ཨ་མ་ལགས་ལ་ཕུལ།

ཀརྨ་སེང་གེ།        2023-02-09

དར་ལྕེ་རླུང་གིས་ཟད་པའི་རི་བོའི་ཉག་ག།

སྐྱ་མོའི་ལམ་ཕྲན་སྟོང་པ་ལོ་ཟླའི་སྣང་བ།།

ལུང་ཀྱོག་ཆུ་བོ་འབབ་པ་མི་ཚེའི་བཞུར་སྒྲ།།

བསྐྱར་ཟློས་འཚོ་བའི་སྣང་བརྙན་གཏན་གྲོཊ་ཡིན་ནམ།།

ཨ་མ་འབྲོག་ཐང་སྲུང་བའི་ས་ཡི་ལྷ་མོ།།

བྱུ་རུའི་ལན་ཚར་རྙིང་སོང་དབུ་སྐྱེས་དཀར་སྔོན།།

བཅུ་དྲུག་ལང་ཚོ་ཡལ་སོང་གཉེར་མའི་རླབས་རིས།།

བཞིན་བཟང་ཚེམས་ཕྲེང་ཐོར་སོང་རྙིལ་ལ་འཆའ་བ།།

གནས་ཡུལ་བག་མ་ཡོང་བ་བརྗེད་དུ་སོང་ངམ།།

ཡུལ་འདིའི་རི་ཐང་ལུང་གསུམ་སེམས་དང་འདྲེས་སམ།།

ཨ་མ་ཁྱིམ་གཞིས་འདེགས་པའི་སྒལ་ཚིགས་ཅན་པོ།།

འཁོར་བའི་དངོས་སྒྲུང་རིང་མོ་ཐོད་དུ་བྲིས་པའི།།

དར་རྒུད་ལས་ཀྱིས་གནང་བའི་མངར་སྐྱུར་ཁ་གསུམ།།

འཛུམ་མདངས་མིག་ཆུས་བཀྲུས་པའི་འཚོ་བའི་རྗེས་ཤུལ།།

ང་རང་མེ་ཏོག་ཚུལ་གྱིས་བཞད་སོང་སྙམ་མམ།།

གདོང་གཉེར་འཛུམ་གྱིས་དཀྲིས་པ་ཅི་འདྲའི་དགའ་ཨང་།།

ཁ་བ་འབབ་པའི་རི་ཞོལ་ལྷགས་རླུང་ལྡང་གི།།

རི་སྒང་སྤྱང་ཀིས་མི་བཟོད་ཆོ་ངེ་འདེབས་ཀི།།

ལྷས་ཁྱིམ་དྲོད་རླབས་བསྐྱིལ་བའི་ཨ་མ་དྲིན་ཆེན།།

ཁ་བའི་མེ་ཏོག་ལྟ་བུའི་མཁུར་མགོའི་སེར་ཁ།།

སེམས་ཀྱི་གས་སྲུབ་ཡིན་པ་སུ་ལ་གསང་ངམ།།

སྒྱུ་ལུས་ཙག་གིས་ཟད་པའི་རྣམ་ཐར་ཁྲོད་དུ།།

བརྩེ་བའི་བུ་ལོན་སྙོག་པའི་གཏམ་རྒྱུད་མེད་པ།།

མ་བཅོས་གཤིས་ཀྱི་མེ་ལོང་ཕྱི་གསལ་ནང་གསལ།།

ཨ་མ་འཁོར་བའི་བྲན་གཡོག་ལས་ཀྱིས་བསྐོས་སམ།།

ལུས་སེམས་ཁུར་གྱིས་དུད་པའི་དཀའ་སྡུག་མི་གླེང་།།

གསར་སྐྱེས་ཉམས་མྱོང་མེད་ཚོའི་རྣ་བར་མི་འགྲོ།།

ད་ནི་ལོ་ཟླའི་ཕྲེང་བ་ཁད་ཀྱིས་འདས་དུས།།

ཁ་ཡག་མི་ཚོགས་ཤིག་གི་མངོན་ལྐོག་མཐོང་སོང་།།

ཨ་མ་བརྩེ་ཆེན་ལྷ་མོའི་གམ་དུ་བཅར་ན།།

སྒེར་སེམས་དྲི་མས་སྟོང་བའི་དྭངས་གཙང་མཁའ་ལ།།

ང་ཡི་གཤོག་ཟུང་རྐྱོང་སའི་བར་སྟོང་ཡོད་རེད།།

  • ལེ་ཚན་སྔོན་མ།:ལང་ཚོའི་སྐྱོ་གར།
  • ལེ་ཚན་རྗེས་མ།:ཚོར་བས་ཟིན་པའི་མི་སེམས།