ཀ

ད་ལྟ་བྱིས་དུས་དྲན།

མེ་ཏོག་གུར་ཀུམ་ལྟ་བུའི་བྱིས་དུས།

སྔོན་ཆད་ལྟར་བྱིས་པ་ཡིན་ན།

དབྱངས་གསལ་སོ་བཞིའི་གླུ་དབྱངས་ལེན་ཆོག།

མེ་ཏོག་གུར་ཀུམ་ལྟ་བུའི་མགོ་ལྕོག་

ལྡེམ་ལྡེམ་བྱེད་ཆོག།

ཁ།

མཚམས་རེར། རྩེད་ཆས་དག་དྲན།

ལན་རེར། ཟད་མཐའ་མེད་པའི་རྨི་ལམ་དྲན།

རྩེད་ཆས་ལྟ་བུའི་འཇིག་རྟེན་གྱི་བྱ་དངོས་ཅི་ཡོད།

བྱིས་དུས་ཀྱི་རྩེད་ཆས་དེ་དག་ཡིན་པར་བྱས།

ད་ལྟའི་འཚོ་བའི་དགའ་སྐྱོ་ཅི་ཡོད།

བྱིས་དུས་ཀྱི་རྨི་ལམ་ཡིན་པར་བྱས།

ག

འུར་རྡོ་དང་ཐ་གུ

ལུ་གུ་དང་བེའུ།

བྱིས་པའི་ལག་ཆུང་ཆུང་།

དལ་ལྷོད་ལྷོད་དུ་བྱིལ་བྱིལ་གཏོང་།

བྱིས་དུས་ཀྱི་ཁོར་ཡུག་མཐའ་དག་དྲན་ལ།

བྱིས་དུས་ཀྱི་ཞིང་ཁམས་ལྟ་བུའི་ཕ་ཡུལ་དྲན།

ང་།

མིད་པར་བྱིས་དུས་ཀྱི་ཐ་སྙད་ཐོགས།

དྲི་བསུང་ལྟ་བུའི་ཤུལ་ལམ་བྱིས་དུས།

མེ་ཏོག་ཨུཏྤལ་རྐང་གཅིག།

བྱིས་དུས་ཀྱི་དྲན་པ་ཡིན་པར་བྱས།

ཅ།

ད་ལྟ་བྱིས་དུས་ནི་རྟོགས་བཏགས་ཀྱི་

གློག་བརྙན་ཞིག།

ཧྲལ་ཧྲུལ་དུ་བཏང་བའི་གོས་ལྭ་

རལ་པོ་ཞིག་ཀྱང་ཡིན་ཚོད་བྱས།

ཆ།

སྨྲ་བ་མང་བའི་བྱིས་པ་ཞིག།

ད་ལྟ་ངག་སྨྲ་མི་ཤེས་པར་གྱུར།

དྲི་བ་སྣ་ཚོགས་འདྲི་མཁན་གྱི་བྱིས་པ་ཞིག།

ད་ལྟ་ངག་ལྐུགས་ནས་དྲན་ཚོད་དུ་ངུ་བར་བྱ།

ཇ།

རྒྱུ་སྐར་ཀྱི་གཙང་པོའི་ངོས་སུ།

བྱིས་དུས་ཀྱི་དབྱངས་གསལ་དག།

གང་འདོད་དུ་གར་ལ་རྩེན།

བྱིས་པ་བཞིན་གར་ལ་རྩེན།

ཉ།

རྫི་གླུ་ཞིག།

གཤོག་སྒྲོ་བཞིན།

བྱིས་དུས་ཀྱི་རྨི་ལམ་ལ་ཆས།

གངས་རིའི་འདབས་རོལ་ལ་ཆས།

རྩྭ་ཐང་གི་པང་བ་ལ་ཆས།

ཇི་ལྟར་ལམ་ལ་ཆས་ཀྱང་བྱིས་དུས་དྲན།

ཏ།

ཀ་ཡེ། བྱིས་པ། ཁྱེད་རང་གང་དུ་ཆས་ཟིན།

གངས་ཀྱི་གཅེས་ཕྲུག

ཐ།

སྐད་ཆ་ལྡབ་ལྡིབ་ཅིག།

ཆར་ཞོད་དང་འགྲོགས།

རྣ་བར་ཁྲོག་གེར་བབས།

ཟླ་འོད་མག་མོག་དང་འདྲེས།

བྱིས་པ་ཞེས་པའི་ཐ་སྙད་དང་བསྡོངས།

ར་རོ་བའི་རྨི་ལམ་ཞིག་རྨིས་པར་བྱས།

ད།

གྲིབ་མའི་ནང་དུ་བྱིས་པ་འཁོར་ལ།

རྣ་བ་དང་སེམས་ཀྱི་ཉེ་སར་ཉོན་མོངས་པ་དཀྲོལ།

