ཙ་ཡུས་བཟོད་པ། 2022-12-05
སྟོན་རླུང་བསིལ་མོ་དལ་གྱིས་ལྷགས་པའི་དུས་ཚིགས་གཉོམ་པོ།།
སུ་དང་གང་ལ་སྐྱོ་ངལ་སྟེར་བའི་ནམ་ཟླ་འཁྱག་པོ།།
སུན་སྣང་ངར་པོའི་ཤུགས་ཀྱིས་གཙེས་པའི་དུས་སྐལ་སྐྱ་བོ།།
འདི་སྐད་ལས་ལ་འོག་འགྱུ་དམར་པོ་འཁོར་རྒྱུ་བྱུང་ཨང་།།
དབྱར་རྔ་རྒོད་པོ་ཁད་ཀྱིས་འཇགས་པའི་ཉིན་ཞག་སྐྱོ་བོ།།
ཁ་བའི་ཟེགས་མར་གཡབ་མོ་བྱེད་པའི་མདངས་མེད་མཚར་རོ།།
མྱ་ངན་སུན་པོ་ཤུགས་ཀྱིས་འཁོར་བའི་ཞེད་སྣང་འཇིགས་པོ།།
མི་འདོད་ལས་ཀྱིས་གནང་བའི་དན་རྟགས་འཁོར་རྒྱུ་བྱུང་ཨང་།།
ཡིད་ཀྱི་འདབ་ཆགས་དབྱངས་ལྡན་གཞན་ཡུལ་འགྲིམ་ཚུལ་སྡུག་པོ།།
སྙན་འཇེབས་དབྱངས་རྟའི་འགྱུར་ཁུགས་དབེན་པའི་བཞུད་ཚུལ་དག་པོ།།
གསུང་སྐད་སྙན་མོ་མ་ཐོས་ཡིད་སེམས་འཁྲུག་པའི་ཞེ་འདོད་མོག་པོ།།
བཞུད་སྟངས་འདི་ལ་ཆོ་ངེ་ཐན་ཐུན་འཁོར་རྒྱུ་བྱུང་ཨང་།།
རྐང་འཐུང་ལོ་འདབ་སེར་ཐིག་ལྷུང་བའི་ངང་ཚུལ་གཡེར་བོ།།
མིག་གཡོར་མཐོང་ཚུལ་ཀུན་རྟོག་སེམས་སུ་འཆར་ཡན་འཁྱུག་པོ།།
འཁྲེང་སེམས་དམར་བོ་ལྷོག་ལྷོག་འཕྱུར་བའི་ཞེན་ཆགས་རྒོད་པོ།།
སྣང་ཚུལ་འདི་ལ་སེམས་འགྱུ་མོག་པོར་འཁོར་རྒྱུ་བྱུང་ཨང་།།
ནེའུ་གསེང་གཡུ་ལོའི་གསེབ་ཀྱི་གཡུ་སྦྲང་སྐྱེལ་སྟངས་ཁག་པོ།།
མདངས་ལྡན་སིམ་པོ་འཁུར་བའི་སྟོན་ཟླའི་འཕྱང་འཕྲུལ་རྩུབ་པོ།།
ཀུན་བཟོད་དགའ་མ་འགྱུར་བག་རྒོད་པའི་མཐོང་སྣང་སུན་པོ།།
ཁ་དོག་འདི་ལ་སེམས་སུ་ངལ་བ་འཁོར་རྒྱུ་བྱུང་ཨང་།།
འཛིན་མའི་གཞི་རུ་བསིལ་རླུང་འུར་འུར་ལྡང་སྟངས་བཙོག་པོ།།
རྩི་བཅུད་ལོ་འབྲས་རྔམ་སྟབས་ཆེ་བའི་རྔམ་སེམས་ཧུར་པོ།།
གནོང་འགྱོད་ཀུན་ལ་མངའ་བའི་ཁྱད་མཚར་སྣང་ཞེན་ལྗིད་པོ།།
གཤིས་ལུགས་འདི་ལ་འཆར་འཕར་ལྡོམ་པོ་འཁོར་རྒྱུ་བྱུང་ཨང་།།
རྩོམ་གསར། 10