མཐོ་རི་གསུམ་རི་རྩེ་གངས་ཀྱིས་བཟུང་།།

གངས་ཁ་བ་གནའ་འབབ་ད་འབབ་རེད།།

དེ་ཡིན་ཡང་ཡིན་ལ་རེད་ཀྱང་རེད།།

འོད་གཟི་མདངས་མ་ཡལ་བསྐལ་པ་འགོར།།

དཔེ་འདི་ལ་དཔེ་ཟླ་ཨེ་གདའ་སྟེ།།

དེ་མི་གདའ་དཔེ་ཟླ་ངས་ཁྱོད་བཤད།།

དྲིན་ཕ་ལོའི་དཔའ་གདེང་དེར་འདྲ་སྟེ།།

མདངས་མ་ཡལ་གཟི་བྱིན་ཇེ་ཆེར་རེད།།

ནགས་རྒྱ་རྫོང་ཁྭ་ཏ་བྱ་ལ་འགྲན།།

བྱ་རྒོད་པོའི་གཤོག་འགྱུར་མི་ལོངས་སྟེ།།

སྤྲིན་བང་རིམ་དགུ་བརྩེགས་གཅོད་དུས་ན།།

གཤོག་སྐྱེན་འགྱུར་གང་བཟང་དེ་ནས་ཤེས།།

དཔེ་འདི་ལ་དཔེ་ཟླ་ཨེ་གདའ་སྟེ།།

དེ་མི་གདའ་དཔེ་ཟླ་ངས་ཁྱོད་བཤད།།

དྲིན་ཕ་ལོའི་བྱ་བྱེད་དེར་མཚུངས་ཏེ།།

དགག་འགོག་རྐྱེན་བྱུང་ན་གསེར་གཤིས་མངོན།།

དགུང་ཉི་ཟླ་འཆར་ནུབ་རེས་མོས་ཏེ།།

འཆར་མི་ཐུབ་གཞན་ནས་ལུས་དོགས་མེད།།

འོད་གསལ་མོག་བསིལ་དྲོད་སྤྲོ་དུས་ན།།

ཁོང་སྐྱེ་འགྲོ་སྐྱེ་དགུའི་ཕ་མ་ཡིན།།

དཔེ་འདི་ལ་དཔེ་ཟླ་ཨེ་གདའ་སྟེ།།

དེ་མི་གདའ་དཔེ་ཟླ་ངས་ཁྱོད་བཤད།།

དྲིན་ཕ་ལོའི་བསླབ་བྱ་དེར་འདྲ་སྟེ།།

རོ་མངར་སྐྱུར་ཁ་བསྐ་ཚ་ལན་འཛོམས།།

ལྷ་སྟོན་པ་དགྲ་བཅོམ་དཀོན་མཆོག་གསུམ།།

སྡིག་ཉོན་མོངས་ཀུན་ལས་ཐར་བ་སྟེ།།

ཁོང་བྱང་སེམས་ཆོས་ཀྱི་སྙིང་པོ་ལ།།

ལུས་ཤ་ཁྲག་འབུལ་ལ་ཐེ་ཚོམ་མེད།།

དཔེ་འདི་ལ་དཔེ་ཟླ་ཨེ་གདའ་སྟེ།།

དེ་མི་གདའ་དཔེ་ཟླ་ངས་ཁྱོད་བཤད།།

དྲིན་ཕ་ལོའི་ཞེ་སེམས་དེར་མཚུངས་ཏེ།།

དོན་གནད་ལ་ཐུག་ན་ཅི་ཡང་གཏོང་།།

རྟ་འདོ་བའི་གོང་ནས་གློག་ལྟར་འཁྱུག།

བོའུ་ཁྲ་རིང་འཕེན་དུས་དགྲ་སྙིང་འབྱིན།།

ལས་དཀར་ནག་འཐབ་མོའི་གཡུལ་ས་ན།།

