འདྲ་པར་ནང་གི་ཨ་ཕ་སློབ་གྲྭ་འགྲིམ་མ་མྱོང་།

རྩི་ཆུ་བྲེལ་ཚུབ་མེད་པར་བཞུར་གྱིན་འདུག།

མིང་ལ་འཆི་བ་ཟེར་བ་དེས་

ཁྱོད་ཀྱི་རུས་མིང་དང་བཅས་ཁྱེར།

དེ་ནས་བཟུང་། ང་སྡུག་ཡུས་ཀྱི་ཀློང་དུ་ལུས།

ལོ་ངོ་སྟོང་ལ་བྲིས་པའི།

གསེར་གྱི་ལྡེབས་རིས་ཤིག་བར་སྣང་སྟོང་བ་ནས་མེ་སྟག་འགས་བསྲེགས།

འཆི་བ་ནི་ཁྱོད་དང་འུ་གཉིས་བར་དུ་ལྡང་བའི་རླུང་འཚུབ་ཅིག།

སྐྱོ་བ་རེ་རེ། སྡུག་བསྔལ་རེ་རེ།

སྐྱོ་བས་ཉོབ་ཉོབ་པོར་བཏང་བའི་ལུས་པོ།

སྡུག་བསྔལ་གྱིས་ར་རོ་བར་བཏང་བའི་སེམས་པ།

ཕྱིར་དྲན་གྱི་མིག་ཀོང་ལས་ཟག་གིན་འདུག།

ཕྱིར་དྲན་གྱི་མིག་ཀོང་ལས་ལོག་གིན་འདུག།

རྒྱབ་གཟུགས་བཀྲག་མདངས་ཅན་དེ་ང་ལ་བཞག་སྟེ།

གཙང་པོ་བཞིན་རྒྱང་རིང་ཞིག་ཏུ་བཞུར་སོང་།

དེ་རིང་གཞི་ནས་ཨ་ཕའི་འདྲ་པར་ལས།

བཀྲག་མདངས་ཅན་གྱི་རྒྱབ་གཟུགས་མི་མཐོང་བ་རྟོགས།

ཕྱིར་དྲན་ལ་དགའ་སྐྱོ་འདྲེས་མ་སྤྲད་པ་ནས།

སྡུག་བསྔལ་ཞེས་པའི་ཐ་སྙད་ཅིག་ཐོག་མར་འགོ་བརྩམས་ཤིང་།

དེ་ལ་དྭ་ཕྲུག་འཁྱམས་པོ་ཞེས་པའི་གཤོག་པ་ཆ་གཅིག་ཀྱང་གསར་དུ་སྐྱེས།

གཤོག་པ་གཅིག་གིས་ཨ་ཕའི་བྱུང་བ་འཚོལ་ཞིང་།

ཅིག་ཤོས་ཀྱིས་ཁྱོད་ཀྱི་འདྲ་པར་འཚོལ།

ཁ་སང་གི་འདས་དོན་རེ་རེ།

ངའི་སྐྱོ་གར་གྱི་འཁྲབ་བཞུང་རེ་རེར་གྱུར།

དུས་ཚོད་ཀྱིས་བགྲངས་ཤིང་དུས་ཚོད་ཀྱིས་ཟོས་པའི།

ཨ་ཕ་མེད་པའི་བགྲང་བྱ་བཅོ་ལྔ་ལྷག་འགོར།

མི་ལོ་བཅུ་ཡི་ཡུན་དུ་ཁྱོད་ཀྱི་འདྲ་པར་འཚོལ།

དེ་རིང་གཞི་ནས། སྐར་མདའ་ཞིག་འོད་འཚུབ་བེར་དབྱིངས་སུ་འཚེར།

དུས་ཚོད་ཀྱི་མཛུབ་རྩེ་རེ་རེས།

ཨ་ཕའི་འདྲ་པར་འཚོལ་ཞིང་།

དཔྱིད་དབྱར་སྟོན་དགུན་རེས་མོས་ཀྱིས་ཐེངས་བཅུ་འགོར།

མཐའ་ཡི་མཐའ་ལ་ཁྱོད་ཀྱི་འདྲ་པར་འཚོལ་ཐུབ་བྱུང་།