ན།

སྐར་མ་སྨིན་དྲུག་ལྟ་བུའི།

གཡུ་ཆུང་དྲུག་དཀར་ལྟ་བུའི།

བྱིས་དུས་ཀྱི་ལང་ཚོ་དང་རྨི་ལམ།

པ།

འཛུམ་གྱི་འོད་ཟེར།

གཙང་པོའི་ཕ་རོལ་ནས་གཡོ།

དབྱར་ཟླ་རིང་མོ་ཞིག་ལ།

ལྟེ་ཐག་ཆད་པའི་བྱིས་པ་རྨིས།

ཕ།

ཚེ་རབས་དུ་མའི་སྡིག་སྒྲིབ་ཡོད་ཚད།

གློ་བུར་དུ་ཆར་བས་རླན།

ཉི་མ་ཡང་བར་མེད་དུ་དྲོ།

སྐད་ཅིག་མའི་འདུ་འཕྲོད་ལས།

སྨུག་པ་སྲབ་མོས་གཡོགས་པའི།

ཕྲུ་གུ་དམར་རྗེན་དུ་གྱུར།

བ།

འབྱམས་ཀླས་པའི་ན་ཚོད།

རྣམ་ཤེས་ཀྱི་དྲུད་དེ་གང་ལ་ཆས།

དུས་རབས་ཀྱི་སྨུག་པ།

ངག་གི་དབྱངས་ལ་བཀུགས་ཏེ།

བྱིས་དུས་ཀྱི་ཁ་དོག་ལ་ཕུལ།

མ།

ཨུ་དུམ་ཝ་ར་འདྲ་བའི།

བདག་གི་རལ་བ་སྟུག་པོ།

ཨ་མས་ཡང་ཡང་བྱིལ་བྱིལ་གནང་།

ཆེས་སྙིང་དུ་དམར་བའི།

བདག་གི་རལ་བ་ལྗང་ཁུ།

ཚེ་འདིའི་བྱས་པ་དང་པོ་ཡིན།

བྱིས་དུས་ཀྱི་རལ་བ་སྣུམ་པོ།

ཙ།

མེ་ལོང་ཡལ་པོ་ཞིག་ལ་ཡང་ཡང་བལྟས།

ཕྱེད་ཀ་གཉིས་སུ་སོང་བའི་མེ་ལོང་ཞིག།

ངོས་གཅིག་ན་བྱིས་དུས་ཀྱི་གཟུགས་བརྙན་འདུག།

ཡང་ངོས་གཞན་ན་ད་ལྟའི་དགའ་

སྐྱོ་ཆགས་སྡང་འདུག།

ཚ།

ད་ལྟ།

ངུ་ངག་འདོན་པའི་བྱིས་པ་ཤིན་ཏུ་མང་།

གྲུབ་མཐའི་ར་བ། རལ་གྲིའི་གྲོང་ཁྱེར།

ཟས་ཅོག་གི་ཁ་རུ་ལུག་ཤ་དང་ཕག་ཤ་འདུག

ཁམ་གང་ལས་ཟ་མི་ཆོག་པའི་དམ་བཅའ་ཡོད།

ཉིན་མཚན་བརྗེ་རེས་ཤེས་ན་ད་

གཟོད་རྒྱལ་ཁ་ཡོད།

ཛ།

བགྲེས་པོ་དང་བགྲེས་མོས་ཡང་།

བྱིས་དུས་ལ་འཁོར་ནས་དགོད་ཀྱིན་འདུག།

དར་མ་དང་གཞོན་པ་ཡང་།

བྱིས་དུས་ལ་ཕྱོགས་ནས་འཛུམ་གྱིན་འདུག།

ཉི་ཤུ་དང་ཉེར་གཅིག་ཡང་།

བྱིས་དུས་ལ་འཁྲེང་ནས་དད་ཀྱིན་འདུག།

ཝ།

ལོ་ཟླ་ནི་འཕྲུལ་མི་བཞིན།

ང་ཚོ་ལ་སྙིང་རྗེ་གཏོང་མི་སྲིད།

ཡང་ན།

ང་ཚོ་དང་ལར་ནས་འབྲེལ་བ་མེད།

ང་ཚོས་བྱིས་དུས་དྲུད་དེ་ག་ཤེད་དུ་ཆས།

ཞ།

གས་ཆག་ཏུ་སོང་བའི་བདག་གི་བྱིས་དུས།

བྱིས་དུས་སུ་མངའ་རིས་སྒྲ་སྙན་ལ་

ཉན་འདོད་ཡོད།

དབུས་གཙང་རི་བཞི་ལ་ཉུལ་འདོད་ཡོད

ཡིག་ནག་དང་སྔགས་ཡིག་ཀློག་འདོད་ཡོད།