བུ་དཔའ་བོའི་དཔའ་སྐད་སེང་ལ་འགྲན།།

དཔེ་འདི་ལ་དཔེ་ཟླ་ཨེ་གདའ་སྟེ།།

དེ་མི་གདའ་དཔེ་ཟླ་ངས་ཁྱོད་བཤད།།

ཡབ་མེས་པོའི་སྐྱེས་རབས་དེ་ལྟར་རེད།།

ཕ་རྒོད་པོའི་རྒས་རབས་དེར་འདྲ་རེད།།

རྟ་འདོ་བའི་བྱང་ལམ་གཅོད་པ་ལ།།

བོང་སྐྱ་ལིའི་རྡུལ་ལམ་འགྲན་དུ་མེད།།

ལྕག་ཕྲ་མོས་གཞུས་དང་མ་གཞུས་རུང་།།

རྒྱུག་བང་ཁ་འདོ་བའི་ཡན་ན་མེད།།

དཔེ་འདི་ལ་དཔེ་ཟླ་ཨེ་གདའ་སྟེ།།

དེ་མི་གདའ་དཔེ་ཟླ་ངས་ཁྱོད་བཤད།།

ཕ་བཟང་བོའི་རུས་པ་དེར་མཚུངས་ཏེ།།

མི་རྒས་རུང་བློ་སྤོབས་རྒས་སུ་མེད།།

སྟག་དམར་ཡག་ངར་རྒོད་ངར་སྒྲ་དེ།།

ཁྱི་སྡར་ལིའི་ཟུག་སྐད་འདྲ་ལེ་མིན།།

ཕྱིའི་སྤུ་ཁའི་འཛམ་དྲུག་ཐིག་ལེ་དེ།།

ཝ་དམར་པོའི་གྲ་ཟླ་ག་ལ་ཡིན།།

དཔེ་འདི་ལ་དཔེ་ཟླ་ཨེ་གདའ་སྟེ།།

དེ་མི་གདའ་དཔེ་ཟླ་ངས་ཁྱོད་བཤད།།

ཕ་རྒོད་པོའི་འཛུམ་དྲུག་ཐིག་ལེ་དེ།།

ལུས་ཕྱི་ན་མི་གསལ་ནང་ན་གསལ།།

ནད་མཁྲིས་པའི་སྨན་གྱི་རྡོག་པོ་དེ།།

ལྕེ་ཁ་ཁ་ཟེར་ཡང་འཐུང་ཡག་བྱོས།།

ཤ་ཚ་བའི་ཕ་གཏམ་བསླབ་བྱ་དེ།།

རྣར་གཟན་རུང་ཡིད་ལ་འཛིན་ཡག་བྱོས།།

བུ་རྒོད་པོ་རྒྱལ་ཁམས་འགྲིམས་དུས་ན།།

སེམས་ཞེན་ཆགས་ཡུལ་ལ་ཡོད་ནི་བྱོས།།

འཕུར་གཤོག་རྩལ་ཁོ་ལག་རྫོགས་དུས་ན།།

ནང་ཕ་མའི་རྒས་ཉམས་སེམས་ལ་ཞོགས།།

དུས་ཏབ་ཅིག་ཁོམ་ལོངས་བྱུང་སོང་ན།།

སྐུ་ནད་མེད་བདེའམ་འཚམས་འདྲི་ཞུས།།

ཚིག་མཐུན་མིན་འགལ་རྩོད་བྱུང་དང་ན།།

ཕམ་ཁས་ལེན་གཉོམ་སོ་རང་གིས་ཁུར།།

དྲིན་ཕ་མ་ལ་ཁའི་ཉི་མ་ཡིན།།

འོད་ནམ་ཡལ་ངེས་མེད་རྒྱུས་མེད་ཡིན།།

སོས་དལ་དུས་མི་གཅེས་ཡལ་དུས་ན།།

ཨ་ཤུ་རེ་ཟེར་དུས་ངོ་ཚ་ཡིན།།