ཆུ་ཡི་དབྱིབས་ལ་ནམ་མཁའི་འཆར་ནུབ་དང་།།

སྡུག་བསྔལ་ཐིགས་པ་རེ་རེ་བྲི་བར་བྱ།།

དེ་མིན་རྐང་འོག་རྡུལ་གྱི་ཡོ་ལངས་ལ།།

སྐྱེ་འཆིའི་ཉིན་སྲིབ་གཉིས་ནི་གློག་བཞིན་འཁྱུག།

རེ་དོགས་ཤམ་བུ་བཏགས་པའི་མེ་ལོང་དུ།།

ཚེ་སྨད་ཐལ་ཕུང་བཞིན་དུ་སྤུར་བ་ཡིས།།

གྲིབ་མའི་བརྡ་དང་གཙང་ཆེན་ཞོགས་པའི་རླབས།།

བཟོད་དུ་མེད་ཀྱང་གཏན་གྱི་ལས་སྐལ་ལགས།།

སྒྱུ་ལུས་སིལ་བུར་ཆག་སྟེ་མཐོན་མཐིང་མཁར།།

ཁ་རླངས་སྙིམ་ཆུང་གང་ལྟར་ཡལ་བའི་མོད།།

འདས་དོན་གྲུ་ལ་གཏན་དུ་སྐྱོམ་པ་ཡི།།

སེམས་ནི་སྐྱོ་སུན་འདུས་མདོ་དག་ལ་རྒྱུ།།

ཕར་མཐའི་ལས་ཀྱི་སྤྱིལ་བུའི་དང་ག་རུ།།

ཕྱིན་དྲན་རྟོག་སྒྲུང་ནགས་ཀྱི་རི་དྭགས་ལྟར།།

སྡོང་བོའི་འདར་གསིག་ཡལ་གའི་ལྕུག་ལྕུག་ལ།།

ཞེད་སྣང་འཁུན་བུ་བཅས་ཏེ་འདྲོག་སྙམ་བྱེད།།

ནམ་ཞིག་འདབ་མ་རེ་རེ་འཐོར་ཚུལ་ལ།།

སྒྱུ་མའི་ཐག་ཁྲ་སེམས་ཀྱིས་སླེ་བཞིན་དུ།།

དཀར་ནག་གྲུ་གུ་སྡོག་པའི་སྨིག་རྒྱུའི་ཆུ།།

ཁངས་ཐོག་ཟེགས་མས་གཅུད་དེ་གང་བར་འགྲོ།།