སེམས་ཀྱི་ཆུ་རིས་འདེད་པའི་རྗེས་ཤུལ་དུ།།

ལང་ཚོའི་ནམ་ཟླ་ཟད་པའི་སྟོན་མཇུག་ཏུ།།

རྡོ་བའི་སྙིང་ག་གས་པའི་ས་སྲོས་སུ།།

མི་ཚེ་ཁུར་གྱིས་དུད་པའི་ངལ་བ་ཚོར།།

ང་ཡི་ཡིད་ཀྱི་གཙང་པོ་འཕྱོ་ཞིང་ལྡེམ།།

གམ་གྱི་མེ་ཏོག་དག་ལ་ཕྱོགས་ན་ཡང་།།

རྦ་རླབས་དྲག་ཏུ་མཆེད་པའི་ཀུ་ཅོས་སྒྲས།།

སེམས་ཀྱི་མེ་ཏོག་ཟུམ་པ་སྡུག་རེ་བསྔལ།།

རི་ཀླུང་སྨུག་པ་ཡན་པའི་ནགས་འདབས་སུ།།

རི་དྭགས་ཁེར་རྐྱང་ལྟ་བུའི་ཚོར་བ་ནི།།

ཐ་སྙད་ཤིང་ལོས་མ་དྲོས་འཁྱགས་གང་སྟེ།།

བསྐལ་པའི་མེ་དཔུང་འབར་ཡང་གཞོམ་པ་དཀའ།།

སྡུག་བསྔལ་གླུ་རུ་དྲངས་པའི་བརྩེ་དུང་ལ།།

འཁོར་བས་ཨ་ལན་མེད་པ་ཅི་འདྲ་སྐྱོ།།

སྲོག་གི་འོད་ཟེར་འཚོལ་བའི་མཐའ་མ་རུ།།

མི་ཚེ་མྱ་ངན་ཐང་གི་དུར་སར་མངོན།།

མུན་པའི་མཚན་ལྗོངས་རིང་མོ་ཡིད་ལ་ཚེས།།

རྨི་ལམ་ནང་གི་བྱེའུ་འཁྱགས་པས་ཤི།།

གཤོག་པ་ངུས་པའི་སྨྲེང་གླུ་རླུང་གིས་བཟས།།

ད་ནི་མི་རོ་སྐམ་པོའི་བདེན་པ་རྟོགས།།

དྲན་པ་རྟོད་ཐག་རྙིང་ཧྲུལ་སྟོབས་ཀྱིས་བཅད།།

སེམས་ཀྱི་རྟ་རྒོད་རི་ཉུལ་ཐང་ནས་བྲོས།།

མཐའ་མེད་འཁོར་བའི་གྲོང་ནས་ཅི་ཡང་མྱོང་།།

ཚོར་བ་མེ་རུ་འབར་བའི་རྟོགས་བརྗོད་འབྲི།།

སྐྱོ་གར་གཏམ་རྒྱུད་ཅིག་ལ་ཞེ་འདང་ཤོར།།

ཚོར་བའི་མངར་སྐྱུར་གཉིས་ལ་བདེན་ཁ་བྱིན།།

ཐོབ་ཤོར་རེ་དོགས་འདི་ཡང་དགོས་རྒྱུ་སྟེ།།

འཁོར་བའི་ཆགས་སྡང་དྲག་ཏུ་འཁྲུག་པའི་རྟགས།།

ཚ་ཟེར་ཉི་འོད་སྟོང་གིས་མི་དྲོ་བའི།།

ང་ཡི་བྱང་ཁོག་ལུང་པ་མུན་པས་སྒྲིབ།།

ལས་ཉོན་འཐོར་རླུང་འཐབ་པའི་གཡང་ས་ནས།།

སྐྱེ་འཆིའི་ཟམ་པ་མ་མཐོང་ལས་རེ་ངན།།

ཚོར་བའི་ཟིལ་བ་ལྡག་པའི་ཕྱེ་མ་ལེབ།།

འཁོར་བ་སྒྱུ་མ་ལྟ་བུའི་ལྟད་མོ་ལས།།

བསླུ་བྲིད་རྙི་ལ་ཚུད་པའི་སྐྱོ་གར་ཞིག།

མེ་ཏོག་འདབ་མའི་ངོས་སུ་དོད་ནས་ཡོད།།