རྨོག་ཐང་དཀར། 2022-11-14
བརྩེ་ཆེན་ཨུཏྤལ་སྔོན་པོའི་ཡང་སྟེང་གི།
ཤེལ་དཀར་འདབ་མའི་ཟེའུ་འབྲུ་མ་ཉམས་ན།།
རྗེས་ཆགས་བརྟན་པ་གཡོ་བའི་གུར་ཁང་ནས།།
རང་གི་མིག་འོད་རྟ་རྔ་ཙམ་པོ་དེ།།
འོད་ཀྱི་ཀ་བའི་གདན་ལ་ཡང་ཡང་བཞེངས།།
དེ་ལ་ལས་ཀྱི་ལྷན་པ་ཅི་ཞིག་གིས།།
ཁེབས་པ་མེད་ཅེས་སུ་ཡིས་བསྙོན་པར་འགྱུར།།
བདག་གི་སེམས་ཆུང་གཡུ་ལོའི་དགའ་ཚལ་ན།།
ལྷ་མོ་འཛུམ་ཆུང་ཅན་དེ་རྣམ་ཀུན་ཏུ།།
གཅེས་ཤིང་འཛུམ་པའི་ཟོལ་གྱིས་འོང་ལུགས་ལ།།
རེ་ལྟོས་རྨི་ལམ་མཚར་པོས་ཡང་ཡང་བསྙབས།།
གསེར་སྦྱངས་གདུ་བུ་སིལ་སིལ་འཁྲོལ་བའི་སྒྲ།།
གར་གྱི་སྤྲུལ་བ་གཡོ་བཞིན་གཡོ་བཞིན་དུ།།
གསེར་སྙན་པདྨོའི་དྲུང་དུ་ལྷུང་བའི་སྐབས།།
བདག་ནི་རེ་ཞིག་དོགས་པ་དང་བཅས་ཏེ།།
སྔར་གྱི་གནས་ནས་རྨོངས་པའི་ངང་ཚུལ་དུ།།
འདི་སྣང་ཡོལ་བའི་གསེབ་ལ་ཟུར་མིག་གིས།།
སྤྲིན་པ་དཀར་ནག་གཏིབས་པའི་རྗེས་སུ་བསྙེགས།།
ཁྱོད་ཀྱང་འོད་དཀར་ལྷུན་པོའི་གཞལ་ཡས་ནས།།
སྣང་སེམས་གླང་ཆེན་སྨྱོན་པ་བཞོན་ནས་སུ།།
དགའ་ལྡན་ནགས་ཚལ་བཅོམ་པའི་ཧམ་སེམས་ཀྱིས།།
བདག་གི་གམ་དུ་ལྷགས་པ་ཅང་བདེན་ནམ།།
སྐྱོ་སྡུག་འཁོར་བའི་ཐང་ན་གྲོགས་མེད་ངང་།།
ཆགས་སྡང་སེམས་རྩ་གཉོམ་པོ་ཁྲག་གིས་ཚོས།།
གདུང་བའི་ན་ཟུག་ཚིག་གི་ཉག་ཕྲན་གྱིས།།
དགྲ་བོའི་སྙིང་ཁྲག་འབེན་ལ་བསྣུན་པའི་ཞོར།།
སྙིང་ཤ་ལྷབ་ལྷུབ་འཐོར་བའི་དུར་ཁྲོད་ཀྱི།།
གཟན་ལ་འཁོར་བའི་བྱ་རྒོད་རྨས་མ་བཞིན།།
མདོ་མེད་ཨག་སྐད་སྒྲོག་པའི་མུ་ཅོར་མཁན།།
དུས་མཐའི་རླུང་དམར་ཁྲོད་ན་གཅེར་བུར་རྒྱུ།།
རྟོག་པའི་རླབས་རྒྱུན་དེད་ནས་མུ་མེད་ཀྱི།།
བྱང་ཐང་སྐྱ་མོ་འགྲིམས་དུས་ཨ་ཐང་ཆད།།
རེ་སྒུག་ཟླ་བ་ལྷ་མོའི་ཞལ་རས་ལ།།
ཆགས་མེད་སྙན་ཚིག་འབུལ་དུས་བག་རེ་དྲོ།།
མི་ཚོགས་ཁ་ཕྱོགས་སྟོར་བའི་བཞི་མདོ་ན།།
སེམས་ཀྱི་འཆར་སྣང་རླུང་ལ་བཅོལ་བའི་དུས།།
བདག་ནི་རྫ་ཁའི་སྨུག་སྤྲིན་ལང་ལོང་ཁྲོད།།
རྟ་ཕོས་འཚེར་སྐད་སྒྲོག་པའི་ཇག་ལམ་ནས།།
ཕྱིར་མིག་རྒྱང་ལྟའི་མདའ་མོ་ཁྱོད་ཕྱོགས་སུ།།
སྐར་མདའ་རྒྱུ་བའི་འགྲོས་ཀྱིས་འཕེན་མཁན་དང་།།
དེ་ནས་གློག་དམར་འཁྱུག་པའི་བར་གླགས་དེར།།
ཁྱོད་རང་ཨེན་ཙམ་སེམས་ཀྱིས་སྐྱོར་མཁན་ཙམ།།
འབྱུང་བར་འགྱུར་ཞེས་ཁ་ཚོན་སུ་ཡིས་ཆོད།།
མ་འོངས་ལུང་བསྟན་དབབ་པར་མི་གྱུར་ཏེ།།
རང་སེམས་རྟོག་པའི་ཁམས་འདི་རང་ལ་དབང་།།
དེ་རིང་འཆར་རྟོག་སྒྱུ་མའི་གླིང་བུ་འདིས།།
སང་ཉིན་རིག་པ་སྨྱོན་པར་དཔངས་རེ་བསྟོད།།
རྩོམ་གསར། 10