་པའི་གཏམ།།
བསོད་ནམས་གསེར་གྱི་ས་གཞི་རུ།།
གྲངས་མེད་འགྲོ་བའི་མགོན་ཁྱེད་བཞུགས།།
ཐ་སྙད་རླབས་ཀྱི་ཟེགས་མ་ཁུར།།
གཙང་བོའི་དྭངས་ས་དེ་རུ་འཁྱིལ།།
རྙོག་མེད་ཆུ་བོས་ཚིག་གྲུབ་བཟོས།།
སྙིམ་པར་བཅུག་ཏེ་ཁྱེད་ལ་མཆོད།།
ནམ་མཁའ་གཡུ་ཡི་མེ་ལོང་འདི།།
དེ་རིང་ཆོས་སྐུ་ཁྱེད་ལ་འབུལ།།
སྒྲིབ་པའི་སེམས་ཉིད་གྲོལ་བ་དང་།།
གནམ་གྱི་ཟེ་བ་ཡིན་པའི་གངས།།
དེ་རིང་ལོངས་སྐུ་ཁྱེད་ལ་འབུལ།།
འགྲོ་བའི་དགེ་སེམས་འཕེལ་བར་སྨོན།།
དར་དཀར་སྤྲིན་པའི་ཡོ་ལང་འདི།།
དེ་རིང་སྤྲུལ་སྐུ་ཁྱེད་ལ་འབུལ།།
འགྲོ་དོན་ནམ་མཁའ་ཁྱབ་པར་ཤོག།
རྩོམ་གསར། 10