གངས་ཆབ་སྔོན་མོ། 2022-11-07
སེར་ལམ་ལམ་གྱི་ཁ་དོག་ཡོད་རྒུ།
དྭངས་གཙང་གི་མཚེའུ་ངོས་ལས་ཡོམ་ཡོམ་འགུལ་དུས།
གཙང་འགྲམ་དུ་ལུས་པའི་གླུ་སྐད་སྙན་མོ་དེ།
འཚོ་བའི་ཁ་རྒྱབ་ལ་བསྟབས་པའི་སེམས་ཀྱི་རི་མོ་རེད།
ཁྲུང་ཁྲུང་གི་གཤོག་རྡེབ་ལས་མཆེད་པའི་ཟིར་སྒྲས།
དུས་ཚོད་དང་རེ་བསྙེགས་ཀྱི་མཛེས་པ་གང་ཞིག།
རེ་རེ་བཞིན་ཁྱོད་ཀྱི་སེམས་ཁོང་དུ་བླུག་ནའང་།
ཁྲོན་པ་ལྟ་བུའི་བྲག་ཁོག་ད་དུང་ཡང་འཁྱགས་སིབ་སིབ།
གཞར་ནས་བཅོས་ཐབས་མེད་པའི་སེམས་སྣེ་རིང་མོ།
ཉིན་མཚན་མེད་པར་གངས་རི་དང་སྤང་ཐང་བརྒྱུད་ནས།
སྲིད་པའི་ཡས་མཐར་གཙང་པོ་བཞིན་ངང་གིས་བཞུར།
སེར་ཐིག་འགོས་པའི་གཡུ་ལོའི་ཚལ།
སྐྱེ་བ་འདིར་བཟོས་པའི་ནག་ཉེས་ཤིག་དང་འདྲ་བར།
ང་ཡི་མིག་ཀོང་དུ་གསེར་མདོག་བཞིན་སེར་ལམ་ལམ།
སྤྲིན་པ་ལང་ལོང་། ཆར་བ་ཟིམ་ཟིམ།
རང་དབང་མེད་པར་སྟོན་ཁ་ལྟ་བུའི་རྒྱང་རིང་དྲན་ཡོང་།
རྒྱང་རིང་ན་གཡུ་ལོ་ལྟ་བུའི་དྲན་པ་ཞིག་ལྷགས་ཡོད།
རྒྱང་རིང་ན་སྟོན་ཁ་ལྟ་བུའི་བུད་མེད་ཅིག་ལུས་ཡོད།
ཐམས་ཅད་སེར་ལམ་ལམ་དུ་སྣང་དུས།
བསྣོལ་མར་འཛིང་བའི་སྲང་ལམ་ཡོད་ཚད་ལས།
སྤྲིན་པ་དང་མེ་ཏོག་གི་སྒྲ་དབྱངས་བར་མེད་དུ་མཆེད་དེ།
མིའི་རིགས་ཀྱི་སྣང་ངོར་འོ་མ་བཞིན་འཐིམས་སྲིད་དམ།
རྒས་གཉེར་གྱི་རི་མོ་གསལ་ཙམ་མོག་ཙམ།
འཚོ་གཞེས་ཀྱི་སྙིང་པོའང་གཡོ་ཙམ་འདར་ཙམ།
ང་ཚོ་ལ་སེར་ཤེད་ཆེས་དྲགས་པས་ཡིན་ནམ།
སྟོན་ཁའི་འབྲས་བུ་བཞིན་ཡེ་ནས་སྨིན་ཐབས་མི་འདུག་ཨང་།
རྩོམ་གསར། 10