ཉེ་ཆར་མ་དངུལ་སྒོར་ཁྲི་2400བཏང་བའི་གཞིས་རྩེའི་རྟེན་མཛོད་ཁང་དངོས་སུ་སྒོ་ཕྱེ་བ་རེད།

ཤེས་རྟོགས་བྱུང་བར་གཞིགས་ན། གཞིས་རྩེའི་རྟེན་མཛོད་ཁང་གི་སྐྲུན་དངོས་གཙོ་བོ་ཇོ་མོ་གླང་མའི་རིག་གནས་ཡུལ་སྐོར་བསམ་བཀོད་ཐོན་ལས་གླིང་གི་ལྟེ་བའི་ས་ཁོངས་སུ་གནས་པ་དང་། ས་བཟུང་རྒྱ་ཁྱོན་སྨི་ངོས་གྲུ་45058ཟིན་པ། སྤྱིའི་འཛུགས་སྐྲུན་གྱི་རྒྱ་ཁྱོན་སྨི་ངོས་གྲུ་42095ཟིན་ཞིང་། སྐྲུན་དངོས་ཧྲིལ་པོར་མི་རིགས་རིག་གནས་ཀྱི་གཞི་རྒྱུ་ལྡན་ཡོད་པ་དང་འགྲེམས་ཁང་རྒྱ་ཆེ་ལ་བྱེད་ནུས་ཆ་ཚང་པོ་ཡོད། སྐྲུན་དངོས་གཙོ་བོར་ཐོག་སོ་གསུམ་ཡོད་ཅིང་། སྐྲུན་དངོས་ཀྱི་ནང་ངོས་སུ་འགྲེམས་ཁང་དང་། ཉམས་གསོ་ཁང་། ཞིབ་འཇུག་ཁང་། མཛོད་ཁང་། འཁྲབ་སྟོན་ཟློས་གར་ཁང་། ས་འོག་ཁང་པ། སྒྲིག་ཆས་ཁང་། བྱེད་ནུས་ཁང་གཞན་དག་བཅས་ཚུད་ཡོད། འགྲེམས་ཁང་ནང་རང་བྱུང་ས་ཁམས་འགྲེམས་ཁང་དང་། མི་ཆོས་རིག་གནས་ལོ་རྒྱུས་འགྲེམས་ཁང་། དམངས་སྲོལ་རིག་གནས་འགྲེམས་ཁང་། འཕེལ་རྒྱས་ཀྱི་གྲུབ་འབྲས་འགྲེམས་ཁང་བཅས་ཁྱོན་བརྗོད་དོན་གཙོ་བོ་4ཡི་འགྲེམས་ཁང་6ཡོད། རྟེན་མཛོད་ཁང་དུ་ཉར་ཚགས་བྱས་པའི་རིག་དངོས་3200ལྷག་ཙམ་ཡོད་པ་དང་། རིག་དངོས་མང་པོའི་ཁྲོད་ནས་དམིགས་བསལ་ཁྱད་ཆོས་ལྡན་ཤོས་ནི་རྡོའི་སེང་གེ་ཆ་གཅིག་པོ་དེ་ཡིན་ཞིང་། དེ་ནི་བོད་བཙན་པོའི་དུས་རབས་ཀྱི་རིག་དངོས་ཡིན་པ་རེད།