ལྕེ་ཐོག་གི་རྐང་རྗེས་དག་གང་ལ་འཇོག།

ཟ།

ངོ་གདོང་གི་ཁ་དོག་འགྱུར།

བྱིས་ངག་ཡང་ལྡབ་ལྡིབ་ཏུ་གྱུར།

བསམ་མི་ཤེས་པར་གྱུར།

ད་ལྟ་ངག་ཡང་ལྐུགས་ནས་ཡོད།

འ།

གྲིབ་མའི་གསེབ་ཏུ་ཕྱེ་ལེབ་ཅིག་འཕུར་ན།

ལན་རེར་ཁ་དོག་དང་ལན་རེར་རྨི་ལམ་ཡིན།

ཡང་ན་མ་འོངས་པའི་བྱིས་དུས་ཡིན་ན་བསམ།

སྐྱེ་བ་རྗེས་མའི་བྱིས་དུས་ཀྱི་བསྟོད་

གཞས་བརྩམས།

ཡ།

གློ་རྡེག་གློ་རྡེག་ཏུ།

ཉི་ནུབ་དང་འཆི་འཕོ་དྲན།

བྱིས་དུས་སུ་དྲན་མི་སྲིད།

དྲན་ཡང་རྨི་ལམ་དུ་ཟད།

ར།

ད་ནི་དབྱར་ཁ་ཚེས་ཟིན།

དབྱར་གྱི་ཁ་དོག་ཚེས་ཟིན།

ངག་ནས་ཀྱང་ཕ་ཡུལ་ཞེས་པ་ཡང་ཡང་འཐེན།

རང་ཉིད་ཀྱི་བྱིས་དུས་དྲན་བཞིན།

རང་ཉིད་ལ་ཁེར་ལབ་ཡང་ཡང་བྱས།

ལ།

ད་ལྟའི་ས་སྲོད་རེ་རེ་ལ།

བྱིས་པ་ཞེས་པའི་སྙན་ངག་འབྲི་བཞིན་ཡོད།

བྱིས་པས་སྙན་ངག་ཤེས་མིན་མི་ཤེས་མོད།

གང་ལྟར་བྱིས་པ་ཞེས་པའི་སྙན་ངག་

འབྲི་བཞིན་ཡོད།

རང་ཉིད་ཀྱི……

རང་ཉིད་ལ……

ཤ།

ད་ལྟའི་ཉི་ནུབ་རེ་རེ་ལ

བྱིས་པ་ཞེས་པའི་རི་མོ་འབྲི་བཞིན་ཡོད

བྱིས་པ་ཞེས་པ་ཅི་ཡིན་མི་ཤེས་མོད

གང་ལྟར་བྱིས་པ་ཞེས་པའི་རི་མོ་འབྲི་བཞིན་ཡོད

རང་ཉིད་ཀྱི……

རང་ཉིད་ལ……

ས།

ད་ལྟའི་དུས་ཚོད་རེ་རེ་ལ

ནམ་མཁའི་དབྱིངས་སུ་སྐར་མ་བྲིས་ལ

མུན་པའི་ནང་རོལ་དུ་ཟླ་བ་ཆེ་ཆེར་བྲིས

བྱིས་པ་ཆེ་ཆུང་གྲངས་མེད་ཅིག་ཀྱང་བྲིས

བྱིས་པ་རེ་རེ་ལ་མིང་བཏགས་ཤིང་ཚེ་སྲོག་གནང

རང་ཉིད་ཀྱི……

རང་ཉིད་ལ……

ཧ།

ངས་མཚན་མོ་གྲངས་མེད་ཅིག་ལ་

བྱིས་པ་ཞེས་པའི་ནང་སྙིང་བྲིས།

ངས་དུས་ཚོད་གང་མང་ཞིག་ལ་བྱིས་པ་

ཞེས་པའི་ཕྱི་ཤུན་དཔར།

ངས་ལོ་ཟླ་མཐའ་མེད་ཅིག་ལ་བྱིས་པ་

ཞེས་པའི་ཡང་སྙིང་གླེང་།

ངས་མི་ཚེ་གྲངས་མང་ཞིག་ལ་བྱིས་པ་

ཞེས་པའི་རྣམ་བཤད་བྱས།

ངས་ཚེ་ཚེ་རབས་རབས་ལ་བྱིས་ལ་ཞེས་

པའི་སྙན་ངག་བྲིས།

ཨ།

བྱིས་པ། བྱིས་དུས།

དྲན་པའི་སྒྲོམ་ནང་གི་མེ་ཏོག་རྐང་གཅིག

བྱིས་པ། བྱིས་དུས།

ཡིད་ཀྱི་མཁའ་རུ་བཏང་བའི།

མུ་འབྲེལ་གྱི་ལྷ་སྒྲུང་རིང་མོ།